Dagiti Lagip ti Lasag

1

Tignay ti lagip ti tunggal pulgada ti kalsada, nakunam idi, bayat nga iggemmo ti imak, bayat a napanta nagnagna ken nagdaldaliasat nga awan makukuartata ngem nakabirokta kadagiti pirgis a milagro a nabirokanta kadagiti saan unay a napagpagnaan a dana ti risiris, sa piniselko ti imam, ken dagiti piglat a mangipalpalagip kadagiti istoria nga inlimlimmedmo, ket nagar-aramidta kadagiti baro a lagip, kadagiti pirgis a milagro iti milagroso a dana, uray pay awan makukuartata, ta nangnanganta met iti makan ti emma, kinaemma dagiti tattao a nasabsabatta, tattao a nangipalpalagip kadata, a maistoriatayo laeng dagiti istoria dagiti ganna, ket inirutanta ti iggemta nga ima, imam, imak, sakbay a pinagpagnata dagiti saan unay a napagpagnaan a dana ti risiris ken milagro, ket naduktalanta dagiti lagip ti lasag, nga agkaduata, uray pay awan makukuartata ken iti kinaemma dagiti tattao ti intalekta, piniselko ti addaan piglat nga imam, sa imbagam, tignay ti lagip ti tunggal pulgada ti kalsada…

2

Malagip amin ti puso, uray dagiti nakudrep a detalye, malagipna tunggal lasag ken tignay, tunggal nabannayabed a sala ken sintonado a kansion, tunggal pikkog ti isem, tunggal arisangasang ti mata, tunggal pulgada ti nalamuyot a kudil ti ima idi nagsalata iti nakulat a sala, tunggal agkubkubiter a lasag idi umal-allatiwta kadagiti sintonado a kanta, ti samiweng ti katawam, ti langa ti isemmo, idi nagsalata nga iggemmo ti agtigtigerger nga imak, napno ti pusok, ngem malagipna laeng ita dagiti nakudrep a detalye, ti lemma ti apros, ti anniniwan ti ima, agal-allangogan a kasla sintonado a kansion, a kasla iti tagainep, agkilapkilap, mapukpukaw a kasla arisangasang iti mata, malagip amin ti puso uray pay ti isemmo bayat nga agsalsalata, tunggal lasag, agkubkubiter iti nakulat a sala, nga ita nakudrep a lagip laengen iti puso.

3

Kinalay-atkon ti tunggal pulgada a sika, tunggal ngarab ken suli, malagipko pay laeng ti tunggal espasio ti kudil, ti bibineg, bara, arakup, ket nakunam idi, ti kinaawan ket kinaadda met laeng, a saan nga awan a pudno ti kinaasino, saan a ditoy no di ket, aglikmut iti amin ng espasio, kanayon nga adda, uray pay no iti lagip laengen, uray pay, adda, adda, iti angin, iti lawag, iti tunggal agal-al-al, agrikabrikab, agragrag-o a kanito ti biag, a kunam idi, sa nagkatawaak ken nagkepkep iti tunggal pulgada a sika…

…ngem agpayso ita, iti nadayaw nga itatta, addaka latta, uray no iti lagip laengen, ket agpayso ti naibagam idi, ti kinaawan ket kinaadda met laeng, ta addaka ita, ditoy, kadagiti mata dagiti annakta, iti katawa dagiti tattao, iti raniag ti lawag, iti aniwarawar ti sardam, kadagiti dalluyon iti baybay, addaka, iti bassit a sabsabong iti igid ti dalan, addaka, iti nalamiis a danum a mangpukaw iti waw, kadagiti agmauyong a bambanag, addaka ditoy ita, no arakupek dagiti annakta, no arakupek ti lubong, no arakupek ti lamiis ti limdo manipud ita, addaka, addaka ita, ditoy…