Ammuem Pay Dagitoy

GONZAGA, CAGAYAN. Bayat nga ibabbaba dagiti mangngalap dagiti nakalapanda nga ikan, agiinnuna met dagiti komprador wenno aggatang. Aggatad iti PhP3,500.00 ti sanga-tumbler. Kastoy ti masansan a buya tunggal sumangpet dagiti napan nagkalap: agpapada a naariwawa ken naragsak dagiti komprador ken mangngalap. (ROSELYN C. CAMPANO)

BALLESTEROS, CAGAYAN. Maay-ayatan daytoy nga ubing (Angela Rael A. Ronquillo) ti Brgy. Sta. Cruz, Ballesteros, Cagayan a nangbagkat iti inapitda ken tatangna a laplapayag manipud kadagiti nagpatubuanda a sanga ti katuday. Maibatay kadagiti panagsukisok, adu ti maipaay ti laplapayag (wood ear mushroom) a pagsayaatan ti salun-at, kas iti panangsaluadna iti dalem, panangibabana iti dakes a kolesterol, ken pannakapagtalinaed ti kinasalun-at dagiti bagis. Nangato pay ti imet ti laplapayag a linabag wenno nginabras (fiber) ken antioxidants. (JOBERT M. PACNIS)