Kayatna a Bukodan Dagiti Tawidda a Daga

Dear Ikit, Siak ti buridek iti siam nga agkakabsat. Siak laeng met ti di nagturpos iti kolehio ta, akuek, adda kunkunengko idi ken kangrunaanna, nasikogak ti nobiak ket kapilitan a nagkasarkami iti sanguanan ni Apo Mayor. Nagtalonak ngarud ket iti kaasi ti Apo, napadakkelmi met dagiti annakmi ket agkolehiodanton. Umapal met dagiti annakko a makapagkolehio a kas kadagiti kakasinsinda isu a mapampanunotko ti mangisalda no di man mangilako iti sumagmamano a parsela ti daga a taltalonek a tawidmi nga agkakabsat kadagidi nagawan a dadakkelmi. Iggem ti inaunaanmi dagiti titulo a nainagan pay laeng kadagidi dadakkelmi. Saan kadi a rumbeng a siak laengen ti agtawid kadagitoy ta sisiak met a di nakaadal numona ta parikutko ti pagbasanto dagiti annakko?—Simon Kaanakan, Panagkunak, di la ketdi ipalubos dagiti kakabsatmo nga isalda wenno ilakom dagita pakalaglagipanyo kadagiti immuna a kaputotanyo. Kukuayo amin nga agkakabsat dayta. Adda linteg maipanggep iti dayta. Ngarud, agpakumbabaka kadagiti kakabsatmo. Dimo itangsit a sika ti rumbeng nga agtawid gapu ta sika laeng ti di nakaadal. Di pay ket nagsuertekan. Basolmo ti kasta a kasasaadmo. Agpakaasika ketdi a tulongandaka iti panagadal dagiti annakmo tapno didanto maipada kenka. Nalaka met ti magastos kadagiti kolehio ti gobierno ken no aglalaing dagiti annakmo, mabalin a makaalada pay iti scholarship. Ti kadakkelan koma a problemam ket ti di panangayat dagiti annakmo nga agkolehio. Ngem saan met ta interesadoda a makapagkolehio, nalabit gapu ta dida kayat a maipadanto dagiti annakda nga agrigrigat a kas ita. Dayta koma ti mangkarit kenka.—Ikitmo (Adda kadi problemayo iti biag a kas koma iti pakaseknan ti pamilia, ayat, wenno sabali a tattao wenno am-ammoyo? Agsurat iti “Dear Ikit” iti daytoy nga email address: eden.bulong@yahoo.com. Mabalinyo met a kiddawen ken ni Ikit Eden nga ilimedna ti kinasinoyo inton maipablaak ti suratyo.—Editor)