SIUDAD TI BATAC.

Kas paset ti panggep ti Mariano Marcos State university (MMSU) a maitultuloy ti pannakaidanon dagiti nadumaduma nga impormasion ken teknolohia iti benneg ti research ken extension ken dadduma pay nga impormasion manipud iti Unibersidad, napirmaan itay nabiit ti katulagan iti nagbaetan ti MMSU ken ti Philippine Broadcasting Service, Bureau of Broadcast Services (PBS-BBS) babaen ti DWFB Radyo Pilipinas, Laoag. Iti ladawan, ipakpakita da Dr. Shirley C. Agrupis, Presidente ti MMSU (akintengnga) ken Ms. Celestina C. Paz, Station Manager ti DWFB Radyo Pilipinas, Laoag (kaabay ni Dr. Agrupis, maikadua iti kanigid), ti napirmaanen a katulagan. Mairaman kadagiti nagpirma ken nagserbi a kas saksi da Dr. Marilou P. Lucas, Director ti Extension Directorate; Engr. Ami Ruth R. Cocson, Vice President for Planning and Development; Dr. Oscar M. Agpaoa, Vice President for Administration and Finance. Nairaman iti MOA signing da Atty. Ma. Saniata R. Marcos, Legal Officer; ken Prof. Herdy L. Yumul, Director ti Office for Strategic Communication. Agpaut manen iti 20 a tawen ti kappirma a katulagan kalpasan a nagngudo idi Mayo 9 ti immuna a katulagan a pinirmaan met laeng ti MMSU ken DWFB. Nangrugi ti panagtinnulong ti MMSU ken ti nasao nga estasion ti radio idi 1990 iti programa a University on the Air. Napasingkedan ti implementasion ti programa idi Mayo 2002 iti pannakapirma ti nadakamat a katulagan. Sipud iti dayta a tawen, naawagan ti programa iti “MMSU: Rimat ti Ilocandia.” Malaksid iti MMSU Rimat, nagbalin pay nga instrumento ti DWFB iti pannakaisayangkat ken pannakaidanon ti Eskuela iti Tangatang/School-on-the-Air (SOA) Program. Nakabase iti MMSU-College of Teacher Education (CTE) iti Siudad ti Laoag ti studio ti DWFB Radyo Pilipinas, Laoag idinto nga adda ti transmitter daytoy iti MMSU Batac campus. (Mercy R. Gaño)