Taraken: Ania ti Sakit ni Mocho?

TUNGGAL sumangpetak ditoy balaymi nga aggapu iti pagtrabahuak, sumabat latta a sumabat dagiti lima nga asok. Kasta unay a lagtolagtoda. Agkalkalawikiw ti ipusda ken agpaubbada. No ubbaek ti maysa kadakuada, agimon dagiti uppat. Tapno awan ti agimon kadakuada, aprosak ida sa bulondanton ti agtartaray a sumrek iti balaymi.

Iti maysa a malem a panagawidko manipud iti pagadalan a pangisursuruak, kas gagangay, adda manen dagiti asok iti ruanganmi. Nasdaawak ta awan ni Mocho. Idi pukkawak, adda isuna iti berandami. Nagkalawikiw ken nagpaubba met. Kabigatanna, dinak intulod ni Mocho agingga iti ruanganmi. Dati, umaynak itulod no innakon iti pagtrabahuak.

Iti malem a panagawidko, kaskasdi a saan a simmabat ni Mocho iti ruanganmi, banag a nakaikawaak. Idi sumrekak iti balaymi, nagkalawikiw laeng daytoy. Sa idi kuan, napan manen iti iddana. Nagatapak a masakit ni Mocho. Dagus nga inubbak. Inaprosak ti agongna. Namaga daytoy. Sa kasla pumurpuraw dagiti matana. Ammokon nga adda anannayenna. Nagdanagak.

Iti kabigatanna, dagus nga intaraymi ni Mocho iti beterinario sadiay Laoag. Dagus a tinaming ti doktor (ni Dr. Elaine Cadiz). Inalaanna iti dara ni Mocho tapno maCBC (Complete Blood Count). Ditoy a naduktalanda a nababa ti platelets-na. Anemia, kunada pay.

Inamadko no ania ti posible a nakaalaanna. Kinuna ti doktora a posible nga adda kimmagat a blood parasite ken ni Mocho. Inikkanda ngarud iti antibiotiko ken bitamina nga addaan iti iron. Ken inikkanda iti agas a para kadagiti matana a pumurpuraw.

Kalpasan ti dua nga aldaw, nagsublin ti kinaregta ni Mocho. Sabtennak manen a minalem. Aglagtolagto kada agpaubba. Ken saanen a namaga ti agongna.—O

(Kameng ti autor iti Batac City Dog Enthusiast, grupo dagiti agtartaraken iti aso iti Siudad ti Batac.)