Dandaniw a Para Ubbing
Heizel F. Espejo/ Bernardo Gamueda, Jr.
Salamagi a Mulak Ni HEIZEL F. ESPEJO
Addanton salamagi a mulak Imulakto dagitoy bukel nga uppat Nasilengda, kasda la agrimatrimat No ipanko ida ditoy dakulap. Inton dumakkelda agaramidakto Iti indayon ken buabobuabo
Iti sirokda pagay-ayamakto Ta nalamiis, pul-oy makaay-ayo. Tangtangadekto pay dagiti bungada Marabamban pay laeng no naganusda Di agbayag agbalindan a marissaba Sa kalangakang, matintinnagda. Ngem kuna ni ikit saan nga agtubo Ta dagitoy bukel kinirogna kano Mulak a salamagi, nagpukaw iti mugingko Kankanen met idan ni ikitko!
Dagitoy Manokko Ni BERNARDO GAMUEDA, JR.
Daytoy manokko a kawitan No agtaraok, ay, agkakamakam Bulos daytoy ta diak met makamatan Agtaray a pumalaud, pumaamianan. Daytoy met manokko a pamusian Nagaget nga agitlog iti inaldaw Diak nangngeg kutakna iti naminsan Adda iti baki, mangukop met gayam. Daytoy met manokko nga immabuyo Insagut ti tagasurong a gayyemko Imbatina iti bulan ti Pebrero Sidaenminto inton panagtutudo. Dagitoy manokko, adut’ serbida Parataraok, paraukop, ken parasida Naimas a pinikpikan, kinirog, ken tinola Sigurado a mabsog buksit sangapada.
Contents
tl
2022-05-16T07:00:00.0000000Z
2022-05-16T07:00:00.0000000Z
https://manilabulletin.pressreader.com/article/282419877847253
Manila Bulletin Publishing Corp