Adda Latta Mapadara

Agsensennaay dagiti kataltalonan iti pannakaaradas manen

Dagiti kinelleng a pinanawan itan ti dam-eg ken dagiti billit-tuleng.

Naruay ti apit ngem sangakerker laeng ti nakagteng iti agamang,

Naatay-atay dagiti sinako nga irik: tangdan kadagiti ritur ken tuok

Sa maadi-adi ti dumakkel nga interes a kasla manget-et-et a barikes.

Mabatbatna dagiti maregmeg a mabati, ngem agkamtud pay a sukat

Maigup a kaldo. Naulmog uray addan iti takdang, kas iti pannakaarabas

Nailian a pagbagasan: di agsarsarday ti sentensia kadagiti pitakpitak—

Dagiti naituding a murkat a mangnamnama iti sangabareta a balitok.

No agugawda, ‘tay agbelbel-a, ngem umelto latta ti timbangan

Iti dapandapan a no nagkammet iti sabali a pinggan: panungpalan.

Pasig nga anek-ek, panaas ken sugat ti adda iti listaan—

Di mabaredbedan ti apges, di madaeran ti umar-arakup a saraaw

Ken dir-i dagiti ugaw kadagiti suli dagiti bangkag ken kinelleng.

Adda ketdi latta mangurungor a kamanokan—saan a karurayan

Nangisit a ti nalabaga a darana, maisayasay iti kataltalonan.