Siled ti Kararag

Basaentayo ti Juan 14:23-27:

Ngem ibagak ti pudno kadakayo: Pagimbaganyo met laeng no pumanawak, ta no diak pumanaw, dinto umay kadakayo ti Mammagbaga Ngem no pumanawak, ibaonkonto kadakayo.—Juan 16:7

KADAGITI maudi nga aldaw a kadua ni Jesus dagiti adalanna, binallaaganna ida iti mapasungad a pannakaparigat a mapadasanda no sumurotda kenkuana. Saanna nga imbaga daytoy kadakuada tapno upayen wenno butbutngenna ida no di ket tapno patibkerenna dagiti pammatida ken tulonganna ida tapno maawatanda ti masungad a panagdaliasatda.

Makatulong iti pananglasattayo kadagiti karit ti biag no maawatantayo dagitoy. Siraragsakak a mangpaneknek iti daytoy a kinapudno. Adun a pannubok ti napadasak iti biagko; ngem ti laeng gundaway a nalasatak dagitoy ket idi naawatak ti nakairamutan ti problema ken nagtalekak iti Apo a tulongannak a lumasat kadagitoy.

Siaammo ni Jesus a saan a nalaka ti pagdaliasatan dagiti adalanna ket impasiguradona a saanna ida a panawan; ti Espiritu Santo ti mangliwliwa kadakuada kadagiti narikut a panawen, isu ti mangted iti kappia ken liwliwa iti tengnga ti rigat. Daytoy ti akem ti Espiritu Santo iti biagtayo—tapno palag-anenna dagiti panagdandanagtayo ken pagtalnaenna dagiti panagbutengtayo.

Mamatiak a kayat ti Dios a maammuantayo a saantayo nga agwaywayas—adda kadatayo ti Espiritu Santo a mangliwliwa, mangisuro, ken mangpabaro iti panagtalektayo iti Dios. Mabalintayo ti agtalek iti Dios ken imatangantayo ti panagtrabaho ti Espiritu Santo kadagiti biagtayo.

Kararag: Patgenmi a Dios, agyamankami iti Espiritu Santo, isu a tumultulong kadakami kadagiti karit a sangsanguenmi. Agyamankami iti kappia a ti laeng Manangliwliwa nga aggapu kenka ti makaited. Amen.

Kapanunotan: Iti panawen ti panagbuteng, ti Espiritu Santo ti mangliwliwa kaniak.

Ikararagan: Dagiti agbibiag iti kanayon a a panagbuteng.

(Naadaw iti Siled ti Kararag, Paguummongan ti Sangalubongan Tapno Agkararag, Mayo-Hunio 2022 a bilang. Impablaak ti Discipleship Resources-Philippines. Sarungkaran ti http://discipleshipresourcesphilippines.com wenno ag-email iti drphilippines@gmail.com.)