Okeyka, Apong

ITULTULOYTAYO man a sirigen dagiti pagteng wenno maar-aramid iti lubong a mamagbaliw iti wagas ti panagbiagtayo:

Sangalubongan a Pakaseknan. Saanen a maysa a pagilian laeng ti maseknan iti maysa a banag. Ti panagpaut ti tao iti daytoy a lubong, masapul ti sangalubongan a solusion. Ti karit iti daytoy a maika-21 a siglo, isu ti panangsaranget ti amin a tattao iti sangapada a gasat iti daytoy nailet ken nagulo a planeta. Daytoy panagbara ti lubong, awan ti bigbigenna a beddeng ti politika.

Ti Yaadu Dagiti Nones. Wenno none. Awan. Isuda dagiti tattao a mangibagbaga nga awanan iti relihion. Umadadu dagiti tattao a mangilaksid iti bagida iti organisado a relihion, maysa a kita ti wayawaya tapno mariknada nga ad-adda a mayasidegda ken ni Apo Dios, tapno mayadayoda kadagiti eskandalo ti simbaan, ken kadagiti relihion a ti panggepda laeng ket gumanar iti kuarta. Kaaduanna kadagitoy ti saan met a mangtallikud ken ni Apo Dios. Tallikudanda dagiti orgasanido a religion gapu iti kinaestrikto ken kinadogmatiko wenno saan a mabalusingsing a pammati. Adda ketdi panagadal, kas pagarigan iti Amerika, a 40 porsiento kadagitoy ti relihioso, ken kaaduanna ti mangnamnama a masapulandanto met laeng ti umno a relihion.

Ti Agbiag nga Agbukbukod ti Baro nga Uso. Mayus-uso iti entero a lubong ti agbiag a solitario wenno agbukbukod. Daytoy ti dakkel a panagbalbaliw iti kagimongan a saan a nadnadlaw. Umad-adu dagiti agbibiag nga agbukbukod kadagiti pagilian a Sweden (47%), Britania (37%) sa sumarsaruno dagiti pagilian a Japan, Italia, US, Canada, Russia, South Africa, Kenya, ken Brazil (10%). Ti agbiag nga agbukbukod, makatulong tapno matun-oyan ti maysa a tao ti sagrado a moderno a tagipatgen—indibidual a wayawaya, pannakakontrol iti bukod a bagi, ken pannakatun-oy iti kabukbukodan a pagragsakan. Adda ketdi ballaag dagiti psychiatrist a ti yaadu dagiti agbukbukod, agturong iti nakarkaro pay a pannakasayyasayya ti kagimongan, a delikado met iti salun-at ken kinaragsak it maysa a tao, ken iti bumaybayag, iti komunidad ken iti pagilian.

Ti Panaggibus ti Customer Service. Gapu iti teknolohia ti self-service, saanton a kasapulan ti maysa a klerk. Tiempo itan ti self-service—mabalin a sika lattan ti mangikarga iti gas iti luganmo (awanen ti gasoline boy), makapagdepositoka iti kuarta iti banko babaen ti makina, ken uray iti pannanganmo iti restauran. No sumrekka iti pagadalan wenno trabaho, i-swipe-mo laeng ti naisangrat kenka nga ID. Naruay dagiti credit card, ken nagadu dagiti coupon, amin dagitoy, ramit ti self-service.—O