Ti Lakay nga Aso ken ti Lobo

IDI un-unana a panawen, adda mannalon nga addaan iti aso. Idi naubing pay ti aso, adu ti maitultulongna iti mannalon. Ngem idi lumakayen, saan met unayen a pagan-ano ti mannalon ta bassit metten ti maitultulongna, no adda man.

Ania ngarud, di met unayen pakpakanen ti mannalon. Iti pay ketdin ruar ti alad ti pagturturoganna.

Iti maysa nga aldaw, nasangaili ti lakay nga aso ti maysa a lobo. Kinuna ti lobo nga idi uken pay laeng, insalakan ti aso ket ita, umay agbayad iti utangna a naimbag a nakem.

“Adda kadi maitulong kenka, ama?” sinaludsod ti naubing pay a lobo. “Apay a kasla malmaldayka?”

“Ayna, barok a lobo,” kinuna ti lakay nga aso, “kas makitam, nakuttongakon iti kaawan unayen a makanko. Ta ti amok a mannalon, dinak met unayen pakpakanen. Ket kinugtarannak pay idi sumrekak iti inaladanda isu a ditoyakon a matmaturog. Ta lakayakon ket awan kanon serserbik. Saan a kas idi kaub-ubingak pay nga adu ti maitultulongko.”

“Kaasika payen, ama,” kinuna ti lobo ket nanglangitlangit ta agpampanunot no kasano a matulonganna ti lakay nga aso. Iti di nagbayag, kinunana, “Makitam, ama, ‘diay asawa ti mannalon? Indissona ti tagibida a lalaki iti sirok ti karison tapno saan a mainitan. Alaek ti anakda ket itarayko. Kamatennak met bayat ti panagtaultaulmo tapno madlawdaka ti mannalon ken ti asawana. Inton makamatannak, kagatennak uray awanen nabati a ngipenmo. Aggubalta. Ibbatakto metten ti ubing.”

Ngarud, napan innala ti lobo ti ubing sa intarayna. Inkarigatan met ti lakay nga aso a kinamat daytoy bayat ti panagtaultaulna. Idi makamatanna ti lobo, kinagatna ti lobo ket naggaboda idinto a ti ubing, naibbatan ti lobo ket kasta unayen a sangitna.

Ti asawa ti mannalon ti immuna a nakakita iti napasamak ta nangngegna ti panagtaultaul ti lakay nga asoda. Inyikkisna: “Lakay, lakay, ti anakta, intaray ti lobo! Dimo kadi makita? Isalakanmo ti anakta!”

Anian a kigtot ti mannalon idi makitana ti intudo ti asawana. Apagisu a ti panaggubal ti aso ken ti lobo ti nakitana. Nagtaray ti mannalon a napan iti yan ti aso ken lobo ngem sakbay a nakadanon iti yanda, nagtartarayen ti lobo nga immadayo.

Dagus nga inakup ti mannalon ti putotna nga apagkarayam pay laeng sa kinunkunana bayat ti panangap-aprosna iti ulo ti lakay nga aso: “Anian a nagturedka! Uray lakay ken tuppolkan, inkarigatam ti nangtulong kadakami iti panawen a kasapulanmi unay ti tulong. Dimo intulok a dakes ti pagbanagan ti anak dagiti amom.”

Manipud idin, tinartarakenen ti mannalon ti lakay nga aso. Binigat nga ikkanna iti kanenna a nakadakdakkel a tinapay a kaadadaw iti orno.—O

(Sarsarita idi ugma iti Ukrainia.)