Rogie Baysa, mannurat ti Bannawag, 71

Pimmusay ni Rogie Baysa, mannurat ti Bannawag, idi Mayo 18, iti edadna a 71 gapu iti kanser a nangdadael kangrunaanna iti dalemna.

“Nagaget, nasingpet ken managtulong a manongmi. Diminto malipatan dagiti naitulongna kadakami,” kinuna ni

Rosalyn Baysa-Navarro, maysa kadagiti kakabsatna.

Agarup maysa a dekada a nagsagaba iti Parkinson’s disease ni Rogie (awagna met laeng kadagiti kasingedna) ket kuna ni Rosalyn a mabalin kano a dagiti adu a tomtomarenna nga agas tapno malapdan ti isisikad ti nasao a sakitna ti nangdadael iti dalem ken dadduma pay a lalaemna.

Nayanak ni Rogie kada Eugenio A. Baysa, Sr. ken Cristina G. Cudiamat (agpada a pimmusayen) ti M.H. del Pilar, Alicia, Isabela idi Nobiembre 13, 1950. Nupay agtrabaho a kas postmaster (nangrugi a kas letter carrier) ti Philippine Postal Corporation, inkagumaananna nga inleppas ti BS Business Administration ( Major in Accounting ) iti Isabela Colleges, Cauayan City, Isabela.

Retirado a Postmaster iti Post Office, Alicia, Isabela. Kas mannurat, nag-Secretary General iti dua a dadakkel a gunglo dagiti mannurat nga Ilokano, ti GUMIL Filipinas ken TMI Filipinas. Addan sumagmamano a pammadayaw a naawatna iti nadumaduma a salip iti sarita, salaysay ken daniw. Kangrunaan a pammadayaw a naawatna ti Most Outstanding Isabelino idi 1999 (Media Category) nga inted ti LGU ti probinsia ti Isabela, ken Most Outstanding Postmaster iti Cagayan Valley iti namindua a daras (2000 ken 2004).

Ni Preciosa C. Baysa ti kapisi ti pusona. Naparaburanda iti dua nga annak, da Pregieson, 28, nakalpas iti BS Animal Husbandry, ken Pregielyn, 27, nakalpas iti BS Business Administration, iti Isabela State University Main Campus, Echague, Isabela.

Naidulin ti bangkay ni Rogie idi Mayo 26 iti kamposanto ti Del Pilar, Alicia, Isabela. (Villamor Visaya, Jr.)