Sugat ti Daga (15)

Ti Napalabas: Nagbartek ni Bileg Aurelio wenno BA gapu iti damag a paserraan ti Presidente ti Ylocos Minerals a mangbibiag iti Razon-Colorado Investment Group a pagpapaayanna a kas CEO. Nangangay iti miting ket napagnunumuanda a pasanguanda ti Presidente iti masungad nga eleksion. Dimmawat iti tulong iti Amerika. Inkarida a patulodanda iti kuarta. Kinasarita ti katuganganna nga ipusenda ti Cincuenta Familias ngem di immanamong ket inkeddeng ti lakay nga aglabanda. Impagna ni BA ti pannakairaman ni Mayor Moreno iti listaan dagiti mabalin nga agpresidente a mairaman iti surbey. Nasdaaw ti mayor idi rummuar ti resulta ta awan ti planona a tumaray a Presidente. Kabayatanna, agparikuten ni Sadiri Miguel no pangalaanna iti ibayadna tapno mairuarna ti impatulod ni Ashley Mary kenkuana a kuarta. Kiniddaw met ni Saniata Marionne, babaen ti surat, nga agkitada ken manongna a BA.

N(Maika-15 a Paset) AKAPANAWEN ti motor ti courier ngem saan pay a nagkir-in ni Saniata Marionne P. Rio iti nagtakderanna a likud ti gate. Saanna a dinaras a pinigis ti selopin a bungon ti nakasobre a surat a naggapu iti Banco de Poro Ylocos. Ammona lattan a daytoyen ti notice of foreclosure ti banko. Ammonan a dua a bulan ti pawayway sakbay a bakanteanna ti balay a naipundarna bayat ti kalatakna a kas teen star kadagiti pelikula.

Tinagtagiurayna daytoy a gundaway, isu nga idi sangarabii, inturturedna a pinakaammuan ni manongna a Bileg Aurelio Puritac Colorado. Inturturedna, nupay manon a tawen a saan nga immamo iti kabsatna a pagaammona a maysan kadagiti kababaknangan iti sibubukel a pagilian.

Ta amkenna a sidiren ni Bileg Aurelio, a naaddaan iti anak iti kinabalasangna, dua kinapudnona, ket iti pay

agsabali nga ama.

Ket ita, ta adtoy ti surat ti banko ken ibagbaga ni Bileg Aurelio a mangted iti kuarta no la ketdi ipalgakna ti ama dagiti annakna, nasken a kagatenna ti appan ti manongenna. Isu nga insungbatna nga agkitada ita a malem iti maysa a bassit ken naulimek a restaurant iti pagruaran ti Cadaclan.

Simrek iti panglawaen ken napunno iti alikamen a salas. Indissona ti surat iti rabaw ti vanity set iti maysa a suli. Nagsennaay. Kinitana ti rupana iti sarming. Saan pay a nagmawmaw ti pintasna, ti kimmampuso a rupana ken dagiti dadakkel a matana. Aminda nga agkakabsat, addaanda iti kasta a mata, ngem kangrunaanna kenkuana a nagkunaan dagiti lallaki a makapapatay babaen laeng dagita nabiag a tawa ti kararua. Napuskol ken agtirtiritir ti kulot a buokna. Natundiris ti agongna. Nasin-aw ti pudawna.

Kinuna dagiti direktor iti pelikula ken telebision a mabalin a para iti bida ken kontrabida dayta a kinapintas. Kinapudnona, idi kalatlatakanna, agsasaruno dagiti proyektona ken naki-loveteam ken ni Chaddy Marcelino, ti loveteam a Mar-Chad idi 2005. Kinabalubalda ti loveteam a Ren-Chin da Ren Singson ken China Mauricio. Daytoy a balay iti Acacia Drive ti kanginaan a nabakirna. Adda pay sadiay Bagiw, sadiay Laoag, sadiay Cabigaan. Ngem nailakona amin dagitoy tapno masustenerna ti kinangato ti kasasaad ti panagbiagna.

Naminsan, nakigtot idi dandani nadungparna ni Arriztia Razon Colorado a nagbakruy iti nangingina nga impadasna nga aruaten iti Hermes iti Rue du Fauburg Saint Honore sadiay Paris iti maysa nga aldaw ti Mayo sumagmamanon a tawen ti napalabas.

“Hi, Marionne!” inyisem ni Riz. “Happy shopping!” “Hi!” inyisemna. “Likewise!” Agkatawa koma idi ta am-ammo ni Arriztia a kas artista ngem saan a pulos nga am-ammo daytoy a kas ipagna.

Babaen ti tinawen a panangsurotna iti bisiona a nangingina a kawes ken moda, natakuatanna laengen a nailakonan a nagsasaruno dagiti naipundarna a sanikua. Ken iti pannakatakuat kadagiti naub-ubbing ken sumangkakalapsat nga aktres, in-inut a nalipatan dagiti tattao a kas bida; nagbalin a kontrabida kadagiti dramaserye iti telebision—dagiti dramaserye maipapan kadagiti babaknang a kaaduanna ti agkikinnabit, agkikinnamrit ken agiinnagaw iti assawa.

Immuna a nayanak ni Imnas Dianne idi agtawen iti duapulo ket dua. Idi sinerioso ti maysa nga anak ti dati a senador ken apoko ti dati a presidente—a sinurotna iti maysa a nalimed a bakasionna sadiay Hawaii, sadiay California, iti yan dagiti Ylokano.

Simmaruno ni Nakem Rodolfo a putot ni Sam Lucero a nakaduana iti pelikula a “Sika, Siak, Isuna.” Nagkabbalayda ken Sam ngem nagsinada idi agtawenen ti ubing iti dua. Ammo ti amin no asino ti ama ni Nakem Rodolfo ngem maysa a palimed a nalabit awan ti makaammo no asino ti ama ni Imnas Dianne.

“USAREM ti GPS-mo,” kinuna ni Bileg Aurelio ken ni Thor idi iruar ni Thor ti SUV iti basement parking lot ti building. “Nagadayo ngaminen ti kayatna a pagkitaanyo, manong?” kinuna ni Thor.

“Ammom metten. Pagarupenna siguro a nalatak pay laeng. Dangnga nga adingko.”

Linabsanda manen dagiti agkakatayag a pasdek ti siudad. Ngem iti Cadaclan Boulevard a kangrunaan a mangpessat iti siudad iti amianan-abagatan a direksion, manarimaan a mapatpatakder ti maysa nga skyway a pangsolbar kano iti nakaro a trapiko. Ket ad-adda la ngaruden ti saan a panaggunay dagiti lugan agsipud iti panangokupar dagiti alad a yero a nanglakub kadagiti mapatpatakder nga agkakabileg a poste, makinaria ken work crew ti kontraktor.

Inukrad ni Bileg Aurelio ti kopia ti Anaraar bayat ti saan a panaggunay ti trapiko. Napaisem a nakakita iti dua a panid a posision ti Poro Ylocos Minerals and Oils Coalition maipapan iti crackdown dagiti pagminasan ken ti saan a panangipangag ti presidente iti apelada iti pannakalukat manen dagitoy.

Dakdakkel a kasta nga anunsio ti adda iti Poro Ylocos Times. Kasta met ti adda iti Cadaclan Standard. Dagitan dagiti napanan ti minilion a pundo ti koalision dagiti agminminas.

Naisagud dagiti mata ni Bileg Aurelio iti daniw ni manongna a Sadiri Melchor iti kaballabag a panid ti anunsioda. Saanna a maawatan a nalaing ngem kasla dandaniwen ni manongna ti kinababana nga agbibiag ta no koma nayanak iti nangato a pamilia, saan koma nga agrigrigat ita, a saanna koma a “yutang dagiti agsapa” ken saanna a “bulibolen dagiti sumangbay a gasat.”

Nasurok a maysa nga oras ti biaheda sakbay a nadanonda ti Distierro District ti siudad iti asideg ti pagserkan iti siudad manipud iti nalawa ken nataba a

Valle Central a nakaisaadan ti no mano a probinsia ti pagilian, ti nalawa a planada a daga a naipatengnga iti Poro Ylocos. Asidegen iti nagkitegan daytoy iti probinsia ti Banaoang. Adu ditoy dagiti motel, ken pagdidiskuan, beerhouse, ken para nightlife a pasdek. Ngem adda met dagiti naulimek a panganan (ken makakiki ti naganna) kas iti O’Kinnamet. Adda bakante a lote a pagtubtubuan dagiti tanglar ken ledda sa ti restauran a Napalet, Napigket.

Dua a kadsaaran ti O’Kinnamet. Pinadpadas met ti akinkukua a papintasen—nalawa ti parking lot ken namuyong ti aglawlaw. Adu dagiti garden set kadagiti sirok dagiti tsiko. Kawayan a set.

Pinugtuan ni Bileg Aurelio no ania kadagiti nakaparada a kotse ken SUV ti lugan ni Saniata Marionne. Mabasbasana idi sumagmamano a tawenen ti napalabas ti kinapintas dagiti balbalay a nabakir ti adienna; iti panid dagiti nalatak iti showbiz, masansan a maipablaak dagiti babbalay dagiti artista, dagiti swimming pool-da, dagiti gym, dagiti kosinada. Malagipna ti nakalawlawa a kosina da Saniata Marionne ken Sam Lucero; ta agduyos kano iti panagluto ni Sam.

Nalagipna met ti ladawan ni Saniata Marionne nga

Pampanunoten ni BA no ania nga anggulo ti ad-adda a mangidagel ken ni Carlos Rasos nga adda iti umuna-maikadua kadagiti survey dagiti presidentiables.

agpappapa iti kas kadakkel ti para Olimpiada a swimming pool iti arubayan ti balay.

Ken ti Ferrari a kiaw.

“Isun sa daydiay, manong,” kinuna ni Thor iti dimsaag a babai a naka-boots, naka-jeans iti nangisit ken adda atiddog a coat-na manipud iti dumaanen a nagkauna a modelo a Toyota Fortuner. “Awan drayberna?”

“Dimsaag met iti driver side.”

Napasennaay ni Bileg Aurelio. “Intan…” kinunana. “Impagarupko no agbatiak ditoy,” kinuna ni Thor. “Damdamom ti makakita iti personal iti nalatak nga adingko,” inyisem ni Bileg Aurelio. “Umaykan ta yamammoka.”

Immunan ni Saniata Marionne iti uneg ti restauran. Awan customer. Pinilina ti maysa kadagiti semi-booth. Indissona ti Clavin Klein a handbag-na sa nagtugaw. Nag-text ken ni Bileg Aurelio.

Addaakon ditoy uneg ti O’Kinnamet. Sumarunokamin. Sumarunokamin? Asino ti kaduana? Ni Arriztia? Napatangwa ni Saniata Marionne iti isusungad ti dua a lallaki. Pamakeden ti laklakay. Naguapo iti dadakkel a matana, kulot ken addaanen sumagmamano nga uban a buokna, natadul ti pispisna ken naka-long-sleeves iti bugagaw. Panayagen. Ni manongna a Bileg Aurelio.

Ngem ti maysa ti nangtalangkaw iti puso ni Saniata Marionne, ti kadua ni manongna. Kulisapsap a pukis, apagapaman a barbas, ken sumarsari manipud iti manggas ti ngumisit a T-shirt-na dagiti maselna. Panayagen met.

Sakbay a makatakder, tinarayen nga inapungol ni Bileg Aurelio.

“Sanny!”

Sanny ti awagda kenkuana sadiay Cacaldingan. “Manongko!”

Inibbatan ni Bileg Aurelio ni Saniata Marionne. Minatmatanna ti rupa daytoy. “Dagiti annakmo?”

“Nabatida iti maymaysan a kadkaduak,” kinuna ni Saniata Marionne idinto a kinitana ni Thor a nakaisem kenkuana.

“Wen aya, nagdakesen ti ugalik… ti imbilangkon a kabsat, ni Thor,” insungo ni Bileg Aurelio ti baro iti likudanna. “Badigard, mensahero, drayber, mekaniko, agiduldulin kadagiti palimedko.” Nagkatawa.

“Sigurado ngarud met nga idulinna dagti palimedko,” inyisem ni Saniata Marionne. Dinakulapna ti baro.

“La ketdi, ma’am.” Mababain nga immisem ni Thor. “Adingenka ti ammok, isu a manang or Marionne lattan.” Narikna ni Saniata Marionne ti kinadakkel dagiti dakulap a nangakub iti bassit ken nalamuyot a dakulapna. Pangersangen. Saanna a naaluadan a di pinerreng ti baro a maraisem met a nagtung-ed ken agrimrimat dagiti matana.

Saan nga ammo ni Thor ti riknana apaman a naginnibbetda iti dakulap ken ni Saniata Marionne. Saan a gapu iti natural a kinapintas ti balasang, saan a gapu iti dayaw a mariknana a mayasideg iti artista. Manon a pelikula ni Saniata Marionne ti nabuyana ngem saan a nakarikna ti panagduyos iti daytoy a kas iti mariknana kadagiti nagbalin a cover ti Anaraar