Apay a Nagsangit ni Kylie?

AD-ADDA a rimmaba ti atap a nagsinan da Jake Cuenca ken Kylie Verzosa gapu iti panagsangit ti naud-udi iti programa nga “It’s Showtime” gapu iti saritaan maipapan iti pannakisina.

Idi maludsod isuna, saannan a napengdan ti naglua. Inarakup laengen da Vice Ganda, Ruffa Gutierrez, ken Chie Filomeno.

Kuna ketdi ni Kylie a na-touch daytoy kadagiti imbaga dagiti host.

Ngem saanen a naatipa pay dagiti atap a posible a nagsinan da Kylie ken Jake nga agayan-ayat iti agarup tallo a tawen.

Adda atap a nakaro a panagimon ti posible a nagsinaan dagitoy. Mabalin a saanen a nakaanus ni Jake iti nakaro a kinamanagimon ni Kylie.

* * * Dinayaw ni JC Santos ni Zanjoe Marudo a kaduada ken Bela Padilla iti pelikula a “366.” Kunana a nakalalaing ni Zanjoe iti nasao a pelikula.

Innayon ni JC a maayatan ta ni Bela a kaduana laeng a bida iti “100 Tula Para Kay Stella,” isu metten ti direktor iti “366” nupay kaduana latta a nagakting.

Maayatan no kasano a pagsinnublaten ni Bela ti akem a direktor sa aktres.

Makuna a kasla saan nga agdadamo ni Bela a direktor gapu iti kinapintas ti pelikula. Bigbigen ketdi ni Bela a dakkel ti naitulong kenkuana ni Direk Irene Villamor.

Kabayatanna, mabuya ti “366” iti Vivamax iti panangiprodius ti Viva Films.—O