Manila Bulletin

Ti Gasatmo

Ni MADAM CHARISMA

PISCES (Pebrero 20- Marso 20). Saanen nga agbayag iti sidongmo dagiti madi a nakairuamam. Kangrunaan a maragsakan ditoy dagiti adda iti asidegmo. Maamirismo met ita a napatpateg a taliawen dagiti parabur nga adda laeng iti aglawlawmo ngem ti mangwanawan iti adayo. Nagasat a numero: 3, 5, 8.

ARIES (Marso 21- Abril 20). Masapul ti kinaannad nangruna ita ta sensitibo dagiti adda iti aglawlawmo. Ammuem dagiti limitasion ti tunggal indibidual. Bigbigen ti karbengan ti tunggal maysa. Kangrunaanna, dimo koma paidaman ti bagim nga agragsak. Nagasat a numero: 2, 4, 9.

TAURUS (Abril 21- Mayo 20). Ti namaris nga ayan-ayat ti mangtaginayon iti enerhiam. Ti nakaro a pannakisinninged ken pannakisala ti mabalin a mangpaginad iti panagdurasmo. Masapul a makaiwayatka iti pamuspusan tapno awan ti madungiram wenno masalaponmo. Nagasat a numero: 1, 5, 8.

GEMINI (Mayo 21- Hunio 20). Masuot ti kabaelam a mangiwardas kadagiti indibidual a dakkel ti paset iti biagmo ken pangnamnamaan ti sabali pay a tattao. Agtalinaedka laeng a napudno iti kinapudno, awan ti pakadadaelam. Sursuruen met no kaano nga ibaga ti saan ken madi. Nagasat a numero: 3, 6, 7.

CANCER (Hunio 21- Hulio 20). Tiempo ti panangipaigid kadagiti daan ken panangabrasa kadagiti baro. Luktan dagiti ridaw ken tawa para kadagiti baro nga oportunidad iti panagbalbaliw ken panagdur-as. Nupay kasta, bigbigen no ania kadagiti daan ti makaipaay latta iti pagimbagan. Nagasat a numero: 1, 4, 9.

LEO (Hulio 21- Agosto 20). Adda dagiti baro a singasing wenno diaya para iti dakdakkel a panguartaan. Nupay saanka unay nairuam nga adda dagiti sumngat iti pagrikrikusam a lubong, adda dumteng a makitam met a dakkel ti maaramidanna iti panagimbag ti biag ken propesionmo. Nagasat a numero: 2, 6, 8.

VIRGO (Agosto 21- Septiembre 22). Maikkanka iti gundaway a mangbalabala kadagiti addang para kadagiti masungad a bulan. Addaanka kadagiti kabarbaro nga inspirasion isu a nakasaganaka a mangsaranget kadagiti baro a karit wenno pannubok ken pagrebbengan. Nagasat a numero: 1, 5, 9.

LIBRA (Septiembre 23- Oktubre 22). Makailatang iti tiempo para iti panangpapigsa iti salun-at ti pisikal a bagi, ken ti panunot. Adda ketdi dagiti pagrebbengan a nasken a sanguen a dagus. Agmaris ti aglawlaw gapu iti sam-it ti ayan-ayat. Nagasat a numero: 3, 4, 7.

SCORPIO (Oktubre 23- Nobiembre 22). Adda dagiti parikut iti panguartaan gapu ta dimo natungpal ti karim nga agbalin a saan a nabarayuboy. Pagimbaganna, adda dagiti maidiaya a gundaway a pangawidan iti nayon a maganar. Adda ketdi dagiti kabaelam ita nga ipaigid a material a kasapulan tapno maurnos ti badiet. Nagasat a numero: 2, 5, 8.

SAGITTARIUS (Nobiembre 23Disiembre 20). Kitaen a naimbag dagiti paggastosan ken amin a mainaig iti kuarta. Saanen a maitutop ita ti pasagid laeng tapno agpabunarka. No man pumaluboska iti pirak, siertuen nga adda met laeng agsubli a pakairanudan. Nagasat a numero: 1, 6, 9.

CAPRICORN (Disiembre 21- Enero 19). Mabalabala a naimbag no kasano nga iwaras ti agsobsobra nga enerhia. Mabalinen a mairusat ti plano a naipaigid gapu iti pandemia. Iti tay-ak ti ayat, mabalinen a sublian ti nangikari kenka iti ayat. Nagasat a numero: 2, 4, 8.

AQUARIUS (Enero 20- Pebrero 19). Dakkel ti maitulong kenka dagiti kabaruanan a teknolohia, kasta met nga adu ti maadalmo babaen ti panagbiahe kadagiti asideg wenno nawaya a lugar. Agpannuray ngamin ti pagrang-ayam ita kadagiti banag a mainsiarmo a naimbag. Nagasat a numero: 1, 5, 7.

News

ilo-ph

2023-03-16T07:00:00.0000000Z

2023-03-16T07:00:00.0000000Z

https://manilabulletin.pressreader.com/article/282248079771569

Manila Bulletin Publishing Corp