Ni Janella ti ‘Dyesebel’?

Showbiz NAGWARAS iti social media itay napan a tawen a ni Andrea Brillantes ti agakem a “Dyesebel” ken kaasmangna ti nobiona a ni Ricci Rivero. Saan met ketdi a kinompirmar ti ABS-CBN ngem kunada ngarud a no adda asuk, adda apuy. Ti adatna, saan sa a napuotan ni Roberta Arevalo nga anak daydi Mars Ravelo (autor ti Dyesebel) daytoy a sayangguseng ta idi nasaludsod no asino ti kursonadana nga agakem iti nasao nga istoria (teleserye), ni met Janella Salvador ti kunana. Ti nakaay-ayat pay, kuna ketdi ni Nana Roberta, kaykayatna a no mabalin, umuna a maiteleserye ti “Captain Barbell” sa dinakamatna ni Daniel Padilla a mabalin nga agakem iti daytoy. Sa impaipusna a nalatak latta ti asmang da Daniel ken Kathryn Bernardo uray no maipadpadamag ti umadanin a panagkallaysa dagitoy. Maipapan iti sabali pay a sinurat daydi Mars Ravelo a “Lastikman,” kuna ni Nana Roberta nga awan ti makitana ita a komediante nga umisu nga agakem. * * * Gapu iti kontrobersia mainaig iti maysa nga eksena iti “FPJ’s Batang Quiapo” a naiparparipirip a dakes ti kababalin dagiti Muslim, napan a mismo ni Coco Martin iti opisina ni Senador Robin Padilla, a maysa a Muslim, tapno dumawat iti dispensar. Nasayaat met ti palawag ni Coco isu a dagus a naawatan ni Senador Padilla. Nagangayanna, nangipaulog ni Senador Padilla iti statement a nangdayawanna ken ni Coco. Dinakamatna a naimbag met a tao, aktor, ken direktor ni Coco.—O