Idi Un-unana a Panawen: Ti Kalapati ken ti Wak

IDI un-unana a panawen, natinep ti lubong iti danum. Kalpasan ti sumagmamano a bulan, kinasao ni Apo Dios ni Wak. “Inka man idiay lubong ta kitaem no awanen ti danum. Agsublika a dagus ket ipakaammom kaniak ti matakuatam,” imbilinna iti tumatayab.

Dagus met a nagtungpal ni Wak. Idi addan iti lubong, nakitana nga adu dagiti tumtumpaw a natay nga ayup. Nagdisso iti rabaw ti maysa kadagitoy ket idi maangotna a kasla naimas daytoy, rinugianna a tinuktok agingga nga adda napirsay a lasagna. Pudno a naimas ket nalipatannan ti bilin ni Apo Dios. Nagpapas a nagsidsida kadagiti natay nga ayup.

Gapu ta di met laengen agsubli ni Wak, binilin ni Apo Dios ni Kalapati. “Inka man idiay lubong ta kitaem no awanen ti danum. Agsublika a dagus ket ipakaammom kaniak ti matakuatam,” imbilinna met ken ni Kalapati.

Dagus met a nagtungpal ni Kalapati. Apaman a nakadanon ni Kalapati iti lubong, nakitana a nalabaga ti danum gapu kadagiti natay a tao ken ayup. Pinadasna ti timmapog ket natakuatanna a maysa a pulgada laengen ti kaadalemna.

Nagsubli ni Kalapati iti langit ket impakaammona ken ni Apo Dios ti natakuatanna. Napaneknekan met ni Apo Dios a pudno ti imbaga ni Kalapati ta nakitana a natina dagiti saka ni Kalapati iti nalabaga a mangipakita iti kaadalem ti danum iti lubong.

Kalpasan ti sumagmamano nga aldaw, adda metten ni Wak.

“Apay met a nagbayagkan a di nagpakpakita?” sinaludsod ni Apo Dios ken ni Wak.

Saan a maiperreng ni Wak dagiti matana. Ammona a nakabasol. Ket nagdumog lattan.

Dinusa ni Apo Dios ni Wak gapu iti dina panagtungpal iti bilin. Kinawaranna dagiti sakana. Gapu iti daytoy, saanen a makapagna no di ket aglagtolagto no adda papananna.

Ni met Kalapati a nangtungpal iti bilin ni Apo Dios, nagbalin a maysa kadagiti paborito a taraken dagiti tattao. Saan metten a naikkat ti nalabaga a maris kadagiti sakana a kas tanda ti panangtungpalna iti bilin ni Apo Dios.—O