Dear Doc

TULOY ti sungbat iti surat ni Jennifer (ti Siudad ti Vigan, Ilocos Sur), maysa a balasang nga agtawen iti 30 ken mannursuro. Kunana a gapu iti pandemia ken kaadu ti obra iti pagadalan, no kua dina masango ti mangan. Adda nakaibalakad kenkuana nga agtomar kadagiti food supplement, kas supusop ti makan. Damdamagenna no ania daytoy ken no talaga a kasapulanna.

Inlawlawagtayo iti napalabas a bilang no ania ti bitamina, mineral ken suplemento a makan (food supplement).

Apay nga agusar kadagiti food supplement? No ti kankanem ket awanan iti maysa a partikular a sustansia, mabalin a masapulmo ti food supplement a kas supusop. Masansan, temporario laeng ti panagtomar iti suplemento. Kas pagarigan, no masikogka, mabalin a masapulmo dagiti supplement agingga a mayanak ti beybim, wenno agingga a malpas ti panagpasusom. Wenno mabalin a masapulmo ti suplemento para iti nabaybayag a tiempo nangruna no addaanka iti nadagsen a sakit.

Asino ti makasapul kadagiti food supplement?

Segun kadagiti panagadal, napaneknekan a dagiti mangipapauneg kadagiti supplement, kinapudnona, umdasen ti sustansia kadagiti ipapaunegda a makan. Kinapudnona pay, kaaduan nga agtomtomar kadagiti supplement, saanda met a kasapulan a talaga. Adda ketdi sumagmamano a tattao a marigatanda a makaala manipud kadagiti kankanenda kadagiti kasapulanda a sustansia.

Iti pakabuklanna, masapul ti supplement kadagiti:

• Babbai nga addan iti edad a mabalin nga agsikog ken agplamplano nga agsikog. Mangipauneg iti supplement a nagimet iti di nababbaba ngem 400 ug (0.4 mg) a folic acid. Panglapped daytoy iti problema iti neural tube kas iti spina bifida (problema iti duri) a mangrugi iti rugrugi ti panagsikog, sakbay a maamiris ti babai a masikog daytoy.

• Dagiti masikog (a babbai) ta masapulda ti nayon a folic acid ken iron, a maala kadagiti makan ken multivitamin.

• Dagiti lallaki ken babbai a lumbes iti edad a 50, mabalinda ti mangipauneg iti bitamina D ken bitamina B12 a supplement. Mabalin ngamin a saandan a maagsep ti bitamina B12 nga adda kadagiti taraon isu a maibalakad ti supplement.

• Dagiti saan nga umin-inum iti gatas wenno no uminumda man (iti gatas wenno fortified soy), basbassit ngem 2 tasa (500 ml), masapul ti bitamina D ken/wenno calcium supplement.

(Madakamat iti sumaruno a bilang dagiti masapul pay nga agtomar iti food supplement.)