Dap-ayan 2023 ti GUMIL Filipinas, maangay iti Bangui National HS

Maangay ti Dap-ayan 2023 wenno ti tinawen a kombension ken literary seminar ti GUMIL Filipinas (GF) inton Mayo 5-7, 2023 iti Bangui National High School, Bangui, Ilocos Norte.

Daytoy ti napagnunumuan iti Special Board Meeting dagiti opisial ti GF, babaen ti panangidaulo ni Remy N. Albano, presidente ti GF ken agdama a Bise-Gobernador ti Apayao, a naangay idi Pebrero 18 iti Sola Hotel iti San Nicolas, Ilocos Norte.

Ti Dap-ayan 2023 ti umunanto a panaguummong a rupanrupa dagiti kameng ti GF manipud idi 2019. Naangay ti kaudian a Dap-ayan babaen ti online idi Agosto 2021.

Maangayto iti nasao a Dap-ayan dagiti lektiur ken workshop iti panagsurat iti daniw, piksion, ken salaysay para kadagiti mannurat a kameng ti GUMIL, dagiti mannursuro, estudiante ken asino man nga interesado nga agadal nga agsurat. Mainayon iti lektiur dagiti maidatagto a sukisok mainaig iti kultura, pakasaritaan, wenno iti pagsasao nga Ilokano manipud kadagiti researcher kadagiti unibersidad.

Paset pay ti pasken ti pannakarambak ti maika-54 a tawen ti GUMIL babaen ti espesial a programa para iti cultural presentation, pannakapadayaw dagiti Pedro Bucaneg awardee, pannakayawat ti premio dagiti nangabak kadagiti salip iti panagsurat, pannakabalangat ti Mrs. GUMIL Filipinas, ken pannakayalnag dagiti libro iti Ilokano a sinurat dagiti kameng ti gunglo.

Agbayad ti tunggal delegado iti Dap-ayan iti PhP1,500 para iti seminar kit ken para iti akomodasion ken makan iti tallo nga aldaw a pasken.

Kadagiti interesado nga agatendar, mabalinda ti umasideg kadagiti provincial chapter iti lugarda. Maibalakad met ti panangbisita iti FB page ti GUMIL Filipinas para kadagiti sumarsuruno a pakaammo mainaig iti Dap-ayan 2023. (NMEV)

“Ay-ayatek ti asawak. Intedna ti amin kaniak... Lang-ay, ken amin a kinalikagumak, impaayna. Saanko koma a nananam dagitoy no saan nga isu ti naasawak.”

“Oh, come on, sis... minilion a doliar ti imbati ti amata kadata.” Kuarta nga agingga ita, masmasdaaw pay laeng no sadino ti naggapgapuanna.

“Wen, ngem...” Pagammuan la ta nagmalanga ni Rochelle. “Wen, hustoka... Uray no sagpamisan laeng a nagpakpakita kaniak, nariknak ti kinapategta kenkuana... nga ipatpategnata...” nakakapkapsut a kinunana.

“Wen... nupay iti agduma a wagas...” naisawang ni Melanie. Dina ammo ta kellaat a simmallin ni John Villa iti panunotna. Ni John a gayyem ti amana.

Timmangad sa napaanges iti nauneg. Kinemkemna dagiti sangina ta uray no sangkadagullitna iti bagina a nalipatannan ni John, ad-adda met nga isu ti agsalsala iti panunotna.

Ita, agturong iti Filipinas tapno idiay nga ilemmengna ti kaanakanna. Ti laeng ikarkararagna, saanto nga agkuros ti dalanda ken John.

LINUKTAN ni John ti ridaw. Immuna a naibaskag kadagiti matada ken Daniel ti maymaysa nga stretcher iti tengnga ti panakkelen a kuarto. Nakakumot daytoy. Nagderetso ni John iti stretcher. Nagsardeng iti abay daytoy. Nabati ni Daniel a nakatakder ti pangadaywen.

“Sir John Villa?” Nasinga ni John iti panagtimek ti lakay a coroner.

Limmingay ni John ti naggapuan ti timek. “Wen?” insungbatna. Immasideg ti lakay iti stretcher. Inin-inutna nga inlukais ti ules a naikumot iti natay. Tinengngel ni John ti panagangesna, ket idi agparang ti nakabesbessag a rupa ni Armina, agruprupikin dagiti sangina. Nagrittuok dagiti ramayna iti irut ti panangmesmesna. Saan nga agkutkuti. Nakakali lattan dagiti matana iti rupa ni Armina, ti babai nga ay-ayatenna— nga iti sumagmamano laeng nga oras ti napalabas, adda a sibabalud kadagiti takiagna. Sibibiag nga ar-arakupenna. Umang-anges. Sibabara ti bagina.

Ngem itan, nakalamlamiisen. Nakataltalinaay ti nabessag a rupana a kasla sipupuso a nangawat iti kastoy a gasatna.

Immanges ni John iti nauneg. Agtuptupa latta dagiti sangina. Dina maipeksa ti umukuok a sakit ti nakemna. Ammona la ngaruden nga agbanag a kastoy... a matay ti asino man a babai nga agayat kenkuana. Ngem no apay a pinalubosanna ti bagina nga agayat manen!

Kabayatan ti panagipalawag ti lakay a mangitudtudo kadagiti nagdalanan dagiti bala iti bagi ni Armina, napukawen ni John ti panunotna. Manipud iti lansad ti barukongna, imbulosna ti nakapigpigsa a riaw.

“Apay, Diosko! Apay!” intangadna nga impukkaw iti bobeda. Apay a sabali ti agikaro tapno laeng madusa? Iniggamanna ti nalamiis a dakulap ni Armina. Piniselna. Nagintek dagiti matana iti daradara pay laeng a nalsok a bado ni Armina— iti mismo a pusona.

Ammona, saan a ti bala ti nakatayan ni Armina...

Ti lunod!

“Intan, manong...”

Liningay ni John ni Daniel. Saanna a kayat a panawan ni Armina. Kayatna a matmatmatan nga awan ti patinggana. “Agserrakamin, sir,” kinuna ti lakay.

“Intan, manong,” kinuna manen ni Daniel. Naglingaling ni John. Liningayna pay naminsan ti nakabesbessag a rupa ni Armina. Nagdumog ket indingpilna dagiti bibigna iti muging ti nalamiis a bangkay ti balasang. Nagkidem. Timmallikud.

Nakiabay ken ni Daniel a rimmuar iti kuarto.

“Ania ti naammuam kadagiti rimmaut iti balay?” kasla awan iti panunot ni John a nangsaludsod ken ni Daniel kabayatan ti pannagnada.

Nagsennaay ni Daniel. “Sori, manong, ngem shoot to kill ti inaramidko tapno saandan a makadangran pay iti sabali. Madanaganak ta amangan no sumrekda pay iti balay... delikado da Jay-ar ken ni nana...” Immanges iti nauneg ni John.

“Ti laeng siguradok, Intsik dagiti natay. Ngem saan kadi a kunam nga ammomon no asino ti nagbilin?”

“Ikarkarigatak a di patien... ”

“Ibagam laeng no kaano nga agsingirta, manong. Nakasaganaak.” Nagwingiwing ni John. “Adda pay laeng sugatmo. Aginanaka pay... agpalaingka.”

“Kabaelak. Saanka a madanagan.”

“Mapanak iti mismo nga urat daytoy. Paneknekak no asino a talaga ti akin-aramid ket saanak nga agsardeng agingga iti saanak a makasingir. Agpatinggan ditoy...” Inruar ni John ti selponna. Nagdayal.

“Hello,” insungbat ti adda iti bangir a linia.

“I need help...”

“Go ahead...”

“Matandaanam daydi gayyemmo a nang-hack iti bank account daydi nakalabanko a nangato nga opisial ti CIA?”

“Daydi naki-deal kadagiti drug lord? Daydi sinaedtayo ket innalatayo ti naibayad kenkuana a kuarta sa kinarsantayo ti bank account-na... no isu, wen.”

“Wen. Kayatko nga aramidentayo manen.”

“No problem... He can do that. Just give me the name and any information you can provide. I’ll call him and he’ll take care of the rest.”

“I’ll text you the informa—” di naituloy ni John ti ibagana ta pagamammuan la ta adda nangdungso kenkuana ket naipideg iti diding ti pasilio. Natnag ti selponna iti datar.

NAANNAYAS ti biaheda iti freeway nga agturong iti Los Angeles International Airport. Ni Ricky ti agmanmaneho. Adda iti likud da Melanie ken Richelle. Nakaul-ulimek ti balasitang. Nupay kasla napaannugotdan a mapan iti Filipinas, nakisinsinnungbat pay laeng iti inana agingga iti dida nakapanaw. Inulit-ulit daytoy ti isusupiatna iti panangipaknida kenkuana iti Filipinas.

Ngem napilitda met laeng nga immannugot. Nupay kasta, iti kaungganna, supsupiatenna latta ti pagayatan ti inana.

Pimmuskol dagiti lugan iti freeway ket ad-adda a gimminad ti trapiko. Ti 65mph nga speed limit ti freeway, nagbalin laengen a 15mph. Alas onse ti flight-da. Alas siete pay laeng, adda pay makaanay a panawenda a makagteng iti airport iti umno nga oras.

“Melanie, check 6 o’clock,” nasinga ni Melanie iti timek ni Ricky. Napamuregreg ni Melanie ngem limmingay iti likudanda. Maysa a nangisit a pickup ti nakapaspaspas ti tarayna a mangsallisallin kadagiti lugan iti sanguanan daytoy.

“Ania ti panagkunam?” sinaludsod ni Ricky.

“Possible trouble,” insungbat ni Melanie. Linuktanna ti bag-na a bassit ket inruarna ti Glock .40 a paltogna. Inuksotna ti magasin daytoy. Kinitana no adda met laeng balana sa insublina met laeng.

Nakamuttaleng lattan ni Richelle a mangbuybuya iti antina.

“Don’t say anything... do you hear me?” kinuna ni Melanie ken ni Richelle. Nagtung-ed ni Richelle sa nagsalikepkep a nagpalunapin iti suli ti lugan. “Yaw-awanmo. Partakam bassit ti agpataray...” imbilin ni Melanie ken ni Ricky.

“A kasla adda pay seksekanta... Nakapuspuskol ti lugan...” Nupay kasta, pinadas latta ni Ricky nga unaan dagiti adda iti sangoda. Ngem naginadda latta ket umasideg nga umasideg ti lugan a mangip-ipus kadakuada.

“Is someone trying to harm us again?” saan a nalapdan ni Richelle ti nagsaludsod.

Nagtung-ed ni Melanie. “Kastoy ti kinapeggad ti pagsasaadan ti biagmo ita...”

“Ania ti kayatmo a sawen...?” makariknan ti balasitang iti panagbuteng.

Sakbay a nakasungbat ni Melanie, kellaat a nadungpar ti luganda. Dardarurosen idan ti pickup ket maidungpardan iti nainayad a lugan nga adda iti sangoda.

(Maituloyto)