Saludsodem ken ni Apo Hues RTC Judge Joven F. Costales (Ret.)

SALUDSOD:

Karinioso idi ni lakayko. Ngem ita, kalpasan ti agpiton a tawen a panagdendennami, daydi kinakariniosona, nagbalin metten a kinademonio. Ngamin, ammona metten ti uminum agingga iti agdiwerdiwer. Agkurang payen ti it-itedna kaniak a sueldona. Napia koma no dinak idi pinaglusulos iti trabahok ta aywanak la kanon ti anakmi a kasla ketdin napateg kenkuana ti putotna. Makunak daytoy ta nagbalin payen a naranggas iti anakmi. Adda pay ketdin atapko, Apo Hues, nga adda kulasisina ta masansan a maladaw a sumangpet iti trabahona ken adu pay dagiti pagilasinan a sabalin ti ar-aramidenna. Naminsan, naibagak daytoy kenkuana ket kinabilnak iti sango ti anakmi. Ania ti aramidek, Apo Hues? Kayatko met nga agbiagkami iti anakko a saan nga agbubuteng.—Teresa ti Pangasinan

SUNGBAT:

Agyamantayo ta addan linteg a mangsalaknib kadagiti babbai ken kadagiti ubbing. Isu daytoy ti Akta Republika 9262 wenno ti “Anti-Violence Against Women and their Children Act of 2004” wenno ‘tay pannakasaluad dagiti babbai ken annakda iti kinaranggas.

Ti kinaranggas, saan laeng a pisikal a kas iti pannakakabkabil, a kas kunam. Mairaman pay ti seksual (no ramesen ti ama ti anakna), sikolohikal

(no agpasar ‘tay babai wenno anak iti bugtak, riaw, pammutbuteng—ken uray payen ti dida pannakaaw-awat iti sustento). Ti maipataw a dusa iti aglabsing: 12 a tawen a pannakaibalud ken agmulta iti di nangatngato ngem P300,000.00.

Ngarud, usarem ti linteg a kas salaknibyo nga agina. Ti aramidem, agpakaduaka kada tatang ken nanangmo agraman ni Apo Kapitan ta inkay agpatulong iti DSWD dita lugaryo. Ipulongyo ti ar-aramiden ni lakaymo. Mabalinmo nga idarum ni lakaymo gapu kadagiti panaglabsingna iti babaen ti Akta Republika 9262. Mangipilaka pay iti korte iti pannakasustento ti anakmo. Wen, husto daytoy panagsuratmo kaniak tapno malawlawaganka iti aramidem. Dimo ipalubos a butbutngennaka wenno dangdangrannaka ni lakaymo agraman ti anakyo. Panawenen a tumakderka ket ilabanmo ti kalinteganyo nga agina nga agbiag koma met a sitatalinaay.—O