Manila Bulletin

Ti Gasatmo

Ni MADAM CHARISMA

TAURUS (Abril 21- Mayo 20). Ikeddengmo itan no ania ti kalkalikagumam iti biag. Ituloymo nga ipamatmat a dakkel a banag ti magunod babaen ti panangusar kadagiti talugading ken saguday a naidumduma. Pudno a naragsak ti agtalinaed iti sidong ni patpatgen. Nagasat a numero: 1, 4, 8.

GEMINI (Mayo 21- Hunio 20). Maaddaan iti pannakapnek. Agtultuloy ketdi latta ti panagdaliasat. Maamiris nga adayo iti peggad no kalikaguman laeng ti gagangay. Kabaelan ketdi a mapagbalin dagitoy a naisangsangayan segun iti panangbaliw iti panangmatmat iti aglawlaw. Nagasat a numero: 3, 5, 7.

CANCER (Hunio 21- Hulio 20). Nagasat ti makatun-oy a nasapa iti patien a makaipaay iti pannakapnek. Umno ketdi latta met a tingitingen dagiti bambanag a mainaig kenka. Kinapudnona, atiddog ti biag nangruna no dimo ruam ti mangsayang kadagiti kanito. Nagasat a numero: 1, 6, 8.

LEO (Hulio 21- Agosto 20). Pudno a nasam-it met ti maikadua a gundaway—uray no iti sabali a disso wenno tiempo wenno tao. Tunggal pannakinaig, adda latta masursurom. Iti pakadagupanna, manamnama nga ad-adu dagiti naimbag a banag a sumangbay kenka ita. Nagasat a numero: 2, 4, 9.

VIRGO (Agosto 21- Septiembre 22). Pudno a dagiti mata ti sarming ti kararua. Ibaga pay dagitoy ti pudno a kasasaad ken marikrikna. Denggen ti italtalukatikda. Masapul a napudno iti bukod a bagi tapno ti aglawlaw, umno ti maipaayna kenka. Nagasat a numero: 3, 5, 7.

LIBRA (Septiembre 23- Oktubre 22). Addaanka kadagiti saguday a maaramatmo para iti bukodmo a pakaitan-okan. Pagsayaatanna, agbibiagka iti aglawlaw nga addaan kadagiti mangnamnama kenka. Naimbag no mabigbigmo dagiti makatulong kenka tapno maaramatmo dagiti nasao a talugading. Nagasat a numero: 2, 4, 8.

SCORPIO (Oktubre 23- Nobiembre 22). Mabalin a kadagiti kallabes, kasla anniniwanka a saan a nadnadlaw. Tiempo ti panangipamatmat iti kaaaddam wenno iti kinapategmo. Nupay kas kunada, napateg ti angin ngem saan a makitkita, madlaw laeng. Nagasat a numero: 1, 5, 9.

SAGITTARIUS (Nobiembre 23Disiembre 20). Ti pannakapnekmo iti sidong ni patpatgen ti burayok ti kinaragsakmo. Ita, tiempo met a maduktalam no kasano a dagiti bambanag manipud iti kaunggam, mangpunno kenka, ken makaipaay iti pagimbagan ti sabali. Nagasat a numero: 3, 4, 7.

CAPRICORN (Disiembre 21- Enero 19). Kitaen ti naimbag a naipaaymo iti sabali imbes a ti madi a naipaayda kenka. Nupay kasta, nasayaat no kabaelam a mapengdan dagiti madi a maipalay kenka. Ammuen no kasano nga ibaga ti “saan” iti wagas a saan a makasair. Nagasat a numero: 2, 6, 8.

AQUARIUS (Enero 20- Pebrero 19). Umno ti pangngeddeng nga awaten no ania ti adda a kasasaad. Pudno nga awan ti paggibusan ti panagaramid iti kinaimbag. Pagangayanna, amin a bambanag maipaay kenka, agbalin met a naimbag iti imatang dagiti mairanud iti kinaimbagmo. Nagasat a numero: 3, 4, 9.

PISCES (Pebrero 20- Marso 20). Adda pannakapnek iti sidong ti pagtaengan. Ta nadarisay ti rikna ti tunggal maysa. Maantisipar dagiti mabalin a makaipaay iti pannakasair isu a dagus a marisut. Namaris ti aglawlaw uray iti tiempo ti rituer. Nagasat a numero: 2, 5, 7.

ARIES (Marso 21- Abril 20). Naimbag ti panangikeddeng a tallikudan ti kaaduan a paset ti biag a yan dagiti riro ken di maikanatad a banag. Ngem addaan met dagitoy iti nasayaat a leksion a mausar iti masakbayan. Nasaysayaat ti agbiag no ti panangkitam iti aglawlaw, narimat a saan ket a dagiti kinalidemna ti pangiturongam iti imatangmo. Nagasat a numero: 1, 4, 8.

Contents

tl

2022-05-16T07:00:00.0000000Z

2022-05-16T07:00:00.0000000Z

https://manilabulletin.pressreader.com/article/282291028828373

Manila Bulletin Publishing Corp