Dandaniw a Para Ubbing

Ti Payongko Ni MELODY L. AGUINALDO

Adda payongko a garitan Nagpintas a matmatan Dagiti marisna makakayaw No mainitan, kasla bullalayaw.

Usarek daytoy a pagsaripda No agtudo iti napigsa Tapno di marugitan ken mabasa ‘Toy badok a kaikulkulada.

Usarek met laeng a paglinong No rummuarak iti agmatuon Tapno diak masdo a kasla ayup Gapu iti napalalo a pudot.

Isu pay ti usarek a sarukod No ti dalanko ket agsalog Armasko pay ‘toy payong No adda aso nga aguuyong!

Ti Ay-ayamko Ni JOVY ROA

Arapaapko ti napintas nga ay-ayam Ngem kuna ni nanang, awan maigatang Isu a bulong ti niog, innala ni tatang Bola, singsing, relo ti inna nagbalinan.

Daytay met sabong ti marunggay Pinagbalinko nga aritos, agraraay Nagpurosak pay naganus a bungana Linutok iti sinandamili a banga.

Ngem kapintasan ‘tay maikatlo Inaramid ni tatang iti makadominggo Nagusar iti napalinis ken naliha a kayo Naubon iti nylon, nagpintas a sirkero.

Insuro ni nanang no kasano nga ay-ayamen Tapno agtayyek ken agtamblitambling Isu nga insardengkon nga idardarirag Nangina nga ay-ayam nga es-essemak!