Idi Un-unana a Panawen: Ti Lakay ken ti Kabalio
Ni SOLOMON V. GERNACIO
IDI un-unana a panawen, adda lakay a nagmula iti niog. Kalpasan ti sumagmamano a tawen, nadanonen ti panagburasna kadagiti bunga ti mulana. Iti dayta a bigat, idi makaburasen iti kabaelan ti kabaliona a kargaen, kinunana: “Masapul a makadanonak daras idiay ili. No saan, diakton mailako dagitoy ta nakagatangton dagiti tattao iti kasapulanda a niog. Maysa pay, inton lawasna manen ti sumaruno a tienda. Isu a sika, Kabalio, pardasam ti magna!”
Kinuna met ni Kabalio: “Ad-adda a maibayagta iti dalan, Ama Lakay, no pardasak ti magna! Isu a nasaysayaat no agin-inayadta laeng. Nasapanto pay laeng no makadanonta.”
“Ania? Naparpardasta a makadanon idiay ili no imaymayyetmo ti magna? Nakakaskasdaaw man!” inkatawa ti lakay. “Ala, pardasam ketdi! Diak kayat ti agsadutsadut!”
Ket inablatan ti lakay ni Kabalio.
Nagtaray met ni Kabalio iti kigtotna ket nagiinnuna a natnag dagiti naikarga a bunga ti niog iti bukotna. Sinaggaysa ti lakay a pinidut dagiti niog sa insublina nga inkarga dagitoy iti bukot ni Kabalio. Kalpasanna, inablatanna manen ni Kabalio. “Pardasam tapno daras makadanonta idiay ili!”
Manen, natnag amin dagiti kargana a bunga ti niog. Pinidut manen ti lakay dagiti bunga ket inkargana manen iti bukot ni Kabalio. Sa inablatanna manen ni Kabalio. Dandanin tengnga ti rabii idi makadanonda idiay ili. Nabayagen nga awan tao iti tiendaan ket naimasen ti turog dagiti tattao. Napalalo a wingiwing ni Kabalio a nangtaliaw iti amona a mangkudkudkod iti ulona.—O
Contents
tl
2022-05-16T07:00:00.0000000Z
2022-05-16T07:00:00.0000000Z
https://manilabulletin.pressreader.com/article/282110640201941
Manila Bulletin Publishing Corp