Sabong ti Kumpitis

ADDA riknak ken ni Manong Dencio. Ket babaen ti tignay, ikikita ken pannakisasaona, maripiripko a kasta met ti riknana kaniak. Di met ngarud rumbeng a siak ti umuna a mangipaltiing. Bayat ti panangpalpaliiwko kenkuana, naawatak ti gapu ti panagulimekna. Immapay ti panagbain ken panagamakna agsipud ta nadekket ti langenlangenmi ken mabalin a gapu pay iti pammatina a narangrangay ti panagbiagmi ngem isuda.

Ti pagdaksanna, gapu iti dayta a madlawko a panagalumiimna a mangiruknoy iti ayatna kaniak, rinugianna ti umas-asibay ken ni Ansang.

Kasta ti kasasaadmi idi sumangpet ni Ang ditoy ilimi. Maysa a baro nga Intsik ni Ang a nangipatakder iti paglakuanna iti lupot, makmakan, arak, ken dagiti nadumaduma a masapsapul iti pagtaengan ken iti pagadalan. Adda met ti katulonganna a kabsatna a lalaki.

Kas kadawyan, maysaak met kadagiti aggatgatang iti tiendaan ni Ang. Naanus ken nalaing a makigayyem ni Ang. Idi manaynayen, suki pay ketdin ti awagna kaniak. “Suki,” kinunana iti naminsan, “ania naganmo?” “Di met suki, aya?” insungbatko.

“Saan! Saan! Kayatko buniagmo.”

“A, kasta?” kinunak. “Ammomon ta tunggal adda umay ditoy, agdamagka iti nagnagan dagiti sabsabali, ket mabalin met a nadamagmon ti naganko.” “Kayatko sika ibaga,” insungbatna.

“Lydia,” kinunak.

“A, napintas!” kinunana “Lydi-a, Lydi-a. Siak linteg kenka Lydi. Mayatka?”

Makapakpak-olak iti ulona, ngem immisemak tapno sukinak latta ken bareng no ilaklakana ti bayad ti gatangek kenkuana iti sagpaminsan.

“Ala, wen, Lydi,” immanamongak gapu ta agbeddal a mangibalikas iti Lydia.

Idi agangay, kaaduan kadagiti agnaed iti purokmi ti nagbalin a suki ni Ang. Ngem nangnangruna a madlaw nga iti tiendaan ni Ang ti ad-adda a paggatangan dagiti babbalasang ket di met maisupsupadi ni Ansang kadakuada.

Agsipud ta maysa a baro ni Ang, saan a nakakaskasdaaw no nasaysayaat ti panangtamingna kadakami a babbalasang. Iti maysa nga aldaw, naibaga ni Ansang kaniak a rinabrabak ni Ang gapu iti dakkel a siding iti ngatuen ti makanawan a kidayna ket pinanagananna iti tallo a mata. Kuna kano ni Ang a kasla mata ti langa dayta a dakkel a siding. Rinabakko met ni Ansang: “Addanto aldaw nga agpapansitka.”

“Adayo. Pagan-anok met,” insungbat met ni Ansang.