Manila Bulletin

No Adda Sigsigloten, Adda Met Warwaren

Anna Liza Madayag Gaspar, CPA

RASON tapno ilako. Iti Ingles, reason for selling wenno RFS. Kas koma no apay a mailaklako ti maysa a banag aglalo no segunda mano daytoy ken maysa a luxury item a kas koma branded bag wenno fountain pen, a maysa kadagiti pagaayatko a gatangen.

Adda dagiti gundaway a gumatangtayo kadagiti nangingina a bambanag a saan a naplano wenno awan iti badiettayo. Ken irasonantayo ti igagatangtayo kadagitoy a bambanag. Uray siak, no kasta nga ag-splurge-ak ket saan a nakalista iti budget-ko, kunak no kua ket, “I deserve this. Nagrigrigatak kadagiti napalabas a lawas, masapul ngarud nga adda met panglinglingayko iti bagik.” Ngem masansan a dagitoy a banag, saanko a kasapulan a kas koma iti maysa manen a fountain pen— ta pamay-ak koma kadagiti nasuroken a tallopulo a fountain pen-ko?

Sugar Rush

No kasta no kua a gumatangak, wen, maragsakanak ngem apagkanito laeng. Apay? Wen, a, ta kalpasan ti maysa wenno dua nga aldaw manipud igagatangko, maamirisko a ti kinapudnona, saanak a maikari iti dayta a gunggona ta saan ngarud a nakabadiet. Kayatna ngarud a sawen a ti inggatangko ket alaek iti dadduma a nakabadiet. Maisakripisio ngarud dagiti dadduma a masapul koma a gatangen.

Daytoy a realisasion ngarud ti mamagbalin kadaytoy nga “splurge” a maysa laeng nga apagdarikmat a ragsak. Kasla man sugar rush.

Ket no kasta a masapulen a gatangen dagiti naibudget ket awan mabalin a pagalaan iti igatang, di ngata mapilitantayo a mangilako kadagiti dadduma a sanikuatayo? Ket no dadduma, dagiti kunatayo nga insaguttayo iti bagbagitayo ti masapul nga ipataray.

Reason for Selling

Kadagiti “buy and sell virtual community” a pagkamengak iti social media, no adda agilako kadagiti personal a gamigamda, basaek no kua dagiti RFS. Nadumaduma dagiti rason. Adda dita ti mangilako iti Louis Vuitton bag a kagatgatangna laeng iti napalabas a bulan gapu ta “I changed my mind.” Adda pay nakitak a mangilaklako kadagiti ing-ingungotenna la unay a fountain pen collection gapu ta “I lost my job.” Ti man kakakasangan (ngem isu ti nagraemak) ket ti panangilako ti maysa a tao kadagiti fountain pen-na ta masapulna ti kuarta a gastosenna a pangpaoperarna iti pusana.

Iti biag, naragragsaktayo met laeng no adda balanse. Ag-splurge-tayo ngem no laeng nai-budget. Masapul ngarud a maibadietan ti pag-shopping, di ngamin, kaka?

Isu a siraragsakak a mangipadamag a manipud idi baro a tawen, saanak pay a pulos gimmatang iti fountain pen.—O

News

ilo-ph

2023-03-16T07:00:00.0000000Z

2023-03-16T07:00:00.0000000Z

https://manilabulletin.pressreader.com/article/281814288074673

Manila Bulletin Publishing Corp