PINILI, ILOCOS NORTE.

Para ken ni Lila Dominga Rambaud-Rayrao, kastoy ti agkintos wenno agpardo iti naluto a tabako a Birhinia. Pagtitiponenna dagiti napintas ti pannakalutona (bumalitok wenno natangken nga amarilio) ken agkakarukod nga aw-awagan dagiti komersiante iti first class. Mailasin met dagitay ngimmisit wenno maris-daga nga ibagbagada a reject ngem malako latta ngem iti nababbaba laeng a presio. Maysa ni Lila Inggay (kas awagna kadagiti kasingedna) kadagiti eksperto iti panagridon iti naluto a tabako iti barangayda a Puritac. Inkakaubinganna daytoy. Maysa ita a makitangtangdan kadagiti kakaarrubana nga aglutluto pay laeng iti tabako. Alisto ken napartak ti panagurnosna. Malasinna payen no first class wenno reject ti parparduenna ta ammonan ti angot daytoy (nabangbanglo kano ti first class). Maysa ti tabako kadagiti kangrunaan nga imulmula dagiti agindeg iti daytoy a lugar nupay mabilbilangen dagiti makaanus iti kastoy a pamastrekan. (AILEEN R. RAMBAUD)