Manila Bulletin

Dagiti Sugat ti Daga (17)

Joel B. Manuel

Ti Napalabas: Nagbartek ni Bileg Aurelio wenno BA gapu iti damag a paserraan ti Presidente ti Ylocos Minerals a mangbibiag iti Razon-Colorado Investment Group a pagpapaayanna a kas CEO. Nangangay iti miting ket napagnunumuanda a pasanguanda ti Presidente iti masungad nga eleksion. Dimmawat iti tulong iti Amerika. Kinasarita ti katuganganna nga ipusenda ti Cincuenta Familias ngem di immanamong. Impagnana ti pannakairaman ni Mayor Moreno iti listaan dagiti mabalin nga agpresidente a mairaman iti surbey. Kabayatanna, agparikuten ni Sadiri Melchor no pangalaanna iti ibayadna tapno mairuarna ti impatulod ni Ashley Mary kenkuana a kuarta. Nagkita met da BA ken Saniata Marionne ta agpatpatulong ti naud-udi. Impakdaar ni BA nga agsagana ti adingna ta usarenna a panglaban ken ni Carlos Rasos nga panagpaidasig presidente. Dinutokanna ni Thor a magsalak nib ken ni Saniata Marione. Agturong metten ni Salacnib Miguel iti pangalaanna iti kuarta nga impatulod ni Ashley Mary.

(Maika-17 a Paset)

NANGPAYAPAY ni Sadiri Melchor iti taksi. Nagreklamo ti drayber ta natrapik iti Cadaclan Avenue a yan ti Marke-TING City Mall nga imbilin ti elevator a papananna ket amangan no abotenda iti maysa nga oras sa makadanonda. Natangken ti tebbag daytoy nga agsarita iti Ylokano isu a dinamag ni Sadiri Melchor no tagaano.

“Ya ta i-Sentinela siak, lakay,” kinuna ti drayber. “Ypulo. Aw-awid-en siak pay-en ta kumalo la kumalo ditoy-en. Walo a milion a tattao ditoy-en.”

Immisem ni Sadiri Melchor. Nalawa a siudad ti Cadaclan ngem apagkalima ti populasion ti Poro Ylocos a tallopulo ket innem a milion ti nagtatalenten ditoy. Nayaplag daytoy iti sangagasut ket duapulo a kilometro iti kaakabana ken innem a pulo a kilometro ti kaatiddogna a teritorio iti bunganga ti Valle Central ti nagsinantrianggulo a puro. Ti Sentinela Island ti pagnaedan dagiti Ypuro, ket kas iti naganna, bambantayan daytoy ti Cadaclan Bay.

“Ngem ya ta magulo met ya pulomi, lakay,” kinuna ti drayber idinto ta insiutna ti taksina iti baet dagiti karkariton a napno iti plastic container nga idurduron dagiti dua a balang nga ubbing. Nalabit, napanda nagsakdo iti nadadael a tubo ti Premier Water Services wenno ti Cadaclan Water, dagiti aglablaban a utilities ti danum iti siudad. Idi tumpuarda koman iti dakdakkel a kalsada, naibalangan ti truck ti Cadaclan Electric Company wenno CADELCO. Manarimaan ti panag-repair daytoy iti poste ti elektrisidad. “Sagitoy ya a utilities, kanayon ya a lepeyl-da,” intabbaaw ti Ypuro ket insanudna ti taksi agingga iti adda natuparda nga eskinita a sumina. Tumanabbaaw latta kabayatan ti panangmaniobrana— pasanud sa paabante— a nagsubli.

Immawag manen ti diplomat. “Where are you now, Mr. Ramones?”

I’m coming over there, insungbatna. It’s just that the traffic is heavy at this hour.

Addadan iti Yabes District. Manen, nagbayad iti

nasursurok ngem iti adda iti metro. Nagtugaw iti nakaakakaba nga agda-agdan ti main entrance ti Marke-TING. Nagmensahe iti diplomat. Imbagana nga addan iti uneg ti mall.

Sinabetna ti diplomat idi rummuar. Nagluganda manen iti taksi. Cadaclan City Bay Galleria, imbilinna iti drayber. Adda laeng iti likud ti mall dayta a 5-star a hotel.

“Suite 707,” kinuna ti diplomat kadagiti dua a guardia. Simmaruno ni Sadiri Melchor.

“Elevator, sir...” insenias dagiti guardia dagiti agaabay nga elevator iti ground floor. Nadaeg, nakuna ni Sadiri Melchor kabayatan ti panagurayda iti elevator.

“You will meet Mr. Brown, the big boss of the Economic Division,” kinuna ti diplomat idi agpangatodan.

Ti maikapito a kadsaaran ti yan dagiti executive suite ti hotel. Kinuna ni Mr. Kruger nga adda executive suite ti Economic Section ti US Embassy dita. Nagtimbre iti Suite 707 ti diplomat. Inlukatan ni Trisha ida. Iti pannakasalas ti suite, nakatugaw ti nakaamerikana iti nangisit nga Amerikano a lakay a naisapawen ti buokna.

“Mr. Jaylord Brown, Senior Diplomat, US Embassy to the Poro Ylocos.” Inyawat ti senior diplomat ti dakulapna.

“Hmm, Mr. Ramones, we need you to assume the payment so that we could proceed with the inspection,” kinuna ni Mr. Ruger.

Linuktan ni Sadiri Melchor ti maysa a compartment ti handbag-na. Inruarna ti nareppet a kuarta. Nagsennaay.

“Trisha, please receive it now and prepare the beneficiary documents,” kinuna ni Mr. Brown.

Manipud iti pannakaopisina ti suite, rimmuar ti panglukmegen a sekretaria; inawatna ti kuarta.

“May we go in?” dinamag ni Mr. Kruger ken ni Mr. Brown.

“Yeah, go ahead,” kinuna ti Amerikano. Sinaruno ni Sadiri Melchor ti nangisit iti nalawa a bedroom ti suite. Dita, adda dakkel a maleta a nangisit a nakagalut. Inasitgan ni Mr. Kruger ti maleta. Linettatna ti nylon a binding sa linuktanna.

Napanganga ni Sadiri Melchor iti pannakakitana iti aluminum case a nasileng nga adda dua a padlockna. Babaen ti tulbek, linuktan ti diplomat dagiti dua a kandado sa linettatna ti kalub.

Pimmaspas ti gutok ti puso ni Sadiri Melchor idi maingato ti kalub. Nasanap iti rinepreppet a doliar ti dakkel nga aluminum case. Adda tray dagiti doliar ket pinadas nga inngato ti negro. “Help me here,” kinuna daytoy nga immulagat.

Binadangan ni Sadiri Melchor ti negro. Pudno a rinepreppet a sagsangagasut a doliar ti karga ti tray. Nakadagdagsen.

Itan, napaneknekan ni Sadiri Melchor Ramones a saan a loklokuen ni Ashley Mary.

“Let’s put it down,” inyanikki ti diplomat. Imbabada nga inserrek ti tray iti case. Nangpirit ti diplomat iti sumagmamano a pedaso iti rabaw sa inyawatna ken ni Sadiri Melchor. Nagtigerger dagiti ima ni Sadiri Melchor. Isu met nga agtuktok ni Trisha. “Are you done?” Imbolsa ni Sadiri Melchor dagiti doliar.

“Almost!” insungbat ni Mr. Kruger. Inrikepna ti case sa kinandaduanna. Inrikepna ti zipper sa impanna ti kurappit ti luggage.

“This is 5 million, we have 6 other luggages like this.” Napasennaay ni Sadiri Melchor. Sinurotna ni Kruger. Nakaisem ti senior diplomat. Adda sangsanguenda a papel iti sekretaria.

“Please put your complete name, address of delivery and signature here,” kinuna ni Trisha.

Inasitgan ni Sadiri Melchor ti dokumento. Adda tatakna a US Embassy. Stationery ti US Embassy. Maisabali ti langa ti papel kadagiti papel a nakitkitanan ken inususarnan. Kasla kumunig a komolor-dapo ngem nalamuyot met. Sinuratanna dagiti detalye sa pinirmaanna. Saanen a nagdamag.

Nagpipinnakadada iti senior diplomat. Sinurotna ni Mr. Kruger iti pasilio. Idi addadan iti sango to elevator, inted ni Mr. Kruger ti tulbek ti metal case ti luggage.

“This is yours now,” kinuna ni Mr. Kruger. Imbolsa ti propesor dagiti tulbek.

“When would be the delivery?” dinamag ni Sadiri Melchor. Pirpiritenna ti tulbek iti bolsana.

“We would personally deliver the packages, Mr. Ramones.” Pinerreng ni Mr. Kruger. “A team from the US Embassy, the senior diplomat, me and a security personnel from the Embassy would deliver it.”

Nagtungtung-ed ni Sadiri Melchor. Nadadagsen dagiti bagahe. No 3.5-million ti linaon ti maysa, adu dagitoy a bagahe.

“We would use a chartered flight. An International Red Cross or a United Nations aircraft.”

“Who owns the rest, Mr. Kruger?”

Minulagatan ti nangisit. “He would identify himself. Since this is a top secret operation, the one who will come to claim it would have knowledge of this.”

“What is it for?”

“If I will tell you, I might have to kill you first,” immulagat manen ti nangisit. “The money for you is for you, Mr. Ramones. The money for others is theirs, understood?”

Nabainan ni Sadiri Melchor, a kasla ketdin interesado iti kuarta a saan a naisangrat kenkuana. Bimmabada iti lobby ti hotel sa rimmuarda.

“Now, you know why you had paid much amount of money for this operation, Mr. Ramones?” kinuna ti diplomat.

Nagderetsoda iti Marke-TING City. Nagbirokda iti mabalinda a pagpasuplian iti uneg ti mall. Impasupli ni Sadiri Melchor ti sangapulo a sagsangagasut a doliar. Agdanag amangan no bogus ketdi dagiti doliar. Nabayag bassit a naguray. Agpagnapagna a sisisidap ti panagmatmatana ni Mr. Kruger.

Nakagin-awa ni Sadiri Melchor idi yawat ti kahera ti kuarta— dandani limapulo ket dua a ribu a pisos. Napan iti diplomat. Insinana a sigud ti duapulo ribu a pisos.

“Sir, we have the money in Poro Ylocos currency.” “That’s your money. If you would give me something, I would be thankful,” impasagid ni Mr. Kruger.

Pinirit ni Sadiri Melchor ti insinana a duapulo a ribu a pisos ket inyawatna iti diplomat.

“Thank you, so much, sir!” kinuna ti diplomat.

Napanganga ni Sadiri Melchor iti pannakakitana iti linaon ti aluminum case a nasileng a dua ti padlock-na.

Imbolsana iti amerikanana ti kuarta.

UN-UNOREN ti komboy dagiti van ken ambulansia ti saan pay a nasemento, makapagsabat laeng iti dua a lugan a kalsada a naikalipkip iti katurturodan ti Barrio Abkel, Agbannawag, Sentinela Island Province. Adda iti maikadua a van ni Arriztia Razon Colorado. Kaduana da Susana Peroski ken Lani de Leon ken sumagmamano a babbai a dodoktor. Agawiddan manipud iti umuna a medical mission-da iti dayta nga aldaw nga insayangkatda iti Barrio Kimmulluong.

Nabannogda ngem naariwawa ni Susana Peroski. “Apay ngata a nagadun ti adda goiter-na sadiay?” nakuna ni Susana.

“Atapenda ti kaadu dagiti dumanay,” kinuna ni Dr. Trelly Chan.

“Husto ngata dayta, doktor?” dinamag ni Riz. “Awan met ti scientific basis dayta ngem amangan no ti saanda unay a panagar-aramat iti asin,” kinuna ti doktor.

“Ket sadiay Barrio Lisdak, apay a nagadu metten ti addaan iti kanser?” kinuna manen ni Susana Peroski.

“Panagkunak, adda epekto ti panangsuksukilda kadagiti ig-igid ti waig iti panagbirokda iti balitok,” kinuna ni Dr. Norma San Diego. “Adda dagiti us-usarenda a kemikal a pangikkatda kadagiti impurities dagiti pagminasan.”

Nagkikinnita dagiti adda iti uneg. Nagdumog ni Riz. Manen, adda iti pagminasan ti topiko. Am-amkenna no isu ti pagsaludsodanda.

Napatangwa ni Riz idi agmenor ti luganda. Adda dagiti unipormado a nangsada iti sarsarunuenda a van a nagluganan dagiti lallaki a dodoktor ken nurse.

“Alla, nagadudan nga ag-checkpoint, dakayo!” nakuna ni Susana Peroski. “Didan sa ammo a nangingina dagitoy nakalugan, aya?” Naidarnap iti igid ti dalan dagitoy ken addada pay iti naruot a talaytay, iti ngatuen ti kalsada ken iti babaenna.

“Saandan sa met a…” di naituloy ni Riz ti sawenna ta immasideg ti maysa a burangen a soldado ket insenias daytoy a luktan ti drayber ti van. Inngato ti soldado ti armalaytna sa impaturongna iti drayber. Dimsaag ti drayber, madlaw ti amakna, linukatanna ti van. Immasideg met dagiti dadduma pay a soldado kadagiti dadduma a lugan.

“Baba! Baba!” imbugkaw ti burangen.

“Ania ti masapulyo kadakami, sir?” inyikkis ni Riz idi gammatan ti maysa a soldado ni Dr. Trelly.

“Asino kadakayo ti Arriztia Razon Colorado?”

“Siak dayta, sir!” kinuna ni Riz.

“Dakayo, madam, ti nagorganisar iti daytoy a medical mission?”

“Wen,” insungbat ni Riz a situtured. “Isu a no ania man ti masapulyo, siak ti mangsungbat! Masapulyo ti revolutionary tax?”

Nagngirsi ti burangen ken barbasan. “Saanmi a masapul ti kuarta, madam, ngem masapuldakayo!”

“Siak ti masapulyo? Siak ti alaenyo!” kinuna ni Riz. “Riz! Saanka a…” nakuna ni Susan Peroski. Ngem nakadissaagen ni Riz.

“Mrs. Colorado, alaendakayo amin!” Ginutta ti barbasan ta inallawat ti dua nga ubbing nga armado. “Baba! Dakayo amin!”

Madamdama pay, nakadissaagen amin dagiti kameng ti medical mission. Nakompiskaren amin dagiti selponda.

Naidissaag met amin dagiti agas a kargada. Impaknida dagitoy iti sirok ti dakkel a mangga iti laksid dagiti kapanawan. Lumlumneken ti init. Adda salaksak a nangbasat iti talaytay. Rumanikiak. Simmungbat met ti maysa pay a salaksak iti daya iti laksid dagiti kakaykaywan.

“Ania ti masapulyo kadakami, sir?” dinamag ni Riz kadagiti unipormado. Awan ti masnop a pangituronganna iti saludsodna. Ammona lattan a kameng dagitoy ti Sentinela National Liberation Army, ti rebelde a grupo iti isla.

“Saan sikayo a maan-ano no suloten ti gobielno dagiti idiktalmi!” Nagpatnga ti barbasan ken ti natayag a makannawanna. “Siak ni Komandel Anninaw, daytoy ni Komandel Bannugis ken dayta ni Komandel Salaisi!” intudona ti maysa a nakapunggos a maskulada a babai. “Sumang-attayon ya ta saan sitayo ya masipngetan unay!” imbugkawna. “Palubosanyon dagita dlaybel ya luglugan!” inwagisna kadagiti adda pay laeng iti kalsada.

Sibubuteng, maam-amak, timmakder ni Riz. Agkarkararag a saan koma a saktan dagiti rebelde.

ITI RAZON-COLORADO TOWERS, oras ti panagpinnakadan da Keith ken Bileg Aurelio. Nakapanawen amin nga empleado iti maikalimapulo

ket lima a kadsaaran. Simrek ni Keith ket insenias ni Bileg Aurelio ti panagtugaw ti balasang iti narakab a sopa. Immasideg ni Bileg Aurelio ket inagkanna ti balasang. Dayta ti minalem a ritualda no la ketdi makawayada. A mabalin nga agtungpal iti romansa no mayat la ketdi ti riknada. Nakasagana ita ni Bileg Aurelio, maikatlo itan nga aldaw nga awan ni Riz iti balayda. Nakasaganan ti nalamuyot a kobrekama iti nabanglo nga executive bedroom ni Bileg Aurelio.

Nagpababa dagiti dakulapna iti nabungkong ken nalamuyot a patong ni Keith. Iti telebision, kellaat a naputol ti pabuya a panagluto agsipud iti isasallin ti beterano nga anchor:

“Ladingitenmi, appo nga ay-ayatenmi nga agbuybuya, ngem apagbiit a pessatenmi daytoy agsipud iti timpuar a damag a nakidnap dagiti kameng ti medical mission sadiay Agbannawag, Sentinela Island Province itay laeng agalas singko media. Para iti detalye, pastrekentayo man ni Raul Espaniol, Raul…”

“Gel…” kinulding ni Keith ni Bileg Aurelio a mangrugin a manglukais iti blusana. “Di met adda da Riz…”

Naibag-ut ni Bileg Aurelio ti ulona iti pannakangngegna iti nagan ni Riz. “Ni Riz? Apay?”

“Segun iti palawag ni Manong Eduardo Palacay, a lead driver ti komboy, idi un-unorenda ti rough road iti Barrio Abkel, Agbannawag, pinasardeng dagiti armado a kameng ti Sentinela National Liberation Army ti komboy ket pinadissaagda amin ida nga inurdon nga impabantay. Agingga ita, awan pay ti feeler no ania ti kondision ti pannakawayawaya dagiti hostages. Back to you, Amiel.”

“My God! Tarabayem koma ni Manang Arriztia!” nakuna ni Keith. Ken ni Keith, ibilangna a pagwadan a gayyem ni manangna a Riz. Naparabur kenkuana. Nalabit ammo daytoy no ania isuna ken ni Bileg Aurelio, ngem saanna a madlaw ti gura wenno panagimon kenkuana ni Riz. Kinapudnona, masmasdaaw no apay a masansan nga awan ni Riz a kunaen ni Bileg Aurelio a managbaybay-a kenkuana. Palpalubosan kadi ni manangna nga Arriztia nga isun ti mangipaay iti seksual a kasapulan ti lakayna?

“Dagiti lokdit a rebelde,” nakuna ni Bileg Aurelio. “Ania ti masapulda? Saanda a saktan ni Riz no dida kayat ti gubat!”

“Gel…” inaprosan ni Keith ti abaga ni Bileg Aurelio. Isu met a natoktok ti ridaw. “Manong, mabalin ti sumrek?” Ni Thor.

Inurnos ni Keith ti bado ken ti buokna ket nagturong iti ridaw. Nagsubli met ni Bileg Aurelio iti lamisaanna.

“Manong, nabuyayo ti damag?” dinamag ni Thor, pinagsinnublatna a kinita da Bileg Aurelio ken Keith ket atapen ni Bileg Aurelio a ti ammo ni Thor ket addadan iti executive suite itay.

“Wen, isu a no adda la mapasamak ken ni manangmo, gastuek amin a kuartak a makirupak kadakuada.” Timmakder ni Bileg Aurerlio. “No kuarta ti masapulda… haah!”

“Urayentayo manong, no mano laeng a milion ti kiddawenda.”

“Umunaakon, sir,” kinuna ni Keith. “Agawidkayo. Take some rest and we will wait,” kinunana. Inalana ti bagna sa nagpayapay.

Narikna ti Bileg Aurelio ti panagpanaas ti kanawan a paset ti tianna. Bumsog daytoy. Nagtig-ab. Sa nagtig-ab manen. (Maituloyto)

Adda latta no kua panagsipnget iti pannakagangat ti lampara lumtuad dagiti simutsimot a mangarak iti dila ti apuy gumawgawawada a tumawing iti bagnos a kadkaduada anian sa ta ti silaw a namnamada naabungotan iti allilaw.

Saan a nagballigi dagiti immuna—natnagda ngem nagkaradapda latta inkarigatanda ti kimmalay-at iti apuy ta saanda a makakita gapu iti sipnget idinto a dagiti simmaruno saanda a nakapidut iti leksion kadagiti biddut ket lamolamoda amin a nagkadarap.

Iniddepko ti apuy…

Iti panagkidemko, adda anaraar a masansan a tumawingak iti bagnos.

--ARCHIE C. ANIPOT

Nangabak a mayor ken bise mayor ti Narvacan, Ilocos Sur, da Atty. Pablito V. Sanidad Sr. ken Engr. Joseph Tejada, kas panagsaganadda, iti eleksion idi Mayo 9, 2022.

Nagtaray dagiti dua iti babaen ti Team Bileg/Nationalist People’s Coalition (NPC). Nakabotos ni Atty. Sanidad iti 14,266 kontra iti 12,641 a botos ni dati a Bise Mayor Fayinna Z. Delgado (Aksyon). Nakabotos met ni Engr. Tejada iti 18,168 kontra iti 7,618 a botos ni Atty. Tillie Cordero (Aksyon).

Dagiti nangabak a kameng ti Sangguniang Bayan: Calor Valera, CPA (NPC), 16,390; Dr. Edna Sanidad (NPC), 14,095; Atty. Anicka Zaragoza (Aksyon), 13,912; Jovenniano Ampo Jr.(NPC), 13,244; Teofilo Cabreros (Aksyon), 11,307; Reina Alexa Antolin (NPC), 10,726; Popong dela Cuadra (Aksyon), 10,133; ken Atty. Bernadette C. Lim (NPC) 9,847.

Impeksa ni Bise Mayor Sanidad ti naimpusuan a panagyamanna kadagiti amin a nangsuportar kenkuana. Impanamnamana ti pannakaituloy dagiti proyekto nga inrusat ni Mayor Luis “Chavit” Singson a proyekto a para iti pagsayaatan ti Narvacan. (Eliseo B. Contillo)

Itoy a Bilang

tl

2022-06-16T07:00:00.0000000Z

2022-06-16T07:00:00.0000000Z

https://manilabulletin.pressreader.com/article/281535114621171

Manila Bulletin Publishing Corp