Idiay Ubbog

Yar-arikap ti kalleggak nga init Dagiti bumarbara a rayana

Iti agar-arimasa nga ubbog Linikmut dagiti darumaka ken ledda A pagpisawpisawan

Dagiti tukling a pasaray mangtukkaw Iti kuros iti lipnok.

Bumarbara ngem sumamsam-it Ti kinnit ti nakatangkayagen nga init Tapno dilpatanna ti arimasa ti ubbog A batokbatoken ti dagaangen a tukling A mangnamnama a mariing ti pitak Ket ipussuakna ti essem

Iti maparparkaganen a daga.

Adayo pay ti apon ti init

Ngem pumarpartak, umal-alibtak

Ti tukling a mangtiliw iti kuros

Iti lipnok ti ubbog

Ket dagiti darumaka ken dagiti ledda Makipagsalada iti pul-oy

A mangpuypuyupoy iti bumegbeggang nga init Tapno kumbuar ti pussuak

A mangbabasa iti rengngat ti daga...

--FROILAN A. MANGOBA