Edukasion: Wen, Makaay-ayo nga Asignatura ti Siensia
Aileen R. Rambaud
ITI Grado Tres a marugian a maisuro ti Siensia. Adun a mannursuro ti saan a basta lattan mangipuppupok kadagiti adalanda iti klasrum sa lektiuranda dagiti adalanda iti mabayag ken likliklikanda payen ti adu a memorisasion.
Napaneknekanen dagitoy a mannursuro a nasamsamay a mayadalda ti leksion babaen ti praktikal nga aplikasion. Saandan a basta agsasao ken agar-aramat iti ladawan. Kas pagarigan no isuroda dagiti adalanda maipanggep kadagiti nadumaduma a kita ti ulep, paruarenda dagiti adalanda ket ipakitada a mismo dagiti ulep.
Pagsayaatanna payen ta babaen ti teknolohia, no adalen metten dagiti ubbing ti maipanggep, kas pagarigan, ti digestive system, respiratory system wenno circulatory system, addan dagiti us-usarenda a kompiuter a pangipakitaan/pangipabuyaanda iti video dagitoy.
Ken saan metten nga agtaltalinaed lattan iti kabinet wenno estante dagiti microscope, beakers, cylinders ken dadduma pay a ramit iti siensia a kas para pabuya laeng no di ket paus-usaren dagiti mannursuro dagitoy kadagiti ubbingda.
Wen, adun a mannursuro ita ti mamagbalbalin iti asignatura a Siensia a kas makaay-ayo nga adalen. Sapay koma ta makatulong daytoy nga ar-aramiden dagiti mannursuro iti panagbalin dagiti ubbingtayo nga ad-adda pay a managsukisok ken managsaludsod a saan ket a basta agimemmemoriada lattan kadagiti impormasion. Kabaelan met ti martines dayta a maputputdan ti dilana, di ngamin?—O
Itoy a Bilang
tl
2022-06-16T07:00:00.0000000Z
2022-06-16T07:00:00.0000000Z
https://manilabulletin.pressreader.com/article/282136410042611
Manila Bulletin Publishing Corp