Ni Ikitko Aileen R. Rambaud

Baak, kunada ta awan asawana

Isu ti inauna a babai a kabsat ni tata

Iti agsapa, malukagak ta rummuar iti siledna Agkarayam; isekkadna ti kayo a mangilukat iti tawa Aglitak ti balunet iti ridawna

Napolio idi ubing isu a di makapagna Agmalmalem agpupok iti balayda

Inton dumakkelak, kunak

Igatangak tugaw nga adda pilidna.

Masansan nga umianak iti yanna Managbasa, adalenna ti sibubukel a Biblia

Isu ti nangisuro kadagiti adu nga istoria

Da Jesus, David ken Goliath, ken ti Daong ni Noah Ngem dimteng ti agsapa

Awan nangngegko a kaladukadna

Saan met a naisigkat ti tawa

Awan naglitak a balunet ti ridawna Padpadaanak panaguyasna a rummuar iti siledna Ngem dagiti immay, kellaat Imparabawda ti Bibliana iti barukongna Nagimas la ketdin ti pannaturogna Rupanat’ natalna; naimas sa unay ti tagtagainepna.

Itan ta dakkelak, kunak, dina gayam

Idi kasapulan ti tugaw nga adda pilidna Ta saan a dagiti sakana ti pagpaspasiarna.

--AILEEN R. RAMBAUD