No Lagipek

No lagipek ti naglabas, rugiak iti panawen

Nga agtaraytarayak iti bangkag, iti buntuon Dagiti nagpursingan iti mani wenno nagpungtilan Kadagiti bagas ti kamotit bayat nga iti nagsulian

A yan ti kalapaw, umas-asimbuyok dagiti malinglingta A pamedped idinto a sibsibbolen ni tatang Dagiti kalog kadagiti nayintar a pinuon ti niog

Iti inaladan a pagngatngatingatan ni Sawak Kadagiti impuruakko a ruot ken lanlanut.

Isarunok a lagipen dagiti panawen a sumursurotak

Iti baybay a pagkadkaduaanmi ken tatang

Nga agkali iti kusimay wenno tarukoy

Ken no maminsan, mamarawbaraw, naimbag laeng

Nga ibulon iti nabanglo (gapu’t pandan a mula ni nanang) Nga innapuy-- nanumo a mapagsasanguan ngem adda Pannakapnek a di mailadawan uray pay ti kalaingan a pintor.

Yudik a lagipen dagiti panawen nga isasalog

Iti alog: panawen a panagkurimes kadagiti bisukol Wenno leddeg ken no dadduma panagpidut Kadagiti agdidilat a birabid; ken panagkettel Kadagiti naglalangto a balangeg

Napia la a kelnaten nga idumudom iti bugguong

No saan, agbanniitak wenno agpakat iti lawin Aglalo no kasta a kalkalpas ti tudo-- pawpawak Dagiti pagipakatan kas pangawag kadagiti agay-ayuyang A lames kadagiti lansad ta inton agsapa

Nga agsangatak sigurado ti kaadda ti nabang-i

A maituno nga isagpaw iti dinengdeng

Ni nanang, pamigsa latta iti agmalem.

Ngem dagita a naglabas, nupay lagip la idan

Nga umagibas gapu iti kinapardas ti oras Addanto latta panawen a masublianan, kasla daytay Maysa a kailian a nagkatangkatang nga agtarigagay latta Iti panagsublina iti daga a kamarmarisna.

Itinto panangsubli kadagiti aramid kadagidi a panawen Ti naglabas, panagsubli a mangpasingked

A siak latta daydi nagramut kadagiti bangkag, Aplaya, kaalogan iti nasulinek nga away-Pimmanaw ngem saan nga immadayo.