Kid Layaw (18)

Ti Napalabas: Nagawid da Macario ken Aldong idiay Simbaluca gapu iti paboksing idiay barangayda. Nangabak ni Pedro, ti anak ti kapiduada, a naipako iti kanipaan, ta napigsa ti danogna. Inkuyogda ni Pedro iti Manila. Nagsaruno ti panangabak ni Pedro. Nagsanud ti kalaban ni Speed Jani ket ni Pedro ti isukatda ta pagpangalan laeng koma ni Speed Jani, ngem imbalakad ti maysa a trainer a nasayaat no mangabak ni Pedro. Napaturog ni Pedro ni Speed Jani ket immadu dagiti interesado kenkuana. Iti naminsan a panag-trainingda ken Aldong, kinasarita ni Cindy. Imbaga ti balasang a gunggundawayan laeng da Macario ken Aldong isu a panawannan ida ket umallatiw iti boss-na. Idi nakaawidda, impalgak ni Mang Paquing nga amangan no addan mangidiaya ken ni Pedro iti sangagasut a ribu iti sumaruno a labanna.

U(Maika-18 a Paset)

RAY la nagtingig a nanglapayag ni Macario iti kinuna ni Mang Paquing.

“Ginasut a ribu, kunam, sir?”

Di met pinatuloy ni Aldong ti agparidaw gapu iti nangngegna. Nagbuelta a dagus. Nagtungtung-ed met ni Muyac idinto nga inirutanna ti kawitna iti puon ti takiag ni Macario.

“Iti agdama, saanen nga imposible dayta, Cario. Bumabbaba ti pateg ti kuarta. Idi tiempom, baknangkan no adda mangidiaya kenka iti ten thousand a premio tapno labanam ti kampeon. Ita, narigat payen a para curtain raiser ti ten thousand. Isu a tanangenyo ti agpresio no adda offer ken ni Kid. Rumbeng laeng ta nakataya ti salun-at ken biag ti boksingero.”

Nagtungtung-ed ni Aldong. No ngumato ti sapul da insan ken Pedro, agpanayonak metten. Mandiakon no mano laeng ti yarikap ni insan, nakunana iti unegna.

“Saan la a dayta,” kinuna manen ni Mang Paquing. “Posible nga adda manager a mangsirsirip ken ni Kid.”

Pimgaak ni Macario. “Sinno met ti mangsirsirip kaniana ket taltallokam ditoy balay?” kinunana.

Inirutan ni Muyac ti kapetna iti puon ti takiag ti asawana. “Kayat a sawen ni ninong, ‘tay mangpalpaliiw, mangsisiim ken ni Kid,” kinunana.

“Wen, dagiti tao nga interesado kenkuana— dagiti umapal a mangmanehar ken ni Kid. Uray siak, makitkitak a napintas ti masakbayan daytoy nga ubing basta tanangenyo laeng ti agpili iti labanna. Kasta met ti nakitak kenka idi, Cario. Kasano met ti panagbiagda idiay probinsia?” Pinagsinnublat ni Mang Paquing a kinita da Macario ken Aldong.

“Ay, napeklan a mannalon da Kapid Nardo ken Kid. Nagaget ni Kapid Nardo!” kinuna ni Aldong. “No makatalonda, tubaenda ti kanipaanda ket aglutoda iti layaw! Sumimsim met. Ngem nalaka a mabartek. Idi agtutubokami pay, makaangot la’t tansan ti anisado idiay

tianggi iti malmalem ket agsalsallapiden dagiti gurongna nga agawid!”

Nagpaggaak ni Mang Paquing.

“Nagaget ni Kapid Nardo, ngem di met bumaknang!” Nagrungiit ni Macario. “Kaasi met!”

Saanen a nakateppel ni Pedro. “Isu a kayatko ti bumaknang, sir, tapno saanen nga agtalon ni amang!” insampitawna.

Nagkikinnita dagiti kasangsango ni Pedro. Idi kuan, immanges iti dakkel ni Mang Paquing sa nagdumog. “Pagkatapos…” kinuna ni Muyac. “Agawidakton no makaurnongak, anti. Kayatko nga agkadkaduakami ken amang,” nakataltalged a sungbat ni Pedro.

Immanges manen iti dakkel ni Mang Paquing. Kimmita iti tawa tapno yaw-awanna ti yiirut ti panagangesna. Kasano ngamin ket kasla ketdin nangngegna ti kinuna dagidi dadakkelna idi awisenna dagitoy a makipagnaed kenkuana iti siudad.

Ngem natangken ti desision dagiti dadakkelna. Ditoykami a nayanak ket ditoy met laeng nga urayenmi ti ayab ti Apo kadakami, kinuna daydi Apo Manuel nga amana.

Kumapsutkayon. Aginanakayon. Umaykayon idiay Manila ta supapakak ti kinasapak a nangpanaw kadakayo. Idiay, saan a madilpatan ti atab ti paraangantayo a kasla ditoy Cabaritan. Saan a problema ti panagipakni iti arubayan no panawen ti lenned ken kabus gapu iti isasang-at ti atab.

Ngem nagkatawa ketdi ni Apo Manuel. Bay-amon ti atab ken ugot ti Karayan Buguey, barok, kinunana. Nairuamkamin. Naat-ataban ken naug-ugotan dagidi appotayo, ngem kitaem… adda pay met la ti pulitayo!

Ad-adda a kumapsutkami no tallikudanmi ti tarik ken tanggar. Naragragsakkami no ditoykami lattan, Cabaritan. No sarungkarannakami no adda wayam, yamanenmi unay, nakkong. Dina met malipatan dayta nga impabalon daydi Ina Josefa idi agpakada iti daydi naudi a panangsarungkarna kadagiti dadakkelna.

Nagsisinnublatda nga uppat nga agkakabsat a naikamang iti nadumaduma a lugar a nangal-allukoy kadagiti dadakkelda a sumurot kadakuada, ngem napaayda. Kas buridek, isu ti nangrikna unay idi awanen dagiti dadakkelda. Isu ngamin ti kasapaan nga immadayo kadagiti dadakkelda tapno agsapul iti panggedanna iti siudad. Panggepna idi a no nasimpan ti panagbiagna, alaenna dagiti dadakkelna iti dennana tapno sulnitanna dagiti tawen a kaawanna iti dennada. “Ibig mong sabihin, uuwi ka pa rin sa Simbaluca?” Nariing ti rikna ni Mang Paquing iti panagtimek ni Muyac.

“Wen, anti,” insungbat ni Pedro. “Isu a kayatko ti kanayon a laban tapno makaurnongak daras!” “Ania, kasla agtalon?” inkatawa ni Aldong.

“Saan a kasla agarado ti panagboksing, Kid,” kinuna met ni Mang Paquing. “Masapul a piliem ti labanam. Saan a gapu ta adda offer ket awatemon. Isu nga adda manager ken adviser-mo a mangbayabay kenka. Ammom, saan a puro dinnanog ti boksing. Daytoy ti kangrunaan!” intudo ni Mang Paquing ti pispisna. “Ken suerte!” imparaipusna sa pinaatiananna ti tasana. Tumakder koman idi agkiriring ti telepono.

Gapu ta ni Macario ti kaasitgan, siniggawatna a dagus ti telepono.

“Sinnoka, este … yis, yis! Siempre, my haws ito! Wat?”’ Nagkinnita da Mang Paquing ken Aldong idi nadlawda a kasla agtayyek ti mulagat ni Macario.

“Yis, yis, a! Mabiit lang!”

Kinita ni Macario ni Mang Paquing. Inlagidna ti telepono iti sikigan ti shorts-na sa inyawatna ken ni Mang Paquing. “Sika man laengen ti makipatang, tata!”

“Hello, good morning! Sino ‘to? Oh, ikaw pala, Ninay! Anong atin, ha? A, inutusan ka na naman ng amo mo? O, sige, mag-usap kami…” Inapput ni Mang Paquing ti receiver sa kinitana da Macario ken Muyac. “Ni Poncy, maysa kadagiti karibalko idi a manager-promoter,” kinunana. “O, Poncy! Bilib talaga ako sa iyo, maski nasaan ako! Ang lakas ng pang-amoy mo! Ano atin? Oo, magaling na. Kararating lang. Gusto mong isali sa susunod mong card? Ano? Lalabanan niya si Flash Onia? Ba, second contender na si Onia, a! One hundred thousand? Oo, alam ko, marami nang tagahanga ang batang ito, pero…”

Iti pannakangngegna iti dayta, napanganga ni Pedro. Wow! Mano a panagtalon ken panagtutuba sa makaparuarda iti kasta a kantidad?

Saan a nakateppel ni Pedro. Intayagna ti imana. “Mayatak, s-sir! Kaa—”

Di naituloy ti agtutubo ta sinutsotan ni Macario sa

“No kayatnakam a panawan, pagawidek laengen! Awan ti makaam-ammo kenkuana ditoy no saan a siak!”

impakurosna ti tammudona kadagiti bibigna.

“Sandali lang, Poncy,” intuloy ni Mang Paquing. “Hindi ako ang manager ni Kid Layaw. Mamagbaga laeng. Bayam ta pagsasaritaanmi, okey? Oo, tatawagan ka namin. Bye...”

Nalipatan ni Mang Paquing ti panagpakadana koman, sinimpana ti nagtugaw ket agkatkatawa a nagmuestra. “Makitayo? Kuarta payen ti agur-uray iti desisionyo, ubbing! Kape man pay!” kinunana. Inlawlawagna ti nagsaritaanda iti immawag.

Arintarayen ni Pedro a nagpakosina tapno mangtempla iti kape ni Mang Paquing.

“Dakkel a kantidad ti agur-uray ken ni Kid, ngem adu ti rumbeng a masungbatan sakbay a tumapuakkayo,” kinuna ni Mang Paquing bayat ti panagkapena. “Umuna, nakarekober kadin ni Kid, pisikal ken emosional, iti rigat a napasaranna iti naudi a labanna? Maikadua, umanay kadi ti makabulan a panagsanayna? Maikatlo ken kangrunaan: nakasaganaka kadi met laeng a bumaknang?”

“Afoo, Kid, dinak liplipatan no bumaknangka! Lakayakon, nakaad-adu pay ti diak naramanan a ganas ti biag!” insul-oy ni Aldong.