Umaykan, Tugawamon ti Beggang

ay, umaykan ta itunota ti kakkali a bagas ti umbi ket paglanglanganta iti dulang ti alimbasagen a gargari...

bay-am, dimo panunoten ti panagraut idiay bessang ti industrialisado a lubong: tukmaam ketdi ti insalikadko a pinadis ti rag-o ket silmutanta ti nagkaruotan nagungap a daga tapno ti ulo-ulo ti danum iti naibuang a puttot ti iliw layusen ken pagtig-abenna ti mail-iliwan iti ubbog a nakaparsuaan: umaykan, tiliwentan ti sansilmo ti langit!

bay-am, dimo italtalek dagidiay agsisinnungbat a gurruod ti panungpalan iti kangitingitan ti aligagaw: badangannak ketdi a mangyaon iti babato ti raas dimo pengdan ti anikki; a katawaan ti sintonado nga arasaas tulongannak ketdi a mangkali iti aripit iti sellang ti turod ilayonta a karamkamen ken limpiaen ti kabingkolan a bangkag rebbaenta ti kapanagan ket kellekellengenta a pagaraduanto tapno mulaanta iti supusop-anges: ay, paglay-asek iti ubbog ti karayan; ken agpadanumak iti aglaplapusanan a diro ni ayat!

bay-am, dimo imdengan ikkis ti ngatangata: adda bukodta a lubong a paggargarawanta a siwayawaya—umayka ta taoganta ti buyuboy ti ganas iti basi ti panawen a naparekan iti ayat ken imnas: simsimanta, nanamenta ti ingel ket bay-anta a mabartekta iti sakaanan ti temtem a sinungrodanta iti anek-ek ti sardam ken anasaas ti parbangon makasaligemgem ti apros ti linnaaw: ngem, ay, umaykan, ala, sika— wen, sika a mutia ti apagsipasip: ket tugawamon ti agrisrissik a beggang iti pus-ong ti agpatnag.