Tips

DIMO MALAGIP TI NAGANNA?

Adda dagiti gundaway nga iti laksid a nabiit pay a nayam-ammo kadatayo ti maysa a tao, ditay metten malagip ti naganna. Kuna dagiti eksperto iti memoria a maigapu daytoy iti nakurang nga atensiontayo no kasta a mayam-ammo kadatayo ti maysa a tao, saan ket a gapu ta saantayo a nalaing nga agikabesa iti nagan. Ngarud, no mayam-ammo kenka ti maysa a tao, ipasulim pay laeng dagiti dadduma a pampanunotem ket sanguem daytoy a tao, kadagiti matana ti pangiturongam kadagiti matam, ken dumngegka. Pagbalinem dayta a kanito a ti prioridadmo, isu ti pannakalagipmonto iti naganna. Apaman a naibaga ti nagan ti tao, ulitem a baliksen ta ti panangulit, adadda a pagtalinaedenna dayta nga impormasion iti utekmo, nangruna no narigat a baliksen ti nagan ti tao, wenno dika sigurado iti ispeling ti naganna. Makatulong pay ti pananginaigmo ti naganna iti ania man a banag wenno mangpanunotka iti ladawan a mabalin a panginaigam iti naganna. Kas koma “Leo” ti naganna, mabalin nga iladawam iti panunotmo ti ayup a leon.

SURSURUAM TI ASOM NGA AGMAYMAYSA.

Maibilang dagiti aso a kas “social creatures” wenno agkasapulan iti kalangenlangen wenno kadkadua. Nupay kasta, adda met dagiti kanito nga awan kadkadua ti aso nangruna no adda trabaho ti amona (wenno ti akintaraken iti daytoy). Ket no di naruam ti aso iti kastoy a kasasaadna, mangibunga iti problema kas koma iti panagbalinna a managpupungtot a mabalin a makaigapu iti panagdadaelna. Ngarud, no uken pay laeng daytoy, sursuruamon nga agmaymaysa wenno imulam iti panunotna a saan nga iti amin a kanito ket adda kadkaduana. Ibalakad dagiti eksperto iti panagtaraken iti aso a dimo ipalubos a surotsurotennaka lattan ti uken; ketdi sursuruam nga agtalinaed iti maysa a lugar a komportable daytoy.

DIMO IPALUBOS A TUMANGKEN TI

PUSOM. Kuna dagiti kardiolohista a gagangay a mangrugi a tumangken dagiti piskel ti puso no magteng ti tao ti edad 50 a mangibunga iti panagpakarigat ti puso nga agibomba iti dara iti amin a paset ti bagi. Maaw-awagan daytoy iti diastolic dysfunction. Iti kastoy a pasamak, saan a makapaginana ti puso kalpasan ti tunggal panagbitekna; ngarud, mapapardas ti “panaglakay” wenno “panagbaketna.” Nupay kasta, kuna dagiti kardiolohista a makatulong iti pannakalapped ti daras itatangken dagiti piskel ti puso ti regular a panagwatwat ken ti panangsiput kadagiti ipapauneg a taraon. Maibalakad pay ti dagus a panagpakita iti kardiolohista no adda man maysa a mariknam kadagitoy: panangkamatkamat iti anges, napardas a bitek ti puso, panagkakapsut, no aguyekka ket adda mairuarmo a derosas ken kasla adda labutabna a turkak, wenno lumlumteg dagiti gurong, lipaylipay ken sakam.