Guerrero ti Siudad ti Laoag, Umuna iti Salip iti Ababa a Sarita ti 6th Albalos Awards

Inyalat ni Jorge Richard P. Guerrero ti Brgy. 5, San Pedro, Siudad ti Laoag, ti Umuna a Gunggona iti Salip iti Ababa a Sarita (Flash Fiction) ti 6th Mario Abinsay Albalos Foundation Literary Awards babaen ti saritana a “Ti Balay ti Padi,” kas impakaammo ti Secretariat ti Albalos Awards kalpasan ti maikatlo ken naudi a deliberasion ti Hunta Dagiti Hurado idi Mayo 15, 2022.

Nayanak ni J.R.P. Guerrero idi Abril 23, 1969 iti Siudad ti Laoag. Nagturpos iti BA Philosophy iti University of the PhilippinesDiliman ken Bachelor of Laws iti Northwestern University, Siudad ti Laoag. Iti agdama, agserserbi iti Department of Agrarian ReformIlocos Norte a kas Agrarian Reform Program Officer II.

Dagiti kakadua ni J.R.P. Guerrero a nangabak: Maikadua a Gunggona: Prodie Gar. Padios, tubo ti Sta. Teresita, Cagayan, agnaeden ken ti pamiliana iti Red Deer, Alberta, Canada, babaen ti saritana a ”Lalat.” Dati a Literary Editor ti Bannawag, agtrabaho ita iti Red Deer Advocate iti Red Deer. Maikatlo a Gunggona: Lito

Paringit Hilidon, nayanak iti Poblacion East, Asingan, Pangasinan idi Agosto 1, 1981 ngem agnanaeden ken ti pamiliana iti Barangay Comon, Aritao, Nueva Vizcaya, babaen ti saritana a “Ti Balud.” Agtrabaho ita iti maysa a call center. Maikapat a Gunggona: Ryan

A. Dulig, naipasngay iti San Juan, Batangas ngem dimmakkel iti Brgy. 5, Nagpatayan, Banna, Ilocos Norte, babaen ti saritana a “Running Lights.” Innem a tawen a nangisuro iti Nagpatayan Elementary School sakbay a nagpaay a kas Head Teacher iti Caestebanan Elementary School iti uneg ti dua a tawen. Nairuarna ti Principals’ Test idi 2017 ket nayakar iti Caribquib ken Crispina Elementary School a nagdamuanna a kas prinsipal. Iti agdama, prinsipal iti Catagtaguen ken Lading Elementary School iti ili a Banna.

Maikalima Gunggona: Jobert M. Pacnis ti Ammubuan, Ballesteros, babaen ti saritana nga “Idiay Plasa.” Mannursuro iti Aparri West National High School iti Brgy. Bulala Norte, Aparri, Cagayan. Naparaburanda ken dati a Judith Molina Simon a kaingungotna iti tallo a bunga, da Jethro, Jiemil Anne, ken Jaybert.

Nagpaay a hurado da Linda T. Lingbaoan, dati a Senior Editor iti University of the Philippines Press ken dati a kameng ti Bannawag, pangulo; Ariel S. Tabag, Poetry & Entertainment Editor ti Bannawag, kameng; ken Juan Al. Asuncion, Literary Editor ti Bannawag, kameng.

Maipakaammonto no kaano a mapadayawan dagiti nangabak a mannurat.

Narugian ti Salip iti Ababa a Sarita ti 6th MAA Foundation Lit. Awards idi Oktubre 30, 2021 (anibersario ti pannakayanak ni Mario A. Albalos) ken nagpatingga iti Marso 3, 2022 (anibersario ti ipupusayna).

Nabangon ti M.A. Albalos Foundation Literary Awards (Albalos Awards) a kas pangtaginayon iti lagip daydi Dios-ti-aluadna a mannurat ti Bannawag Mario A. Albalos, tubo ti Cabaroan Daya, Siudad ti Vigan, napadayawan a Pedro Bukaneg awardee ken umuna a Thomas Jefferson awardee ti Estado ti Hawaii a nagnaedanna agingga iti ipupusayna idi Marso 3, 1991 iti edadna a 40. Nagretiro met idin ni Albalos a kas kameng ti U.S. Navy.

Ni met Jenny R. Alcausin (tubo ti Cabaroan Laud, Siudad ti Vigan ken agnaed iti California) ti sponsor ti pasalip ti foundation ken agpaay met a mangimaton ti nasao a pasalip da Jun Abinsay ken Priscilla Dela Cruz (agpada nga agnaed iti Hawaii), iti pannakitinnulong dagiti kameng ti Bannawag.

Dagiti gunggona: Umuna: PhP10,000.00; Maikadua, PhP8,500.00; Maikatlo, PhP7,000.00; Maikapat, PhP5,000.000; ken Maikalima, PhP3,000.00. Maipaayan pay dagiti mangabak iti sertipiko ti pammadayaw malaksid iti medalion a maited iti nangyalat iti Umuna a Gunggona.

Ti kompleto a listaan dagiti nangabak iti Albalos Awards:

1st Albalos Awards: 1. Ronelyn B. Ramones (“Fina”); 2. Rhea Berroy (“Ti Aktibista”); 3. Arnold P. Jose (“Hawaii Ditoyen, Mikiong!”);

2nd: 1. Remedios S. Tabelisma-Aguillon (“No Nairanta nga Agpaay Kaniak”); 2. Roselyn C. Campano (“Sanguek Manen ti Sumaruno a Pannakidangadang”); 3. Florencio B. Bayuga (“Uray Nababa ti Adalmo, Fren”);

3rd: 1. Isaac R. Pedrera (“Ti Naembargo a Daga iti Cagat”); 2. Arnold P. Jose (“Ni Lakay Gapit a Bayog”); 3. Virgilio S. Naungayan (“The Walking Dead”);

4th: 1. Remedios S. Tabelisma-Aguillon (“Naim-imbag Laengen Ngem ‘Diay Awan”); 2. Manuel D. Benosa, Sr. (“Ti Naikamang”); 3. Quezon E. Javier (“Paniang”);

5th: 1. Rodolfo D. Agatep, Jr. (“Marunggay”); 2. Remedios S. Tabelisma-Aguillon (“Agsupadi a Lubong”); ken 3. Arnold P. Jose (“Mister Bin”).

6th: 1. Jorge Richard P. Guerrero (“Ti Balay ti Padi”), 2. Prodie Gar. Padios (“Lalat”), 3. Lito P. Hilidon (“Ti Balud”), 4. Ryan A. Dulig (“Running Lights”), ken 5. Jobert M. Pacnis (“Idiay Plasa”).