Tips

LANA TI NIOG A KAS SHOE POLISH.

Napintas met ti lana ti niog a kas pangpasileng ken kas “taraon” dagiti lalat a sapatos, ken uray pay ania nga aruaten a naaramid manipud iti lalat. Isapsapo ti lana ti niog iti lalat babaen ti nadalus ken di narusanger a rigis sa bay-an iti sumagmamano a minuto sa punasan met laeng iti sabali a nadalus ken di narusanger a rigis. Kastoy met laeng ti aramiden kadagiti tabla a muebles. (Ladawan: www.unlockfood.ca)

NO MALMALMES TI TAO.

Kaaduanna a tattao, no di man isu amin, aglagaw no malmalmes daytoy. Daytoy ti gapuna a gagangay met nga agbunga iti trahedia para iti asino man a tumulong a mangalaw iti daytoy (malaksid no nasanay daytoy iti kastoy a pasamak) ta ti tao a malmalmes, kayetketanna ti tao a tumulong kenkuana ket agpapada la ket ngarud a malmes. Maibalbalakad nga idinto nga asitgan unay ti tao a malmalmes, mangyasideg ketdi iti mabalin a pagkaptan daytoy kas koma iti sanga ti kayo wenno ania pay a banag a mabalinna a gammatan bayat met ti panangpakpakalma iti daytoy. Isu a nasayaat met unay a sakbay a mapan iti pagdigosan, saan a dakes nga isaganaan ti ania man a di mapakpakadaan a pasamak. Mangitugot iti ania man a mabalin a pangisalakan iti tao a malmalmes, kas koma iti atiddog a tali nga adda salbabidana a mabalin nga ipuruak iti tao a malmalmes. Mabalin pay ti atiddog a kayo nga ipagaw-at iti malmalmes. (Ladawan: redcross. org)

DAYTOY PANAGDARDARAS.

Adu a biddut ti mapaspasamak gapu iti panagdardaras—wenno gapu ta ditay kayat ti maladaw iti papanantayo. Nangruna la ngaruden no kas itay kunadan a “kamkamaten ti oras.” Adu nga aksidente ti mapaspasamak, wenno panagririri iti kalsada gapu ta amin a tao, arigna “kamkamatenda ti oras.” Ngem no maysaka kadakuada nga agdardaras, nasayaat no umangeska iti nauneg ket panunotem daytoy: dayta sumagmamano laeng a minuto a pannakaladawmo iti papanam, mabalin a maisalakanna ti biagmo. (Ladawan: wreckedexotics. com)