Siled ti Kararag

Basaentayo ti Juan 10:1-5, 22-28

Denggen dagiti karnerok ti timekko. Ammok ida, ket surotendak.—Juan 10:27

“IPAPATIYO!” “Agsaganakayo!” “Aginayadkayo laeng!” “Alaenyo ti bola!”

“Nalaing!”

Dagitoy ti masansan a balikas dagiti coach iti basketball court iti sangalubongan. Iti napalabas a sumagmamano a tawen, nag-coach ti anakko a lalaki iti maysa a basketball team iti elementaria. Kas tarabay ti grupo, kanayon nga idalanna ida iti sibayna. Tunggal panaginana iti ayayam, ummongenna dagiti player tapno itedna dagiti umisu a balakad. No agsublidan iti court, mangngeg ti timek ti anakko a mangted kadagiti nalawag a bilin ken pammatibker. Iti panagbuybuyak, masmasdaawak no kasano a dagiti ubbing iti team malasinda ti timekna manipud kadagiti adu a nagduduma a timek iti gym.

Adu dagiti riribuk ken pakasingaan iti lubongtayo. Kasano a malasintayo ti timek ni Jesus manipud kadagiti dadduma? Kas adalan ni Kristo, malasintayo ti timekna iti nadumaduma a wagas: babaen ti panagtalna, panagkararag, ken panagadal iti Biblia; babaen ti panangdengngegtayo iti konsiensiatayo ken kadagiti balikas dagiti napudno a tattao; ken babaen dagiti padas iti panagdayaw, musika, ken panagyaman. Babaen ti kinapinget ken panangitultuloy kadagitoy nga aramid, malasintayo ti timek ni Kristo manipud iti ariwawa ti lubong.

Kararag: Apo Jesus, agyamankami iti mangidalan a timekmo. Tulongannakami a manglasin iti timekmo manipud kadagiti adu nga ariwawa. Amen.

Kapanunotan: Dumngegak iti timek ti Pastorko iti laksid ti kinaariwawa ti aglawlawko. Ikararagan: Dagiti coach.