Ti Gasatmo

GEMINI (Mayo 21- Hunio 20). Adu dagiti manamnama nga oportunidad tapno sumantak. Husto ti kasasaad a naulimek a mangar-aramid kadagiti umisu ken umno. Atiddog pay ti panagdaliasat ket addanto latta tiempo ti panangsuot kenka ti gasat –ngem natibtibkerkanton. Nagasat a numero: 3, 5, 8.

CANCER (Hunio 21- Hulio 20). Gundawayan dagiti agsasaruno a napipintas a gundaway para iti bukod a bagi, ken para iti sabali kangrunaan ti pamilia. Mannakaawat ti ayat ket no bilang man buong ti ulo, saan a daytoy ti para kenka. Nagasat iti natingra a maris. Nagasat a numero: 2, 4, 9.

LEO (Hulio 21- Agosto 20). Iti daytoy a gundaway, pagimbagan ti pamilia ti kangrunaan. Saan laeng a nadnadlaw dagiti parabur a naisangrat a para kenka gapu iti panangipangrunam iti pagimbagan dagiti patpatgen. Mangnamnama nga adda a kanayon ni patpatgen iti sibaymo. Nagasat a numero: 3, 5, 7.

VIRGO (Agosto 21- Septiembre 22). Sika ti mangeddeng iti dana a kayatmo a suroten. Adda karagpin a suot ti rag-o manipud kadagiti material a bambanag. Idinto a ti ragsak nga agpaut, adda kadagiti gagangay a bambanag. Kumabagian ti linglingay iti pannakapnek. Nagasat a numero: 1, 6, 8.

LIBRA (Septiembre 23- Oktubre 22). Yantangay atiddog ti panagdaliasat, awan ti makuna a naladaw a panangrugi. Ti napateg, puntiriaen ti gunggona a makaipaay kenka iti pannakapnek, ken makaipaay met iti ragsak iti pada a tao. Ti kinaragsakmo ti mangawis iti suerte nga umay kenka. Nagasat a numero: 2, 4, 9.

SCORPIO (Oktubre 23- Nobiembre 22). Husto latta met nga ibilang ti naimbag a katakunaynay a gunggona iti biag. Laglagipen ketdi nga addaanka met iti kabukbukodan a biag ken pagragsakan. Agtaud iti kaunggan ti pudno ken makapnek a liwliwa. Nagasat a numero: 1, 5, 7.

SAGITTARIUS (Nobiembre 23Disiembre 20). No kua, mapalagipanka a masapul a siguraduen ti garaw nangruna no nangato unay ti puntiria. Nasaksakit ti matnag iti nangatngato a tay-ak. Malaksid iti dayta, adda met iti baba dagiti masapulmo tapno mapnekka. Nagasat a numero: 3, 4, 8.

CAPRICORN (Disiembre 21Enero 19). Adda dagiti gundaway a palugodannaka ni gundaway tapno maipakatmo dagiti kabaelam. No agkibbatol, kaipapanan nga adda riro iti wagas. Naimbag no mapagbalin a wadan ti naballigi a pagayam. Pudno a di magayyem ti amin ngem adda latta kasinged. Nagasat a numero: 2, 5, 9.

AQUARIUS (Enero 20- Pebrero 19). Pudno a di sangitan ti naibelleng a gatas. Ngem naimbag latta a tingitingen ken arisiten no ania ti napasamak. Pagimbaganna, naimbag latta met ti mangabaruanan manen. Adda oportunidad iti amin a disso a pangibakalam iti imatangmo. Nagasat a numero: 3, 6, 7.

PISCES (Pebrero 20- Marso

20). Natalged ti kasasaadmo iti pannakapnekmo iti apagisu. Mabalin met ti agkalikagum pay no la ketdi adda iti sidong ti kinapudno. No taliawen ti napalabas, naimbag latta met a kauten no ania ti nasayaat nga adda iti daytoy. Nagasat a numero: 2, 4, 8.

ARIES (Marso 21- Abril 20). Adda insalikadmo a siit iti bakrangmo a no kua, mangipalagip kenka iti riro a naaramid a nakaigapuan iti panagisalikadmo iti dayta. Ikeddeng ti panangibelleng iti daytoy. Adda naayamuom a sabong a nakasagana a paappupo kenka. Nagasat a numero: 3, 6, 9.

TAURUS (Abril 21- Mayo 20). Saan a tumaeng ti ayat. Ken saan a bugbugtong. Iti tunggal gundaway a mabalin nga ipeksa, palugodan. Kasta met a mabalin latta met nga awaten daytoy. Maysa daytoy kadagiti kangrunaan a rason nga addaka iti lubong. Nagasat a numero: 1, 4, 8.