Manila Bulletin

Ti Lunod (19)

Norberto D. Bumanglag Jr.

Ti Napalabas: Inlatak ni John ti panagayatna ken ni Armina. Nagturongda idiay Pagudpud ket sinurot ida ti dua a tao ni Mr. Chan, ti boss ti TRIAD. Pinarmek ni John dagitoy. Nakapungtot ni Mr. Chan ket imbaonna ni Paul Lee a mangipakni ken ni John. Kabayatanna, kinidapda ni Richelle tapno mayat ni Rochelle a mangilako iti kompaniana. Insakalan da Ricky ken Melanie ni Richelle. Inkeddengda nga ilemmeng iti Filipinas ngem di umannugot ni Richelle. Nag-propose met ni John ken ni Armina. Saan nga inawat ti balasang ti diaya ni John ngem imbalakad ti inana a surotenna ni John, a kadagita a gundaway agin-inumen a kaduana ni Daniel. Inulit ni John ti nag-propose. Isu met ti idadarup da Paul Lee ket bayat ti panangarakup ni John ken ni Armina, pinaltoganda ida. Napuruan ni Armina. Pinaltogan met ni Daniel dagiti nangpaltog kada John.

(Maika-19 a Paset)

NAPABARINGKUAS ni John. Nagtugaw iti iking ti kama. Agkurkurenren ti mugingna a kasla adda pilpilitenna a lagipen. Nagkiremkirem a nangipalawlaw iti panagkitana a kasla adda sapsapulenna. Agingga iti nagintek dagiti matana ken ni Daniel a nakatugaw iti asidegna. Saksakloten ti gayyemna ti nabendaan a takiagna a nakakabit iti tengngedna.

“Ania ti napasamak ken ni Armina?” sinaludsodna ta immagibas iti panunotna ti panagnguynguy-a ni Armina sakbay a napukawna ti puotna. “Ania ti napasamak ken ni Armina, Daniel?”

“Maturogka, manong. Kasapulam ti inana,” kinuna ketdi ni Daniel.

“Saan... pangngaasim. Ibagam no ania ti napasamak ken ni Armina. Sibibiag kadi? Awan ti dakes a napasamak kenkuana, saan kadi?” agsasarunon a saludsodna. Bimmangon. Rinugianna nga ikkaten dagiti plastik a tubo a naikapet iti bagina ta malaksid gayam kadagiti dart a kimmali iti bagina, nasalapon pay dagiti bala isu nga intarayda iti ospital.

Timmakder ni Daniel. “Saanmo nga ikkaten dagita, manong,” inyatipana. “Adu ti napukawmo a dara.”

Ngem saan a dimngeg ni John. Inikkatna amin dagiti tubo a naikapet iti bagina. “Please, Daniel, ibagam no ania ti napasamak ken ni Armina. Yanna?”

Nakaun-uneg nga anges ti pinasut ni Daniel. “Saanna a nalasat, manong...”

Saan a nakauni ni John. Kasla nabibineg ti sibubukel a bagina. Nagtigerger dagiti laslasagna. Nagsadag iti kama.

Nadlaw ni Daniel ti kasla pannakatumba ni John. Sipapardas a nangsarapa iti gayyemna. Inatibayna daytoy nga impatugaw iti kama.

“Pinadasda nga in-revive, manong... Nakitak ti panangaramid dagiti immarayat iti amin a pamuspusan tapno masalbarda ni Armina. Ngem dead on arrival iti ospital.”

Nangemkem ni John. Nakamulagat ngem awan ti masnop a nakaiturongan dagiti matana. Agsalsala dagitoy a kasla agsapsapul iti di ammo no ania.

“Intsik dagiti rimmaut, manong,” kinuna ni Daniel. Saanen a nasken nga agsaludsod pay ni John. Amammonan dagitoy a rimmaut: tao ida ni Danny Chan. Masiguradona a saan nga agsardeng dagitoy agingga iti saanda a maipakni ta binayadan ida ti ulitegna a mayor. Wen, ti mismo nga ulitegna!

Nagngariet iti panagtupa dagiti sangina. Napakidem. Ket immagibas manen iti alintataona ti ladawan ni Armina: rumrummuar ti dara iti ngiwat, agong ken lapayagna; agnguynguy-a, kamkamaten daytoy ti angesna a mangulit-ulit iti napudno a panagayatna kenkuana.

Basolna. Ammona nga agbanag a kasta gapu iti lunod. Napasamak idin. Ngem apay a naituredna pay laeng a linukatan ti pusona iti sabali a babai?

Nagriaw. Nagallangogan dayta iti bukodna a kuarto. Natda a di matimtimek ni Daniel.

Nalagip manen ni John ti mammadles a baket. Dua pay ti matay, kinuna daytoy idi nagpasumar. Natayen ni Armina. Asino ti sumaruno? Pinilitna ti nagkidem. Saannan a kabaelan daytoy. Saan, saanton nga agayat pay. Saanton a tumaliaw pay iti sabali a babai. Timmakder. “Nangipananda iti bangkay ni Armina? Kayatko a makita...”

PINULINGLING ni Mayor Villa ti ladawan ni John a mingmingminganna bayat ti panangur-urayda iti isasangpet dagiti kinatulag ni Manuel, ti matalekna a badigard, a professional killer. Adda iti uneg ti bukodna a lugan iti maysa a naiputputong a lugar. Iraprapinna a kasarsarita ni Manuel iti selpon babaen ti Bluetooth.

Masmasdaaw no ania nga anting-anting ti ikut daytoy a kaanakanna. Namin-adun a ginandatda a papatayen ngem bin-ig a kibaltang. Ita, kinarit ni Danny Chan a no dagiti taona ti makaipakni ken ni John, isubli daytoy ti imbayadna ken nayonan pay daytoy iti maysa a milion. Iti kinaadu ti kuartana, awan balor kenkuana ti maysa a milion. Inawatna laeng ti karit ni Danny Chan gapu ta dina kayat a tagibassiten daytoy ti kabaelanna. Hah, asino ti nabilbileg ngem isuna iti daytoy a deppaar ti lubong?

Nalukag ti rurod ti lakay. Inaramatna laeng daytoy nga Intsik tapno mayadayo iti panagatap dagiti tao. Kayatna nga awan ti pamalpalatpatan dagiti pannakabagi ti linteg iti pannakainaigna iti krimen ket no dagiti taona ti aramatenna sa agbiddutda, awan sabali a tuduenda no di isuna. Mabalin a maidarum. Mabalin a maibalud. Nupay kasta, ammona a narigat a mapasamak dayta gapu iti koneksionna kadagiti nangangato a turayen ti gobierno.

Ita, mangbayad kadagiti professional killer nga awan ti pakainaiganda. Pinagsapulna ni Manuel.

“Delta, adda tao a sumungsungad...” nangngeg ti lakay iti Bluetooth ti timek ni Manuel.

“Manoda?” sinaludsodna.

“Duada, Delta...”

“Good... Laglagipem, sangagasut a ribu laeng ti idiayam a tangdanda...” Kinapudnona, nangisaganada iti tallo a sobre— maysa a naglaon iti limapulo ribu, maysa a naglaon iti sangagasut a ribu, ken maysa a naglaon iti sangagasut ket duapulo ket lima ribu— a madadaan nga ipaunada.

“Roger that, Delta... uray ta mangngegmo ti amin a transaksionmi...”

Nagulimek ni Manuel. Madamdama pay, nangngeg ti lakay ti timek ti maysa a lalaki. “Puting Lawin?” kinuna ti lalaki.

“Oo... ako si Puting Lawin,” insungbat ni Manuel. “May baril ako... kung set up ito, papatayin kita,” impangta ti lalaki.

“Huwag kang mag-alala, ako ang nakausap mo sa

Dardarurosen idan ti pickup ket maidungpardan iti nainayad a lugan nga adda iti sangoda.

selpon. Kailangan ko ang serbisyo mo...”

“Mahal akong sumingil, alam mo yan?”

“Nakahanda akong magbayad ng singkuwenta mil. Isang tao lang ang ililigpit mo.”

Nagkatawa ti lalaki. “Nagbibiro ka ba? Kasla insulto dayta, Puting Lawin. Saanak nga agpapatay para iti singkuenta mil laeng... Maghanap ka na lang ng iba...”

“Magkano ba ang tanggap mo?” “Kalahating milyon.” Nagkatawa ni Manuel. “Anong akala mo sa akin, namumulot lang ng pera?”

“Dika man, Puting Lawin... saannak nga inawagan no saan a narigat ti ipaaramidmo. Addan binayadam ngem saan a nagballigi, siguradok dayta.”

Nakaun-uneg nga anges ni Manuel ti nangngeg ti mayor.

“Dimo sayangen ti orasko... mayatka iti presiok wenno saan?” Naturay latta ti timek ti lalaki.

“Dakkel unay ti dawdawatem. Saanen a narigat ti trabahuem. Adda iti ospital. Naka-confine gapu kadagiti sugatna.”

“Ngem nalaing siguro a talaga ta nakalasat... ken napatayna dagiti taoyo... lima gasut a ribu... take it or leave it.”

“Sangagasut.” Nagkatawa ti lalaki. “Agangangawka, Puting Lawin... Adios!” “Agurayka!”

Nadlaw ti mayor ti pannakataranta ni Manuel.

“Boss, nangngegmo ti kunana?” nangngeg ti mayor ni Manuel. Napaanges iti nauneg ti lakay. “Tauhan ka lang pala...” kinuna ti lalaki. “Kausapin ko ang boss mo..” “Boss... ania, kasaritayo?” “Saanen... Idiayaam iti 250K... husto daytan... No dina awaten, tallikudam a dagus... sikapam...” “Okey, boss.”

“Ania?” kinuna ti lalaki. “250K... take it or leave it.” Sinublat ni Manuel ti kinuna ti lalaki.

“Tallikudamon,” kinuna ti mayor ken ni Manuel.

“Wen, boss... tinallikudakon... pumanawakon...” Nagkatawa ti lalaki. “Agurayka!” “No dimo kayat ti 250K, lipatemon...”

Nagkatawa ti lalaki. “Fifty percent down, fifty percent kalpasan ti trabaho.”

“Deal... Adda iti daytoy nga embelop ti 125K a pauna ken ti ladawan ti target. Adda pay selpon ditoy a nakaipanan ti numero nga awagam no malpasmo ti kontratam.”

“Ti adres ti target?”

“Kas nakunakon, adda ita iti ospital. Isu laeng ti gundawaymo a makapapatay kenkuana. No saanka nga agballigi, awanton ti namnamam a mapapataymo pay. Naawatam?”

“Roger that...” kinuna ti lalaki ngem nagkatawa. “Awan pay ti nakapaayanmi.”

Nagkatawa met ni Manuel a kasla makiang-angaw. “Daytoy siguron ti umuna a pakapaayam...”

Nagrasaw ti lalaki. Madlaw ti suronna. “Nakurang kadi ti panagtalekmo kaniak? Kayatmo ta ideliberkonto ti ulo ti target iti balaymo?”

“Saanen a nasken... ammominto lattan.”

“Ket pumanawkan!” imbilin ti mayor ken ni Manuel. “Umad-adayoakon, Delta... umad-adayoakon.” “Good... Siguraduem laeng a mamonitormo dagiti mapaspasamak. Kayatko a maimatangam ti pannakapapatay ni John.”

“Roger that, sir... Agderetsoak iti ospital. Siguraduek a maipaknida ni John.”

“Ania ti panagkunam, kabaelanda?” Serioso itan ti mayor. Gapu ta iti kanito nga agkibaltang pay dagitoy, dinan ammo no ania pay ti aramidenna. Maib-ibusen dagiti pagpilianna. Awanen ti nabati a tartarigagayanna iti biag no di ti pannakaipakni daytoy a kaanakanna. Ta agingga a sibibiag daytoy, agbalinto nga ar-aria iti pannakatay ti anakna. Burburiborento latta ti konsiensiana no saanna a maibales.

Ken agamak a maduktalan ni John nga isuna ti akin-utek kadagiti adun a pannakagandat ti biagna. No labanan ti kaanakanna, kabaelanna ngata a sarangten?

NAKAPARPARDAS ni Richelle a timmaray. Dineretsona ti ridaw. Dina kayat ti maipanaw iti Amerika. Saanna nga ipalubos nga ipanda iti Filipinas. Dina kayat ti agsardeng nga agbasa. Dina kayat a maipusing kadagiti adu a gagayyemna iti eskuela. Dina kayat a mapukawna ti suplayna a droga, ti kakaisuna a nabati a makaited iti ragsakna.

Ngem apagruarna iti ridaw, ginammatan ni Ricky. Naggulagol ngem saan a rinuk-atan ni Ricky. Madamdama laeng, addan ni Melanie iti yanda.

“Let her go, Ricky,” imbilin ni Melanie. Nagkuretret ti muging ni Richelle. Nagsardeng ti panaggulgulagolna.

Nupay masmasdaaw ni Ricky, inibbatanna ti balasitang.

Masmasdaaw met ni Richelle a nangtaliaw ken ni Melanie. Agsalsaludsod dagiti matana.

“Ania pay laeng ti ur-urayem? Nawayakan. Ala, tumaraykan... Inka iti kayatmo a papanan,” inkarit ni Melanie.

Napaestatua ketdi ni Richelle. Matiktikaw iti kayat ti

ikitna a mapasamak.

“Kayatnaka a salakniban ti inam... Nalipatam kadin ti napasamak kenka? Ti panangibaludda kenka? Ti panangtudokda kenka iti droga? Panagkunam, isuda ti makatulong kenka?” Nagwingiwing ni Melanie. “Kayatdaka a dangran... Immayak tapno isalakanka. No saannaka nga ipatpateg ti inam, panagkunam inawagannak?” Napanganga ni Richelle.

“Kabusorko dagiti tattao a nangkidnap kenka, Richelle,” innayon ni Rochelle. “Ni laeng Melanie ti talkek ken makabael a mangsalaknib kenka... Ngem saandaka a masalakniban no dimo kayat ti masalakniban... isu a pangngaasim ta denggennak...” Agsangsangiten nga agsasao.

Saan latta a makauni ni Richelle ngem makasursuron pay laeng. Kayatna ti makapanaw iti kawar ti linteg ti inana. “Nasaysayaat koman no binaybay-andak. Nalabit a naim-imbag koman a natayak ngem ti agtalinaedak a balud iti bukodmi a pagtaengan...” Nagbaragsot. Timmaray a nagsubli iti kuartona. Imbaltogna ti bagina iti katre sa nagsangit.

Napaanges iti nauneg ni Rochelle. Saannan a napengdan dagiti luana. Inkalubna dagiti dakulapna iti ngiwatna ta kayatna nga atipaen ti panagsangitna.

Immasideg ni Melanie. Inarakupna ti adingna. “Don’t cry... ubing pay... Maawannakanto met laeng,” inyay-ayona.

“I’m losing her, Melanie... I’m losing her,” insangit latta ni Rochelle.

Nagwingiwing ni Melanie. “You are protecting her...” “Ngem kaguranak... kaguranak nga inana...” “Mautobnanto met laeng dagiti biddutna. Agyamanto kenka iti kamaudiananna. Patibkerem ti nakemmo... Isardengmon ti agsangit. Siakton ti makaammo iti amin apaman a makagtengkami iti Filipinas.”

“Please take good care of her...”

“I will... I promise you... I’ll take care of her...” Intangwa ni Rochelle ti rupana. Kinitana ni Melanie. Dina ninamnama a kastoy a situasion ti mamaginnasideg kadakuada nga agkabsat. “Thanks for everything, sis... Diak la ammon no ania ti aramidek no awanka.”

“This is the least I could do, Rochelle... Now, what time is our flight?”

“Eleven thirty PM, Delta Air Lines...” Agsangit manen ni Rochelle. “Kasanoakto ngatan?”

“Adtoy ni Ricky, saannaka a panawan. Isu ti mangsalaknib kenka. Adda bukodna a security services ket nalaka laeng a makaala iti kaduana no namnamaenna nga agkasapulan iti tulong.”

“Ania ti aramidek, Melanie? Isukok kadi ti De Gianna Corporation? Diak ammo ti aramidek. Mabutengak iti mabalin a mapasamak no ituloyko nga ikarkarigatan nga alawen ti kompania... amangan no madadaelko laeng... amangan no ad-adda laeng a mapukawko ti nagrigrigatan ti asawak a binangon.”

“Agtalekak iti kabaelam, sis... Kumpetka. No kayatmo nga allangonen ti pakalaglagipam iti asawam, dika sumuksuko.”

News

ilo-ph

2023-03-16T07:00:00.0000000Z

2023-03-16T07:00:00.0000000Z

https://manilabulletin.pressreader.com/article/282007561602993

Manila Bulletin Publishing Corp