Dagiti Pagannurotan ti Salip iti Sarita ti Maika-24 nga AMMA Foundation Literary Awards

Agawaten ti Secretariat ti AMMA Foundation Literary Awards (AMMAFLA) kadagiti entry a para iti Salip iti Sarita ti Maika-24 nga AMMAFLA. Aggibus ti salip iti Septiembre 30, 2022.

Nairanta ti pasalip ti AMMAFLA kadagiti agdadamo a mannurat iti Ilokano a “kas pangaron iti reggetda a mangpatadem pay iti plumada.”

Kas kadagiti sarita a nangabaken iti pasalip ti AMMAFLA, mairamanto met a mailibro dagiti sarita a mangabak iti daytoy nga edision ti AMMAFLA, kas kinuna dagiti mangimaton iti AMMAFLA a da Amado ken Gloria Yoro, ken Francisco ken Aurora Ponce (agpapada nga agindegen iti Hawaii).

Inruar ti AMMAFLA ti librona a Dagiti Premiado a Sarita (1997-2014) iti kombension ti GUMIL Filipinas, ti gunglo dagiti mannurat nga Ilokano iti Filipinas ken iti ballasiw-taaw, idi 2015. Naipalaon iti nasao nga antolohia dagiti nangabak a sarita iti AMMAFLA sipud narugian ti salip idi 1997 agingga iti 2014.

Dagiti pagannurotan ti maika-24 nga edision ti salip.

1. Aggibus ti salip iti Septiembre 30, 2022.

2. Agpaay laeng ti salip kadagiti agdadamo a mannurat iti Ilokano.

Iti daytoy a salip, maibilang nga agdadamo ti mannurat no awan pay ti naipablaak a saritana iti Bannawag. No adda man, di koma nasursurok ngem tallo ti naipablaakna agingga iti Disiembre 16-31, 2021 a bilang ti nasao a magasin.

3. Siwawayawaya ti autor a mangpili iti topiko ti isalipna a sarita.

4. Agatiddog ti isalip a sarita iti 10-15 a panid iti Letter size (8.5” x 11”), Times New Roman, Font Size 12, Medium, iti doble espasio (2.0), addaan iti Normal a margin, ken iti MS Word format.

5. Maysa laeng a sarita ti mabalin nga isalip ti tunggal autor.

6. Nasken nga orihinal, di pay naipablaak wenno naadaw iti ania man a sinurat ti isalip. Nasken met a saan a naipatarus ti pakisalip manipud iti sabali a lengguahe ken nasken a bukod a putar ti autor ti pakisalipna. Saan met a maawat ti sarita a naisalip idin iti AMMAFLA wenno iti sabsabali pay a salip iti panagsurat iti sarita ken ti sarita a naidatag pay a kas entry iti sabali pay a salip iti panawen a pannakaangay daytoy a pasalip ti AMMAFLA nga aggibus iti Septiembre 30, 2022.

7. Paulo ti sarita laeng ti ilanad; saan nga agusar iti pudno wenno parbo a nagan a pakaam-ammuan a kas autor. Ipatulod ti pakisalip babaen ti email. Mangipatulod met iti pakasaritaan ti autor iti sabali a file. Ilanad iti nasao a file dagitoy: paulo ti pakisalip, nagan, kaudian a ladawan, ababa a pakasaritaan ti biag, adres ti agdama a pagnaedan, ken numero ti selpon.

8. Ipatulod ti pakisalip agraman ti pakasaritaan ti autor (bionote) iti daytoy nga email address: ammafla2019@gmail.com. Iti Subject ti email, ilanad daytoy: ENTRY ITI AMMAFLA 2022. Saan a mairaman iti salip ti entry a maawat kalpasan ti Septiembre 30, 2022.

9. Dagiti gunggona: Umuna a Gunggona, P10,000.00; Maikadua, P8,500.00; ken Maikatlo, P7,000.00. Maipaayan pay dagiti mangabak iti sertipiko ti pammadayaw. Adda met karbengan dagiti hurado a mangkissay iti bilang dagiti mangabak no awan ti makapatar iti bukodda a pagbatayan dagiti mangabak. Mabalin met a mangparnuayda iti sabali wenno nayon a gunggona, no kasapulan, a kas iti naaramid iti Maika-23 nga AMMAFLA.

10. Mapakaammuanto dagiti mangabak no kaano ken sadino ti pakapadayawanda. No met matakuatan a sinalungasing ti mangabak ti ania man kadagiti Pagannurotan Blng. 2 ken Blng. 6, maibabawi ti premiona ken mapawilanton a makisalip iti ania man a pasalip ti AMMA Foundation Literary Awards.