Dandaniw a Para Ubbing

Umayen ti Kalgaw

Ni FREDDIE PA. MASULI Ay, segseggaak daytoy umay a kalgaw Naragsakkamto la ketdi kas kadagiti pagaw Agay-ayam kadagiti kinelleng a naggapasan Agkakatawa nga aglulumba iti kinnamatan! Mapankamto idiay baybay nga agpipiknik Buyaenminto pay da angkel nga agdaklis Makiguyodkam’ iti iket, inkam makipagmarit Tapno adda mabingaymi a sadiwa a bilis. Iti bangkag da lilong, inkamto pay agpuros Bunga ti sandia, sam-itna ti napalaus Ulienminto pay dagiti kaimito ken guyabano Bungadat’ naimas ken nasustansia a pudno. Uray ngumisitkamto manen gapu iti pudot Dimi iginggina ta ubbingkam’ a di naardiod Agkikinnamatankami ketdi iti bangkag Tiempo ti lang-ay, ay-ayam ken gargarakgak!

Nadumaduma a Panawen

Ni ROSELYN C. CAMPANO No nakalikuden ti bulan ti Mayo ken Hunio Umayen ti arbis, pagammuan agtudo Maawagan iti nepnep daytoy a tiempo Naimas ti agdaldalikepkep ken agkaldo. No pasaray agsalan dagiti kawayan Kasta met a naapres ayus ti karayan Agsagawisiw ti angin a kasla maayatan Tiempo ti bagyo nga agkakamakam! No ti parbangon saanen a makumotan Uray la sumgarka iti pug-aw ti amian Panawen ti lamiis, pagimeng ti mausar Tiempo ti Paskua, nalubo ti arubayan! Ngem no makasinit ni Apo Init iti aldaw Adda angin ngem kasla saan a madmadlaw Nagpauyo ti tudo, nangato ti ulep a puraw Ay, sierto a nadagaang ti tiempo ti kalgaw.