Manila Bulletin

Ti Lunod (Umuna a Paset)

Norberto D. Bumanglag, Jr.

PAOAY, ILOCOS NORTE. Iti pangngatuen a turod a mangtantannawag iti Malacañang of the North ken ti immasul a Paoay Lake, nakapakleb da John ken Daniel Pacis iti karuotan. Nakatutok dagiti mata ni Daniel iti scope ti sniper rifle idinto a buybuyaen ni John iti scope ti pimmalasio a balay a linawlaw ti adu a nakaberberde a kayo iti igid ti danaw. Nalakub daytoy iti natayag a bakud a naparabawan kadagiti nalukotlukot a siitan a barut. Nagpaliiwda itayen iti sango ti pagtaengan. Addaan iti landok a ruangan. Adda poste nga addaan iti kamera ken audio. Tapno makastrekka, nasken nga am-ammom dagiti agnaed wenno adda makaanay a rason iti iseserrekmo.

Adda panakkelen nga asul a swimming pool iti uneg ti inaladan, ken adda sumagmamano a lamisaan ken tugaw iti aglawlaw daytoy. Itay, sumagmamano laeng dagiti tattao, a kaaduanna ti guardia.

Nakakaskasdaaw ti impluensia ti akinkukua iti dayta pimmalasio a balay. Napalubosan nga agpatakder iti balay iti igid ti Paoay Lake idinto a sumagmamano laeng ti makaam-ammo kenkuana.

Ngem da John ken Daniel, am-ammoda la unay ti akimbalay: ni Edwin Castillo. Hired Assassin dagiti nabibileg a tao iti gobierno, nangnangruna dagiti politiko. Isu ti ring leader ti grupo a nangpapatay kada Loida ken Jerky Santos a gayyem ni Daniel, ken ti asawa ken dagiti annak ni Daniel.

“Mangrugin nga agsangpet dagiti sangaili,” imburak ni John iti ulimek.

Inggaraw ni Daniel ti scope ti sniper rifle. Iti sikigan ti balay, adda lima a lallaki a simmangpet. Nakabitbit dagitoy kadagiti ice chest, agturongda iti swimming pool.

Nakaun-uneg nga anges ti naasut iti barukong ni Daniel. Nagdata ket naitangkarang kenkuana ti naulep a law-ang. Kasla makitkitana ti asawa ken dagiti dua nga annakna iti likudan dagiti nangisit nga ulep. Umis-isemda. Agpaypayapay... Nagtupa dagiti sangina. Nariknana lattan ti panagbabasa dagiti matana.

Napakidem. Ket rumugma manen iti lagipna daydi buya a nadatnganna iti banio. Natatek iti bala dagiti ipatpategna iti biag. Nadigosda iti bukodda a dara.

Nagkuyegyeg. Ta kasla marikriknana ti saem a pinasar dagiti annak ken ti asawana tunggal sarubsoben ti bala dagiti bagida. Agdaldalugudog ti barukongna... Ket nagriaw iti pempennekna. Nabugtak pay dagiti sumagmamano a billit iti asideg ket timmayabda nga immadayo.

Saan latta a makalipat ni Daniel!

Saan a nagtimtimek ni John. Binay-anna ni Daniel. Ammona no kasano ti marikrikna ti gayyemna. Ammona no kasano ti bara a gumilgil-ayab iti barukong daytoy. Ammona no kasano ti kasakit ti papatayenda dagiti ipatpategna iti biag. Ammona!

Nariknana dayta iti daydi amana. Binunubonanda iti bala ti bagi daytoy. Awan ti ammona nga aramiden idi no di agibales, ti mangpapatay iti akin-utek wenno asino man a nakikomplot iti pannakapapatay ti amana. Sinapulna ida. Pinagbayadna ida.

Kasta met ti rikna ni Daniel, ammona. Simmirip manen ni John iti scope. “Simmangpeten ni Edwin,” nayesngawna.

Saan a nagun-uni ni Daniel. Nagpakleb. Siniripna ti scope ti sniper rifle. Insawarna ti panagkitana babaen ti scope. Agingga a nagsardeng ti X ti scope iti barukong ni Edwin. Nakaiggem iti serbesa ni Edwin. Nangitangad. Agkatkatawa. Madamdama pay, adda immasideg a naka-bathing suit a babai ken ni Edwin. Agar-aruyot pay laeng ti danum iti bagina. Nakasipsippukel ti pammagina. Impatayna ti imana iti abaga ni Edwin, siniket met ti lalaki. Binisong ni Edwin ti babai. Innala ti babai ti serbesa nga iggem ni Edwin. Binagkat ni Edwin ti babai. Nagturong iti ngarab ti swimming pool a pagpawpawpawan ti sumagmamano a babbai. Impuruak ni Edwin ti babai iti danum. Iti diarda, ammo ni Daniel a nagiikkis dagiti sumagmamamano a babbai iti swimming pool.

Agtigtigergeren ti tammudo ni Daniel a nakakawit iti gatilio ti riple. Kayatna a kalbiten. Kayatna a bawbawan ti ulo ni Edwin. Kayatna a buyaen ti panagtayab ti maderder nga utek daytoy. Kayatna a masaksian ti pannakatina ti swimming pool iti dara.

Ngem inakkalna ti tammudona iti gatilio. Impaiddana ti riple sa nagdata manen.

Nagsennaay. Kayatna nga adda iti sango ni Edwin inton papatayenna tapno makitana ti kababassitan nga urat nga agparang iti tengnged ken pispis daytoy ken ti kaudian a tubbog ti agsayasay a darana, ken ti pannakapugsat ti angesna.

“Nasken a sumrekak iti inaladanda, Manong John,” kinuna ni Daniel.

Nagdata met ni John. Nakitana dagiti agkikinnamat nga ulep. “Mabalinta met nga ipakni ni Edwin ken dagiti kakaduana iti nalaklaka a pamuspusan,” kinunana. “Adda ripleta a dua... mabalinta a saggaysaen lattan ida a papatayen a ditoyta laeng...”

Nagwingiwing ni Daniel. “Kayatko a makita ti rupa dayta a tao apaman a mabawbawak ti ulo ken pusona, manong... Kayatko nga imatangan no ania ti mariknana... kayatko a makita ti panagrigatna... kayatko nga addaak iti abayna iti kanito a panangyangesna iti maudi a linas ti biagna. Kayatko a buyaen dagiti matana nga agpakpakaasi, gumawgawawa... Dagita laeng ti mangpunas kadagiti ar-aria iti pannakapukawko kadagiti ipatpategko iti biag...”

“Sumurotak ngarud,” kinuna ni John a napaanges iti nauneg.

Nagwingiwing manen ni Daniel.

“Napeggad .... Saan a gagangay a tao dagiti mapanmo sanguen. Hired killers-da. Propesionalda. Nasanayda, nasiglatda, nalaingda... ta isu ti trabahoda,” imlawlawag ni John.

“Agpapadakami laeng, manong,” kinuna ni Daniel. Ta maysa met a hitman idi, duada ken Jerky Santos. Ngem idi saan idan a kasapulan ti politiko nga amoda, isudan ti pinaanup daytoy. Agingga a nagtutugmok ti dalanda kada John. “No matayak, saan a bale .... basta mapapatayko

Agtigtigerger ti tammudo ni Daniel a nakakawit iti gatilio ti riple. Kayatna a kalbiten. Kayatna a bawbawan ti ulo ni Edwin...

dayta nga Edwin Castillo, naragsakakton...”

Nagsennaay ni John. Dina kayat ti desision ni Daniel, ngem respetarenna.

“Suportarannak, manong, dayta laeng ti kiddawko. Bantayannak. Sika ti pannakamatak. No adda saanko a makita, sika ti mangipakni.”

Timmakder ni Daniel. Pinampagna ti pantalonna. Inikkatna ti kipis ken ti diaketna a khaki. Nabati ti badona nga uniporme ti maysa a teknisian ti maysa a kompania ti cable. Agpammarang a kas teknisian tapno makastrek iti pimmalasio a balay. Putdenna ti cable a naikamang iti balay tapno umawagda iti mangtarimaan. Adda laban ni Manny Pacquiao iti boksing ita. Isu a naummongda iti dayta a pagtaengan ta buyaenda ti laban.

“Adda amin dagiti remientam?” sinaludsod ni John.

“Wen.” Nagtung-ed ni Daniel.

“Ti Bluetooth-mo, nakalukat?”

“Wen.”

“Dua a 9MM nga adda silencer-na...”

“Check. Ken adda dua a reserba a magasin.”

“Ti rosariom?”

Uray no adda danag iti kaunggan ni Daniel, napaisem. Kinarawana ti tengngedna ket impakitana ti rosario nga inlemmeng ti unipormena. Inagepanna ti ladawan ni Jesus a nakalansa iti krus.

“Good luck, my friend,” kinuna ni John.

Saan a nakauni ni Daniel. Minatmatanna ti gayyemna a nagbalinen a kasla paset ti pamiliana. Sipud pannakatay ti asawa ken dagiti annakna, nagnaeden iti pagtaengan da John. Isu ti nagbalin a badigard ti ina ken anak daytoy.

Saanen a masbaalan ni Daniel ti riknana. Inarakupna ni John. “Agyamanak iti kinasayaatmo a gayyem, manong,” kinunana.

“Nagasatak unay ta nagbalinka a gayyemko. Dakkel nga utangko kenka ti panangsalsalaknibmo kadagiti ipatpategko iti biag...” “Paset laeng ti pagrebbengak, manong...”

Rimmuk-at ni Daniel. “No saanak a makalasat iti daytoy a malem, dawatek nga alaem ti bangkayko ket itabonnak iti abay ti asawak ken dagiti annakko.”

Nagwingiwing ni John. “Saan... adayo a mapasamak dayta. Diak ipalubos nga adda dakes a mapasamak kenka, tandaanam dayta.”

NAKADANGDANG-AS ti takderna. Nakaiggem ti kanigidna iti serbesa idinto nga adda sigarilio nga inipit ti kanawanna. Ipalpalawlawna ti panagkitana— iti kabarbaro a pimmalasio a balayna, iti mismo nga igid ti Paoay Lake. Restricted a lugar daytoy. Awan koma ti pribado a pagtaengan a maipatakder. Ngem pinalubosanda.

No asinoda a nangpalubos kenkuana, saannan a kayat nga ammuen. Ti laeng napateg, addan balayna.

Napalawlawan ti balayna iti nangato nga alad. Namulaan iti adu a kayo ken agsabong a muyong. Nalawa ti swimming pool nga addaan iti Jacuzzi. Umas-asul ti danumna. Nakalamlamuyot ti parasipis ti danum iti bassit a waterfall.

Ditoy ti ayuyangda kadagiti barkadana. Ditoy ti pagpalpalabasanda iti oras, a kaduada dagiti agkakalasbang a babbai nga aggapu iti B1, pangur-urayanda iti sumaruno a trabahoda.

Naaliwaksayda ita. Naiwakasdan da Daniel Pacis ken Jerky Santos a kangrunaan a parikut ti boss-da. Nagkibaltang ti insayangkatda a kudeta a plinano ti nagkumpang a bileg ti CIA ken sumagmamano a heneral iti Armed Forces of the Philippines. Na-court martial dagiti kameng ti armada a nairaman; napakawan dagiti dadduma ngem adu dagiti natay a sibilian ken soldado a saan a naammuan ti publiko.

Ngem no apay a nagbaliktad dagiti pasamak, saanna a mailawlawag. Imbes a paisardeng wenno gibusan ti presidente ti nasayaat a langenlangen ti Amerika ken Filipinas gapu iti kudeta, nagparang ketdi a kasla awan ti napasamak. Kasla normal latta ti relasion dagiti dua a pagilian.

Nagbanag nga awan ti basolda. Nawayada latta. Ngem ni John Villa, a nangtulong iti presidente tapno saan nga agballigi ti kudeta, naballikog. Nagbalin a kabusor ti pagilian. Nairaman pay a napapatay.

Kasta ti ammoda. Natay ni John Villa. Ngem itay laeng nabiit, nakaawatda iti impormasion manipud iti Amerika. Sibibiag kano ni John.

Nakasuron. Ngem inakona met laeng ti nagbiddutanna. Ngem adda idiay Amerika ni John, awan ngarud ti maaramidda. No kas pagarigan ta agsubli ditoy, nawayanto nga anupenda.

Ket gapu ta awan ditoy ni John, agtultuloy met ti panagrambakda. Adu a kuarta ti gunggonana iti panangisayangkatna kadagiti adu a pammapatay sakbay ken bayat ti kudeta. Isu nga agbibiag ita a kasla baknang— iti suporta ti gobierno.

Kinitana dagiti gagayyemna— a padana a hired killer— a nakaragragsak. Agkakatawada nga agiinum. Dagiti dadduma, kumaykayepkepda kadagiti agkakalasbang a binayadanda a babbai. Sumagmamano kadagitoy ti adda iti swimming pool. Agbibinnatokda, agkikinnarawada

kadagiti partnerda iti lansad ti danum. Iti dadakkel nga speaker iti ruar, maipatpatayab ti maysa nga Ilokano a kanta. Madamdama pay ti pannakaipabuya ti live a laban ni Manny Pacquiao.

“Boss .... adda problema,” nasinga iti pukkaw dagiti taona manipud iti uneg.

“Ania a problema?” Nangitangad iti serbesa. “Nagiddep dagiti TV...”

Naklaat. Saan a mabalin. Tallopulo a minuto laengen, mangrugin ti laban ni Pacquiao.

Nagturong iti dakkel a telebision. Nangisit ti screen daytoy. Nagrasaw. “Awagam ti opisina ti cable,” imbilinna iti maysa a taona. “Ibagam a mangibaonda a dagus iti technician a mangtarimaan. Ken pardasanda!”

SANGSANGUEN ni Melanie ti ridaw ti dakkel a balay. Agpangpangngadua no sumrek wenno saan. Balay daydi papangna daytoy, daydi Col. Pat Davis a retirado a US Marine. Ti amana a nangipaidam kenkuana iti pammateg bayat ti idadakkelna. Ti amana a nakisina iti inana gapu ta napatpateg ti propesionna iti armada ti Amerika.

Inil-iliwna a makadenna met koma ti amana idi ubing pay, ngem impaidam daytoy kenkuana. Nagbalasang a kinupkupikopanna ti iliwna iti amana. Naikawes ti gurana iti daytoy, iti propesion daytoy. Ngem idi makaturpos iti kolehio, nagpaay a US Marine, sa simrek iti CIA. Sinurotna met laeng iti tugot ti amana.

Apay? Tapno maipaneknekna a ti kabaelan ti amana, kabaelanna met.

Agingga a pimmusay ti amana iti maysa kadagiti black ops ti CIA idiay Pakistan. Isuna ti nangitabon. Idi laeng a natakuatanna nga iti laksid ti saanda man laeng a panagkitkita iti panagubing ken panagbalasangna, sinursurot gayam ti amana ti biagna. Tunggal kasangayna, mangipatulod daytoy iti regalo. Kadagiti kaaddana iti eskuela, sumarungkar ti amana a saanna nga ammo. Idi naangay ti JS prom-na idi high school ken iti panaggraduarna, adda ti amana a nangimatang, ken rinetrato pay daytoy. Uray idi addan iti kolehio, idi agturpos ken itag-ayna ti kanawan nga imana tapno agsapata a kas commissioned officer iti US Marine, adda daytoy. Kinupkupikopan ti amana dagiti ladawanna. Kasla nagbalin a gamengna dagitoy. Amin dagita a ladawan, naibisti iti salasna.

Ken naipatawid kenkuana ti duapulo a milion a doliar a dina ammo no sadino ti nangal-alaan ti amana. Ti laeng naibaga ti abagado idi ited daytoy kenkuana ti testamento ti amana, naurnong ti amana ti kuartana iti panag-invest-na iti stocks ken mutual funds.

Ngem iti laksid dagita, nasakit latta ti nakemna iti amana.

Impaidam daytoy kenkuana ti pammateg ti maysa nga ama.

Simrek met laeng iti balay. Pinasgedna dagiti silaw ket naibaskag kenkuana ti nagarbo pay laeng a pagtaengan uray no awanen ti agnanaed. Mangtangtangdan laeng iti cleaning company iti linawas a panangdalusda.

Nagturong iti salas, iti nakaintaran dagiti nagkaadu

a ladawan ti amana manipud hayskul, kolehio ken iti panagpaay daytoy iti US Marine; kadagiti nagduduma a paggugubatan a nakaibaonanna, idi serkenda ti Kuwait tapno paksiatenda dagiti soldado ni Saddam a nangsakup iti dayta a pagilian, iti pannakirinnupakda kadagiti Taliban iti kabambantayan ti Afghanistan, ken kadagiti kalsada iti Iraq a nakaibaonanda a kas advance party sakbay ti isasanglad dagiti multi-nation nga armada tapno maparmek ni Saddam.

Napasardeng kadagiti ladawan nga intaktakaw

‘di amana a rinetrato. Ngem ad-adda a nasulek ti imatangna iti kinaadu ti ladawan ti amana ken ni John Villa idi naikappeng ti baro iti special unit ti amana. Nagbalinda a nasinged. Nagim-imonanna pay ta nariknana idi a kasla ad-adda pay nga as-asideg ni John Villa iti amana ngem isuna.

Dina napupuotan ti panagarubos dagiti luana iti pannakakitana kadagiti ladawan ni John. Nagtugaw. Kinemkemna dagiti sangina. Dina ammo, ngem dina mailaksid iti panunotna dayta a lalaki. Uray no kasano ti gurana iti panangliput daytoy kenkuana. Ammona, iti kaunggan ti barukongna, ay-ayatenna pay laeng ni John.

Nagwingiwing. Kayatna nga agsinnubliananda. Kayatna nga awaten manen ni John. Dayta ti yikikkis ti pusona. Ngem ti panunotna, saanna latta a maannugot ti panangallilaw daytoy kenkuana.

Dina kayat a mapasamak kadakuada ti kas iti napasamak kadagiti nagannak kenkuana a nagdiborsio idi maduktalan ti amana nga adda sabali a lalaki iti biag ‘di inana. Ammona a nagbasol daydi inana, ngem saanna met a namimpinsan a napabasol ta binaybayan ida daydi amana. Ad-adda nga impaay daytoy ti panawenna iti armada ti Amerika.

Mabuteng a no agsinnubliananda ken

John agkagasatanda, diborsionto met laeng ti pagtungpalanda. Naminsanen a namulitan ti panagtalekna iti baro, saannan a kayat a maulit pay.

Linikudanna dagiti ladawan. Nagturong iti maysa a kuarto. Kuarto a nagbalin a sanktuario daydi amana. Nailanad iti testamento ti amana ti kaadda ti kabsatna a babai. A no kayatnanto a maam-ammo, naidulin iti daytoy a kuarto dagiti amin nga impormasion. Ngem awan a pulos rantana a mangam-ammo iti kabsatna. Isu a sipud idi pimmusay ti amana, dina pulos a ginandat ti simrek iti dayta a kuarto.

Linukatanna. Nakasipsipnget ta awan a pulos ti tawa a mangisangbay iti lawag ti init. Biniagna ti silaw. Nakaur-urnos dagiti muebles. Awan ti makitana a pagilasinan ti kaadda ti tapok wenno lawwalawwa.

Nagsaltek dagiti matana iti panakkelen a lamisaan. Iti kanawan nga uyosan daytoy, nakalanad nga isu ti yan dagiti impormasion maipapan iti kabsatna. Ububing ngata ngem isuna?

Nagmattider. Ania ngata ti riknana no maammuanna ti amin? Ti langa daytoy? Ti kinataona?

Awanen ti nabati pay a kamangna iti daytoy a biag. Malaksid laeng iti ahensia nga isun ti nangibukbokanna iti amin a panawenna. Ngem iti tunggal panangipatungpalna kadagiti misionna nga ited ti ahensia, saan a gagangay a peggad ti kasangona. Ket ammona nga addanto pagpatinggaan ti amin.

Agmaymaysa. Awanto man laeng ti mangitabon kenkuana.

Nakaay-ay-ay a biag!

Nakamattider latta iti sango ti lamisaan. Dina mapagturong ti aramidenna. Ngem madamdama pay, nagtugaw met laeng. Ginuyodna ti uyosan. Saan a nakatulbek. Maysa nga asul a photo album ti linaonna. Awanen ti nanglukat pay sipud natay ti amana.

Arintigergeren a nangyaon iti album. Imparabawna iti lamisaan.

No lukatanna ti album, nakasagana kadi a mangawat iti ania man a matakuatanna?

Ngem asino kadi daytoy a kabsatna? Sibibiag pay ngata? Sadino a lubong ti yanna? Agsisimparaten dagiti saludsodna iti bagina. Dina napupuotan, linukibna iti kalub ti album. Iti umuna a panid, naikitikit: Armina Davis!

NAKAPAKLEB pay laeng ni John iti tapaw ti turod, iti arpad dagiti ruruot. Nakaangkla pay laeng dagiti matana iti largabista. Buybuyaenna dagiti mapaspasamak iti pagtaengan ni Edwin Castillo. Araribungbongan dagitoy ti TV iti asideg ti swimming pool.

Madamdama pay, nagkiriring ti selponna. Nakaparpardas a nangsungbat: “Good afternoon, SunCable, what can we do for you?”

“Good afternoon,” inkablaaw met ti timek-lalaki. “Perdi ti cable-mi...”

“Pasiensiakayon, apo... Ania ti adresyo?” “Paoay...”

“Ania nga street, apo...”

“Awan nagan ti kalsada ditoy.”

“Kasano ngarud a masapulanmi, sir. Masapulmi ti eksakto nga adres...” Napaisem ni John ta ammona a maruroden ti kasarsaritana.

“Kaar-aramid ti kalsada nga agturong ditoy. Awan naganna.”

“Imposible nga awan, sir...” Sinsintiren laeng ni John no sadino ti pagpatinggaan ti anus ti kasarsaritana. “Adda latta naganna, a.”

“Kunak la ngarud nga awan! Kaar-aramid... pati ti balay... ditoy laeng Paoay Lake. Asideg laeng iti Malacañang of the North!” Maruroden ti tao iti bangir a linia.

“Ah... ammok ngaruden, sir... Daytay pimmalasio?”

“Wen!”

“Okey, sir. Ibaonko ti technician-mi inton Lunes... I-log-ko lattan ti problemayo. Sigurado nga inton Lunes, tarimaanenmi. Malem kadi wenno iti bigat, sir...”

“An’a a Lunes ti sasawem? Masapul nga itan!”

“Sorry, sir... ngem awan sindadaan a technician ita...” “Ta apay? Yanda?” Ad-addan ti rurod ti lalaki. “Nagaawiddan, sir. Laban ngamin ni Pacquiao. Agbuyada kano iti laban...” Adda babawi ni John iti sinaona. Amangan no masirok ti kasarsaritana a loklokuenna. Mabalin met dagiti teknisian ti agbuya iti opisinada.

“Ay, saan a mabalin! Masapul nga adda umay mangtarimaan ita. Ken alistuanyo ta dandanin mangrugi ti laban ni Pacquiao. Yan ti superbisormo?”

“Awan, sir...”

“Nagawid met ta mapan agbuya iti laban?” imsiagen ti lalaki.

“Yes, sir... sori laengen...”

“Saan a mabalin! Masapulmi ti teknisian, maawatam?” Makapungtoten ti lalaki.

“Nakaawidda ngaruden, sir. Uray ta ita laeng a maawananka iti signal...” Umis-isem ni John nga ad-adda a mangar-aron iti rurod ti lalaki.

“Ngem adda laban ni Pacquiao, dimo kadi maawatan?” “Adda met siguro am-ammoyo a mabalinyo a pakibuyaan, sir...”

Imsiag manen ti lalaki. “’Nam, an’a ti naganmo ta ireportka iti boss-mo? Siguraduek a maikkatka iti trabahom!”

“Ni sir met... awan ngarud ti teknisianmi.” “Umawagka!” imbugkaw ti lalaki. Uray la a napleng ni John.

Immanges ni John iti nauneg.

“An’a, mangawagka wenno saan?” Napigsa latta ti timek ti lalaki.

Makais-isemen ni John. “Mabiit laeng, sir... Adda gayam teknisianmi nga asideg laeng dita. Kayatmo kadi nga isu ti ibaonko dita, sir?”

“Uray asino ti ibaonmo! Uray anak ti demonio!” Dandani saanen a magawidan ni John ti katawana. “Okey, sir... Awagak ta ibaonko dita.”

Nauneg nga anges ti naudi a nangngeg ni John. Napaisem ni John. Sigurado a yakar ti nakasaritana ti pungtotna kadagiti kakaduana. Dakkel a bentaheda dayta ken Daniel.

“Nangngegmo ti saritaanmi?” kinunana iti bluetooth. “Loud and clear, manong... Innakon...” insungbat ni Daniel.

LOS ANGELES, CALIFORNIA. Iti maysa a nagsulian iti Wilshire Boulevard, sidadang-as a nakatakder ti duapulo a kadsaaran a pasdek a bimmalitok dagiti sarming a didingna ken sumilsilap nga stainless steel ti amin a sulina. Iti tuktok daytoy, makapataliaw ti bimmalitok a naganna: DE GIANNA.

Penthouse iti maikaduapulo a kadsaaran ket isu ti pribado a pagtaengan ti Chief Executive Officer ken majority stockholder ti multi-billion dollar a De Gianna Resort and Casino. Maysa daytoy kadagiti kadadakkelan a hotel chain iti lubong. Addaan iti sanga kadagiti

dadakkel a siudad iti Estados Unidos a kas iti Los Angeles, San Francisco, Las Vegas, Miami, New York, Atlanta, Chicago ken iti ballasiw-taaw a kas iti Hong Kong, Singapore, Macau, Bejing, Tokyo, Munich, Bonn, Paris, Manila, ken dadduma pay.

Iti uneg ti maysa a dakkel nga opisina, nakatugaw ti maysa a babai iti likud ti nakasilsilap ken nakadaldalimanek a lamisaan. Nakaparabaw ti maysa a folder iti lamisaan. Nakaukrad ti folder ngem saan nga isu ti nakaituonan ti panagkita ti babai no di ket iti nakabitin a 4K a 75 inches a TV a nakalukat iti Channel 35, Business Channel. Ipakpakita daytoy ti agdama a kasasaad dagiti stocks ti Dow Jones, Nasdaq ken S&P 500.

12:45 iti malem, Pacific Time, idinto nga iti New

York, 2:45 Eastern Time. Kinse minuto laengen sa agrikep ti pannakailako dagiti shares dagiti stocks ket madanagan ti babai a mangsursurot iti napardas a panagbaba ti gatad ti share ti stock ti De Gianna. Itay laeng napalabas a lawas, aggatad ti kompaniada iti $65.00 tunggal share. Ita, $57.00 laengen.

Manipud idi natay ni Angelo De Gianna iti panagcrash ti private jet-na, ken isuna ti nagakem a CEO, ininut a nagbaba ti presio ti stock. Kadagiti komentario iti Business News Magazine ken Business TV, agduaduada a kabaelanna ti mangimanehar iti daytoy higante a business empire gapu iti kinaubingna ken sangkabassit laeng a padasna iti panagnegosio. Awan pay makabulan ti ipapatay ti asawana, nangisumiter a dagus ti Cypress Hotel iti diaya iti pananggatangna iti De Gianna Corporation. Saan nga inaprobaran ti Board ti kompania daytoy. Agingga nga insayangkat ti Cypress Hotel ti tarigagayna a mang-hostile takeover iti De Gianna.

Ngem iti nalimed nga addang, adda sumagmamano a dadakkel nga stockholder ti kompania a kellaat a nagilako kadagiti adu a share-da. Gapu iti dayta ken iti sayangguseng a mapukpukaw kanon ti panagtalek dagiti shareholder iti kabaelanna a kas CEO, nagpanic dagiti shareholder. Bimmaba ti presio ti share ti De Gianna ket agingga ita, agtultuloy pay laeng nga agbaba.

Saanna latta a maisina dagiti matana iti TV. $54.00 laengen ti tunggal share. Madanagan. Binilion a doliar ti mapukaw a gatad ti kompania iti kasta a panagbabana. Dina ammo no ania ti aramidenna. Dina met mabalin a paisardeng iti New York Exchange ti pannakailako dagiti stocks.

Pagam-ammuan, nagkiriring ti telepono. Kinitana ti oras iti diding. Adda ngamin padpadaananna a sangaili. Ngem alas singko pay laeng ti idadateng daytoy. Adda pay sangapulo a minuto.

Impis-itna ti boton ket nai-on ti speaker. “Yes,” insungbatna.

“Mr. Giovanni is here, ma’am,” insungbat ti sekretariana.

“Okay, give me ten minutes.” Impis-itna manen ti boton ket nai-off ti speaker. Tinangadna manen ti TV. Lima a minuto laengen sa agserra ti New Your Stock Exchange. Nagtalinaed a $54.00 ti presio. Nakaanges met laeng iti nalukay. Bareng no saanen nga agpababa pay.

Nagkiriring manen ti telepono. Nakaparpardas a nangipis-it iti boton a kasla masuron. “Didn’t I tell you to wait a few minutes...”

“S-sorry, ma’am, but you have another phone call...” “Asino?”

“Kunana nga am-ammoyo. Kayatnakayo kano laeng a makasarita iti saan a mabayag. Imbagak pay nga agsagsaganakayo para iti napateg a miting... ngem nagpilit. Imbagana nga aguray. Ken no dinakayo kano makasarita ita, amangan no awanton ti gundawayna a mangawag kadakayo.”

Nagkusipet ti babai. “Ania kano ti naganna?” “Melanie Davis...”

Dimmakkel dagiti mata ti babai. Nagtigerger pay dagiti balikasna a nangulit iti nagan, “M-Melanie Davis...” (Maituloyto)

Itoy a Bilang

tl

2022-06-16T07:00:00.0000000Z

2022-06-16T07:00:00.0000000Z

https://manilabulletin.pressreader.com/article/282132115075315

Manila Bulletin Publishing Corp