Gulluong

KABUS. Ngem saan a malawagan ti panunot ni Leroy. Talaga nga ibalesna ita a rabii ti panangpatay ni Popoy ken ni Troy, ti agtawen iti sangapulo a kakaisuna nga anakna. Naitabon idi kalman ni Troy. Naggulgolda a napanawan itay bigat. Ngem saan a nayanud ti kimpet kenkuana a leddaang. Ket itay nagpalaud, saanen a naigawid ni Kisha a baketna nupay agsangsangit daytoy.

Addan ni Leroy iti kamarin iti dayaen ti balay da Popoy. Nakapayabyab, nakatakder iti akin-amianan a sango a teddek. Nasipnget iti yanna. Nairut ti panangpetpetna iti putan ti kuarentay singkona nga ita laeng nga iruarna.

Kinasuron idi ni baketna ti pananggatangna iti paltog ta isu kano ti mangisagmak kenkuana. Isublik, kinunana. Ngem kinapudnona, inlemmengna. Ta adda pangisangsangratanna.

“Para kenka daytoy, anakko,” inngarietna. Umam-ammingaw dagiti luana. Adu ti arapaap ni Troy. Kayatna ti agdoktor. Librento kano amin nga agasanna a napanglaw. Nupay ubing, naluomen ti panunotna. Ngem dimmagan dagita nga arapaap gapu ken ni Popoy!

Natay ni Troy ta naipakpak ti likud ti ulona iti semento iti panangiduron ni Popoy. Nagpulong ngamin ti anak ni Popoy a nadusag ni Troy ti matana iti panag-rebound-da iti panagbabasketbolda. Pinaturongan pay kano ni Popoy iti paltog ni Troy. Intarayda iti ospital ngem awan gasatna.

Dina namnamaen a maipaayan iti hustisia ti anakna. Kabutbutengda ni Popoy ta tao ti mayor. Ket bagi dagiti nabibileg a kas iti mayor ti linteg. Ngem adda met bukodna a linteg. Matay-pumatay. Ket ipakapetna met ita dayta. Masapul nga agpatinggan ti panagintuturay ni Popoy.

Idi kalman, sinipatsipat man kanon daytoy ti anak ti agkaskasera iti putputong iti abagatan ti barangayda. Awan pay makabulan dagitoy ditoy lugarda. Magmagna kano ni Popoy ket nadungpar ti ubing nga agbisbisikleta. Kinamat kano ngamin ti aso a kaan-anak. Di natimbeng ti ubing ti bisikletana gapu iti butengna a makagat.

Ginagara ni Popoy ti ubing. Saan a masdaaw ni Leroy. Isunanto pay a tagaditoy, namin-anon a nagbabartekan ni Popoy? Anianto ketdin dagiti nabiit pay ditoy?

Kas gagangay, inapo manen ni mayor ni Popoy. Isu a saanen a nagreklamo dagiti nagannak ti ubing. Ti payen ina daytoy ti nagpadpadispensar. Siuulimek latta metten ti ama.

NAGSAGANA ni Leroy idi adda sumungad nga anniniwan iti bit-ang. Adayo pay ngem malasinnan daytoy. Ni Popoy! Agkiongkiong. Nabartek.

Inasutna ti paltog iti siketna. Impaturongna ken ni Popoy.

“Agsingsingpetkanto koma, baket,” naitanamitimna.

Ngem anian sa ta dina metten materred ti tigergerna? Ket umasidegen nga umasideg ni Popoy nga adda la ketdi met paltogna. Maisagmakka laeng, lakay!

Nagkidem. Immanges iti nakaununeg. Nagpatangkenanna ti paltog sa nagmulagat. Kalbitenna koman ngem napasardeng iti nakitana nga anniniwan iti likudan ni Popoy. Ni Patay? Tinagbatnan ni Popoy! Natumba ni Popoy. Simmaruno ti kasla di agressat a panagtagbat.

Nalasin ni Leroy ti anniniwan. Ti ama ti ubing a sinipatsipat ni Popoy idi kalman! Ammona, kas kenkuana, gimluong ti barukong ti lalaki.

Limmukay ti petpetna iti paltog. Inalistuannan ti immadayo.—O