Manila Bulletin

Littugaw

Ronel P. Pagibitan

Agalikuno ti angin iti indurog ti kangitingitan ti kalgaw Maikayab dagiti pakapak, tumatayab mabugiaw Ti sirnaat in-inut a lingdan ti lidem

Agingga nga alun-onen ti umappayaw a lulem Dagiti mairidep maangsan a tapok, mataltalimpungaw.

Agkikinnamat dagiti dapan Alikumkomen ti dakulap dagiti takiag Pakaiwaknaran bumalbalitok a dawa Di iginggina ti kettang dagiti sibet Maikanawa laeng ti naindaklan a nagbannogan.

Maburak ti langeb, addaytan ti bayakabak Sumpok dagiti pimpiman a nabiag a mabuak Agindurog ti tudo, maslep dagiti bingkol Agayus ket mayalinuno dagiti gabat a makulkol Kadagiti aripit ken waig a mangruyag.

In-inut nga aglunit dagiti agsungsung-ab a rengngat Agruar dagiti mawaw a bisukol, leddeg ken bildat Agdallang dagiti tukak ken batbat-og Kadagiti madanuman a lubnak ken lipnok Das-al ti bara ken lamiis nga agsabat.

--RONEL P. PAGIBITAN

Contents

tl

2022-05-16T07:00:00.0000000Z

2022-05-16T07:00:00.0000000Z

https://manilabulletin.pressreader.com/article/282170769744085

Manila Bulletin Publishing Corp