Manila Bulletin

Dear Ikit

Ni EDEN L. CACHOLA-BULONG

Dear Ikit,

Napetisionankami a lima nga agkakabsat ditoy Amerika, nasuroken a 50 a tawen ti napalabas. NagUS citizen-kami a dagus idi aglima a tawenmin ditoy Amerika malaksid ti buridekmi a babai. Sinulitna ti nagisagana kadagiti papeles a masapul tapno maaprobaran nga ag-US citizen. Napanuynoyan gapu iti kinaburidekna. No saanna a kayat ti agtrabaho, sumardeng lattan ket pamrayanna lattan ti dumawdawat iti gastuenna kadagiti nagannak kadakami.

Idi pimmusay daydi papang ken nayalis ti pensionna iti daydi mamang, nagdesisionkami a dita laengen Filipinas ti pagnaedan ni mamang ta adadu ti kakabagianmi a mangaywan kenkuana ngem ti ipanmi idiay carehome wenno pagtaraknan dagiti babbaket ken lallakay ditoy Amerika. Simmurot ‘toy buridek a kabsatmi ta isu kano laengen ti agaywan. Pinanawanna dagitoy dua nga annakna kaniak ta pinanawan ti nalaing nga asawana.

Nagbiag a sinanam-ay dita Filipinas ‘toy buridekmi gapu iti pension ni mamang ta dakkel ngarud ti pakaisukatan ti doliar a pensionna agingga ti pimmusay iti tawenna a 98. Innalami ditoy Amerika ti bangkay ni mamang tapno agdennada met la iti daydi papang. Saanen a nakasurot ‘toy buridekmi ta naglabes ti kaaddana dita Filipinas ket saan met ngarud nga American citizen.

Apaman a naidulinmi ni mamang, agsasarunon ti awag kadakami nga uppat nga agkakabsat ditoy Amerika gapu iti kaadu ti utang ‘toy kabsatmi iti nadumaduma a kakaarruba dita Filipinas. Binayadanmi dagita nga utang uray ammomi a gapu ti kinabarayuboyna ti nakaut-utanganna.

Manmano nga ipawpaw-itanmi ti kuartana ta nalawa met dagiti talonmi a pangalaanna iti pagbiagna agingga a nadamagmi a naisalda ken nailakona kanon dagiti dadduma a taltalon. Naidarum kano payen gapu iti utang ket amangan no maibalud no saan a makabayad. Nagdesisionkamin nga agkakabsat ditoy Amerika a saanmin a tulongan barbareng agnakem. Umno kadi daytoy nga aramidenmi, ikit?—Leodevilla

Kaanakan Leodevilla,

Saan laeng a dakdakayo nga agkakabsat ti akimproblema iti kas iti naisalaysaymo. Ngem ti man makunak ket kasla dakayo nga agsapsapul iti ballasiwtaaw ti mangkonkonsintir iti kinasadut ken kinagastador ti napanawanyo.

Saan a dakes ti tumulong; grasia ti Dios ti agsubli kenka no tulongam dagiti nakakaasi nga awanen ti kabaelanda nga agsapul ti pagbiagda ken pagadalem dagiti nagaget ken masisirib nga ubbing a kayatda ti makatun-oy ti nasaysayaat a panagbiag.

Basolmo met ken ni Apo no taraknem ken pakpakanem laeng dagiti sadut ken agdawdawat laeng ti obrada.

Nagbayadkayo idin kadagiti immuna a nakautanganna. Saanna a sinaluadan dagiti sanikuayo, inlako ken insaldana, adu pay la ti nakaut-utanganna. Pinautanganda ken pautangandanto manen ta ammo dagiti agpapautang a bayadanyonto met laeng.

Sapay koma ta agnakemen no saanyon a kayat a bayadan dagita nakautanganna. Ibilinyo kadagiti talkenyo dayta a pangngeddengyo tapno saandan a papautangan. Bagbagaanyo nga agsapul iti panggedanna tapno adda pagbiagna. Ikkanyo iti leksion tapno agnakem.

No agtawenen iti disiotso dagita annakna nga aywanmo, mabalindan a petisionan ni inada nga umay manen iti dennayo.—Ikitmo

Contents

tl

2022-05-16T07:00:00.0000000Z

2022-05-16T07:00:00.0000000Z

https://manilabulletin.pressreader.com/article/282175064711381

Manila Bulletin Publishing Corp