Ading Kosinera

ITULTULOYTAYO man nga iburay dagiti taraon nga isingsingasing ti Food and Nutrition Research Institute (FNRI) a nasayaat nga idasartayo a para kadagiti kameng ti pamiliatayo. Nairaman daytoy a potahe nga iburaymi ita kadagiti nailanad iti 2022 Menu Guide Calendar ti FNRI iti panggepna a tumulong a mangipaay iti nasustansia a taraon kadagiti umili.

Dagiti Kasapulan:

3 bukel nga itlog, nabatil 2 kutsarita nga asin, iodized 1/8 kutsarita a pimienta, nadekdek 1 kutsara a lasona, nagalip 1 kutsara a bawang, nagalip iti babassit 1 1/4 tasa a karne ti manok (chicken breast), nagiling 2 tasa a karabasa, nagalip iti babassit 3 tasa a rangaw ti kamotig, naputedputed iti babassit 1/2 tasa, all-purpose flour

½ tasa a manteka

Panangisagana:

1. Mangala iti malukong. Paglalaoken a nasayaat ti itlog, asin, pimienta, lasona, bawang, karne ti manok, karabasa, rangaw ti kamotig, agraman ti arina.

2. Pagkasangapuluen ti mixture. Agarup ½ a tasa wenno 90 gramo ti kada disso. Kalpasanna, pormaen a patties.

3. Ipaburek ti manteka. Prituen ti patties iti pito a minuto wenno agingga nga ag-golden brown. Palagip: Nabaknang ti rangaw ti kamotig iti bitamina C a kasapulan ti bagi.

Kasta met a laglagipentayo koma dagiti nayon a balakad ti FNRI kangrunaanna ti pannakasaluad dagiti taraontayo iti daytoy a “new normal.” Kadawyan a saan a mayakar wenno maiwaras ti bayrus babaen dagiti taraon. Maiwaras dagitoy babaen dagiti tattao nga agwarangwarang, nangruna dagiti addaan panateng wenno uyek. Ngarud, mabalin a suroten dagitoy sumagmamano a balakad:

1. Gumatang kadagiti asideg a paggatangan. Amang a basbassit ti tao kadagitoy a lugar. Kasta met nga ipakat latta ti “social distancing.” Saantayo nga agsigsigurado gapu ta awanen ti maireport a kaso. Mabalin nga adda laeng ti bayrus iti aglawlaw.

2. Ilista a kanayon dagiti gatangen. Urnosen dagitoy manipud kadagiti alisto a maperdi ken saan. Makainut pay iti oras no kastoy ti aramiden.

3. Umuna a gatangen dagiti di nalaka a maperdi a kas kadagiti delata, pasta, bagas, ken dadduma pay.

4. Ipakadawyan a basaen ti label dagiti gatangen a naproseso a taraon. Basaen ti nutrition information, no ania ti maitedna a sustansia kadagiti miembro ti pamilia. Kitaen met ti expiry date ken siguraduen nga awan ti pagilasinan nga adda dadaelna.

5. Liklikan ti kanayon a mapan iti groseria, store, wenno tiendaan. Babaen daytoy a wagas, basbassit ti gundaway a kaptennaka ti bayrus.—O

“You could not afford his price, I know.” Nagkatawa met ni Bileg Aurelio. “Test him, Satan once tested Jesus Christ.”

Pampanunoten ni Thor no makibulon iti ayus. Ipasablogna kadi met ken ni Marionne a mabalinna met nga iregalo, libre, gratis ti bagina iti balasang? Nga uray pay itan, mabalinna nga aramiden dayta? Ngem namrayanna ti immisem.

Nagulimekda. Ammo ni Thor nga agsinsinniim dagiti agkabsat. Rumbeng kadi a maammuanna no siasino ti ama ti inauna ni Saniata Marionne? Dagiti palimed ti balasang. Ngem ita pay ta na-love at first sight (personal sight siguro ta nabayagen a mabuybuyana ni Saniata Marionne iti pelikula ken telebision), saanto ngata a masaktan?

“Masapul a masakak ti balayko, manong,” imbettak ni Saniata Marionne iti ulimekda a mangmangan.

“Uhum, nalaka laeng dayta,” insungbat ni Bileg Aurelio.

“Ken nasken nga adda koma metten pagpuonak iti negosio.” Tinudokna ti puraw a carrot sa kinittabanna a siaalikaka.

“Ti kidkiddawek a sukatna?”

Kinita ni Saniata Marionne ni Thor. “Okey laeng, Thor?”

“Okey, laeng isuna, sullatakto ti lapayagna,” kinuna ni Bileg Aurelio.

“Ni Carlos Rasos ti ama ni Imnas Dianne, manong,” kinuna ni Saniata Marionne kalpasan ti napaut a sennaayna.

“Uhum, kunakto pay,” insungbat ni Bileg Aurelio idinto a napanganga ni Thor. Naisardeng ti baro ti panagngalngalna ket inibbatanna ti kutsarana. “Apay a saanna nga indiaya ti kasar kenka?” “Nagbuteng, manong,” kinuna ni Saniata Marionne a sililiday. “Binaliwan ti apongna a pasado presidente ti last will and testament daytoy a mapan kenkuana ti Asucarera del Rasos, ti Hacienda Rasos, ken ti Rasos Copra, Inc., ken dagiti plantasionda iti kape, cacao ken saba.”

“Ti sustento ti ubing?”

“Saanak a dimmawat. Ammok nga adda konsiensiana.” Nagkiak ti boses ni Saniata Marionne. “Ngem adda kadi met laeng konsiensiana?” “Namimpinsan a naglikudannak. Ngem saanak a nagringgor.” Nagsangiten ni Saniata Marionne. “K-kabaelak a biagen ti anakko.” Nagsaibbek.

Lininteg ni Thor ti bagina ket inuyosna ti paniona sa pinanggepna nga idepdep iti pingping ti balasang ngem innala ni Saniata Marionne ti panio. “Thanks… Ita laeng nga agluaak manen,” impasikigna. Naguyek.

“Sorry, mabalinko ti mapan iti lugan, manong… Marionne?” kinuna ni Thor. Maasian ti ikikitana iti balasang.

Nagtung-ed dagiti agkabsat.

“Isaganam ti bagim, ipakdaarko kenkan ita ta nasapa pay,” kinuna ni Bileg Aurelio idi makapanaw ni Thor. “Kutkotenda amin a napalabas ni Caloy ita no ituloyna ti ambisionna.”

Dispensarennak, Marionne, nakuna ni Bileg Aurelio iti unegna. Naasian iti kabsatna ngem rumbeng nga aramidenna daytoy. Pampanunotenna no ania nga anggulo ti ad-adda a mangidagel ken ni Carlos Rasos nga adda iti umuna-maikadua kadagiti survey dagiti presidentiables. (Maituloyto)