Napalaus ti Yaman ni Angeli Kadagiti Dimteng Kenkuana a Parabur

NAPALAUS ti panagyamyaman ni Angeli Khang kadagiti adu a grasia a maaw-awatna. Kas pagarigan, agarup amin a pelikulana iti Vivamax, kanayon nga adda dagitoy iti Top 3. Kinapudnona, kaaduan iti “view” ti “Silip sa Apoy” a narugian a maipabuya idi Enero 2022.

Kaudian a pelikula ni Angeli ti “Pusoy” a narugian a maipabuya iti Mayo 27. Segun ken ni Angeli, kas kadagiti immuna a pelikulana, napno met daytoy kadagiti makapabara nga eksena. Kinapudnona, kuna ni Angeli a “wild” dagiti eksena, ken saan a madismaya dagiti lallaki nga agbuya.

Kakadua ni Angeli iti nasao a pelikula da Vince Rillon, Janelle Tee, Jela Cuenca, ken Baron Geisler.

* * *

Maysa kadagiti artista a naapektaran iti saan a pannakapabaro ti prangkisa ti ABS-CBN ni Beauty Gonzales.

Pagimbaganna, immakar daytoy iti GMA-7 ket nairaman iti maysa a proyekto—iti teleserye a napauluan iti “The Fake Life.” Kakaduana ditoy da Sid Lucero ken Ariel Rivera iti panangidirehe ni Adolf Alix Jr.

Daytoy met ti umuna a gundaway nga agakem a kontrabida ni Beauty.

Maipalagip nga immuna a naglatak ni Beauty iti programa a “Pinoy Big Brother” sa ti teleserye a “Kadenang Ginto” nga agpada a naipabuya iti ABSCBN.—O