Manila Bulletin

Dagiti Sugat ti Daga (40)

Joel B. Manuel

Ti Napalabas: Naammuanen dagiti agngayangay a presidente ket nagplano a dagus ni BA. Pinagparangda nga adda nangisikat iti biag ni Mayor Moreno ngem awan ti namati ken bimmaba pay ti rating-na. Inserra ti gobierno ti pagminasanda iti Buraan Island ken binalud dagiti Marines dagiti trabahador idiay. Napan nakisarita ni BA tapno wayawayaanda dagiti trabahadorda— a tagabantay. Saan a pinatgan dagiti Marines ti dawatna. Idi makaawid, naammuanda ti kaadda dagiti nakaplakard a tagabantay nga agturong iti opisinada. Inkeddengda a maangay ti kickoff rally ti partidoda iti Templo Central ket napan kinasarita da BA ken Thor ti Pastor Heneral ti pammati nga akinkukua iti Templo Central. Mapagsasaritaanen dagiti tumaray a presidente. Ammo ni Sen. Shalani Zaldivar a ni BA ti mangsupsuporta ken ni Mayor Moreno ket tapno madadael ti mayor, masapul a dadaelenna met ni BA ken dagiti negosioda.

(Maika-40 a Paset)

SIMMANGPET nga agpayso dagiti summons ti Senado iti dayta a bigat. Sangsangpet ni Bileg Aurelio idi idisso ni Keith ti surat ti Chairman ti Senate Committee on Environment and Natural Resources ken ti summons ti Senate Committee on National Security.

“Immay kano inyeg dagiti kameng ti Senate staff,” inyisem ni Keith. “Oh, national media coverage daytoy, a?” kasla surdo a saan ti bugas ti isem ti balasang.

Narikna ni Bileg Aurelio ti ibabara ti pingping ken piditpiditna. Kinitana laeng ni Keith. Agsaruno ti date ti initial appearance-na, iti morning session ken ti afternoon session. Kaduana a respondent iti kaso iti panagminas ni John Rey Razon kas COO, ni Attorney Quidez kas corporate counsel ken dagiti miembro ti board ti Razon-Colorado Group. Ammo ni Bileg Aurelio nga adda met aminen summons dagitoy.

“Ania ti makunam?” dinamag ni Bileg Aurelio iti balasang.

“Sir, in aid of legislation, kunana iti dayta. So, saandakayo nga ibalud wenno sentensiaan, ngem ti publiko ti mangsentensia kadakayo,” insungbat ni Keith. “Mabalin a madadaelak,” kinuna ni Bileg Aurelio. “Adalenyo ti isungbatyo, sir,” kinuna ni Keith.

“Then call the board for an emergency meeting,” impinal ni Bileg Aurelio. “Ayabam man pay ni Quidez,” impakamakamna.

Rimmuar ti sekretaria. Ania ngata ti makuna ni Don Segundo Razon no koma ta maammuan daytoy ti kastoy a pasamakenna ken ni Arriztia? Ngem saan a makipaset dagitoy kadagitoy a pannakasubokna, kadagitoy a pannakasugatna. Ta isuda pay ketdi dagiti immun-unan a sugat ti kinataona.

No sumango iti Senado, sigurado a ‘ta la makaadu kadagitoy ti pagdamagan dagiti senador a ti dadduma kadagitoy ket agkakabsat, adda pay agama. Ken kamaudiananna, agkuros ti dalanda ken Shalani Zaldivar, ti senadora a natirad ti panagpampanunotna no di man ti panagdildilana.

Simrek ni Attorney Quidez kalpasan ti sumagmamano a darikmat.

“Attorney, are you drinking lately?” dinamag ni Bileg Aurelio ta kasla nakakarga ti langa ti abogado a kasla lumabanag pay ketdi ti rupana.

“Eh, eh, saan, sir.” Nagannawil ti abogado. “My wife had just left me for another man!”

“Aya?” nakuna ni Bileg Aurelio. “Wife? Nagasawaka kadin?”

“My common-law wife, sir,” insungbat ti abogado. “Nakasarak san iti ad-adu ti kuartana ngem siak, sir,” insennaayna.

“Mano ti tawenna?” nakuna dayta ni Bileg Aurelio ta nakaub-ubing met ti ipaspaskil daytoy iti Facebook. “Twenty-three, sir.”

Kellaat a kasla napiting ni Bileg Aurelio. Ket no ngata met addanto panawen a sinaan ni Keith? Ket mapukawna la ngaruden ni Riz, mapukawna pay ni Keith? Nagkiet.

“Okay, we will no longer talk about our partners,” impormal ni Bileg Aurelio. “Distractions from our business. We are summoned at the Senate. Need I say that to you? On two counts.”

Kasla nakariing ni Attorney Quidez ket minulagatan dagiti kimmapi a mata ni Bileg Aurelio.

“What is our chance of being put in hot water?” “Buraan mines is an old minesite, sir. Fifty years ti permit nga intedda. Why do they want to stop it?”

“We did not give any notice nga ag-operate-tayo manen, dayta ti charge-da. So dayta ti illegality-tayo. Clandestine mining kano.”

“In aid of legislation, kunada, sir,” kinuna ni Attorney Quidez. “We will not be sued in court, only in the Senate.”

“Sige, saanka nga innala nga abogado ti kompania no dimo kabaelan a protektaran ti kimmotko,” kinuna ni Bileg Aurelio.

“We will craft a good defense,” kinuna ni Attorney Quidez.

“Ni Zaldivar ti nakaam-amak,” kinuna ni Bileg Aurelio. “So, brief us at the Board. Ti maipapan iti national security? Adda la ketdin resulta ti imbestigasion dagiti napusgan nga ahensia, attorney. Ania ngata ti ipabasolda kadatayo?”

“Existence of a private army, sir,” kinuna ni Attorney Quidez. “Iparit ti Konstitusion ti Poro Ylocos dagiti private army. So, sigurado a nabara a diskusion daytoy.” Kasla napleng ni Bileg Aurelio. “Ibaluddak?” Naggarakgak ti abogado. “Ibalud pay nga umuna dagiti politiko dagiti bagbagida. We will make Zaldivar turn her loose mouth on her colleagues,” kinuna ni Attorney Quidez. “Ikkannak iti tiempo a mangadal no kasano nga agballatek daytoy nga imbestigasion kadakuada.” Immisem ti abogado.

“Topnotcher-ka!” immulagat ni Bileg Aurelio. “Ken sika ti maysa a nangisayangkat kadagiti abuyo.”

“Propesorak ni Senadora Zaldivar iti Poro Ylocos State University- School of Law and Jurisprudence,” kinuna ni Attorney Quidez. “Masurotak ti taray ti ulona.”

AWAN arimekmek dagiti kameng ti Board ti Razon-Colorado Group iti dayta a bigat. Kasla napasugkian ti isem ni Don Emilio Yabes a nangilitoklitok iti sarukodna iti suelo sa kinamangna ti gagangay a tugawna. Pinagpusiposna iti namitlo sa nagpug-aw. Alusiisen met dagiti dadduma. Awan met ketdi ti summon dagitoy ta dagiti laeng executive board ti naayaban. Ngem kaskasdi a madanagan ti langa dagitoy.

Kada Don Frederio Gozun ken Don Emilio Yabes, barobaroda ni Bileg Aurelio. Wonder Boy ti nalimed nga awagda kenkuana iti panangikalawana ken panangpapigsana iti Razon-Colorado Group. Uray ni Donia Elenita Dacquel, permi a madanagan ti ikikitana kadagiti tallo a naikkan iti summons— da Bileg Aurelio, Attorney Quidez ken John Rey Razon.

“Kasanon no ibaluddakayo, annakko?” kinuna ni Elenita Dacquel.

“Kas kuna ni Ylokano, adukayo met a mamalon bilang,” insungbat ni Bileg Aurelio a puon ti nagkakatawaanda iti nalag-an.

“Basta sanguenmi ida. No ania ti saludsodenda, isu ti sungbatanmi,” kinuna ni Bileg Aurelio.

“Ti nagan ti kompaniatayo ti pakadanagak,” kinuna ni Don Frederio Gozon. “Nagsuek a dagus ti value ti stockstayo iti market.”

“Ladingitek, ngem sanguek dagitoy a kas resulta dagiti desisionko,” kinuna ni Bileg Aurelio. “Ania man ti mapasamak, ammoyon a politically motivated daytoy a panangayabda kadakami iti Senado.”

“Madanaganak man, anakko,” kinuna ni Donia Elenita Dacquel.

“Saankayo a madanagan, madam,” kinuna ni Attorney Quidez. “Pagbalinentayo a nakakatkatawa ti Senado,” impasarunona.

“Kayatmo a sawen, adda pangabilmo?” dinamag ni Don Emir wenno Don Remy Silvano. “Sabagay, topnotcher-kan sa met idi?” intingigna ket madlaw a lumnek iti tugawna iti baet dagiti memestiso a kameng ti Board.

“Sige, kitaentayto,” insintir ni Don Adolfo Asuzena, ti CFO.

Saanen a naguni ni Attorney Quidez. Inurnosna dagiti papeles sa impaimana ti nabengbeng a polder ken ni Bileg Aurelio.

Narikna ni Bileg Aurelio a nangrugin ti panawen a mapukawna met ni Keith…

“Paki-review, sir,” kinunana sa dinusngianna ti CEO a napamulagat iti kabengbeng ti i-review-na. “Makalawas?”

“Umun-una ti opening ti komite ngem ti launching dagiti kandidato,” insanamtek ni Don Emilio Yabes. “Ala, lalaingenyo,” impasagudsodna sa inammalanna ti di masinsindian a tabakona.

“Asino dagiti pangabil, aya, dagiti senador?” dinamag ni Don Frederico Gozun.

“Ni Buchog, a, ngem kanayon met a tur-og,” kinuna ni Attorney Quidez.

“Ni Mia Gaitano,” kinuna met ni Donia Elenita Dacquel.

“Dagiti pay dua nga agkabsat,” innayon ni Don Vilmerio. “Aglinnaingda ita, a, no asino ti adda ammona, ni Minggoy wenno ni RV.”

“Mabalin met koma dagita dua a Sinay— ni Jerome Sinay nga ama, ken Bambi Sinay.”

Nagtungtung-ed ni Bileg Aurelio. Sa ni Senadora Shalani Zaldivar. Dakesen no marugianna, awan la ketdi sansantuen ti rapas a ngiwatna.

“Ayna, anakko, umaydakanto buyaen,” kinuna ni Donia Elenita Dacquel. “Aglalaingkayo ta bareng mailusotyo met laeng.”

Isu a kadagiti aldaw kasanguanan ti summons, awan inaramid ni Bileg Aurelio no di ti mangrepaso kadagiti dokumento nga inted ni Attorney Quidez ken ti legal staff ti kompania. Uray iti mansion, dayta ti trabahona iti high tech hub. Awan ngamin iti sardam ni Thor ta mapan ken ni Saniata Marionne.

Paset ti rinepaso ni Bileg Aurelio dagiti mining laws kangrunaan ti Comprehensive Mining Act a nangipalubos iti strip mining, ti paglintegan nga isuna ti makuna a technical expert. Ngem kangrunaan a paset a rinepasona ti Small Mining ken Community Mining a probision daytoy.

Maikadua ti maipapan kadagiti probision ti Pamunganayan-Linteg maipapan kadagiti private army, maipapan iti gerra ken ti paglintegan dagiti pagilian kadagiti mercenary. Saan a kualipikado a mersenario da Ama Taleb ta saanda met a napan iti sabali a nasion. Agtinnag laeng a kas private armed groups dagitoy. Ket daytoy ti intudo ni Attorney Quidez a mangisalakan kadakuada: ti kaawan dagiti nalawag a linteg a mangipawil kadagiti private army iti pagilian. Ken awan met ti nalawag a linteg maipapan iti doktrina ti usurpation of authority iti kaso a ti maysa a pribado nga armada gubatenna ti sabali pay tapno irupirna ti maysa a paglintegan wenno pagtalinaedenna ti kappia.

Iti kaadun dagiti agtatapaw a pampanunot a mabalin a manglilibeg kenkuana ken ti buteng ken amakna iti mabalin a damagen dagiti senador, saan a marikna ni Bileg Aurelio ti isusuknal ti ridepna kadagita a rabii. Pamrayanna ti mapan iti siled dagiti ubbing no saanda pay a nakaturog. Rummuar metten ni Janet a yayada no kasta nga adda a makidanggay kadagiti dua nga annakna. Ket agpuyatda.

Irikep no kuan ni Sahri ti laptop-na, idisso metten ni Quid ti selponna, ket pagistoriaenda ti amada maipapan kadagiti padasna iti kinaubingna, ti panagpaspastorna kadagiti dingo ken ni lolana a Caridad wenno iti Nagtiponan, ken ni Tata Saturnino Olazo.

“No agkandidatoka a presidente, daddy, dagitoy la ketdi ti usarem,” inyisem ni Sahri. “Dayta ti leksionmi ngamin, daddy, political rhetorics. Di ngamin eleksion?” Napasardeng ni Bileg Aurelio.

“A napadasam ti nagyan iti nanumo nga away, daddy? A dagiti uggot ti mulmula ti pinagbibiagmo? A no dadduma, awan pay asin?”

Nagtungtung-ed ni Bileg Aurelio nga umis-isem. “Wen, a, kunana ti ads-ko: Dimmakkel iti away, nagipaspastor iti kalding ken baka, nagtartaraken iti manok ken baboy, nakiburburas iti tarong ken kamatis…”

“Minero iti bakasion, estudiante iti makalawas…” intuloy ni Sahrita.

“Kaykayatko daydiay panagminminasmo, daddy,” kinuna met ni Quid. “No ngarud adda anaconda nga adda iti tunnel, daddy? Kasdiay ti premise daydiay impasak a project-ko. Short story.”

Minusiigan ni Sahri ni Quidzer. “Alla, daddy, dayta la ag-generate iti AI essay, kunayo,” impulong ni Sahri. “Marmaruam, daddy… dayta Ask AI nga adda dita phonena, isu ti pagaramidenna iti project-na.”

“Ask AI? Ania dayta a kalokuan?”

Innala ni Sahri ti selpon ni Quid. Biniagna sa impakuyasyasna ti tammudona iti screen. “Daytoy app a kasla sinan-utek ti icon-na, daddy?”

“Wen... an-anuem?”

“I-type-mo ti kayatmo nga aramidenna, daddy. Ibagam a yaramidannaka iti short story a 100 words maipapan iti dayta anaconda and a miner koma.”

Nagtipa ni Sahri iti screen:

“Write a 100-word short story about a miner who found an anaconda in a tunnel.”

Iti screen ti selpon, nangrugi ti panagparang dagiti balikas a nagbalin a patang. Kastoy ti insurat ti selpon iti screen-na:

“John had been working as a miner for over a decade, and he thought he had seen it all. But as he made his way through the dark and narrow tunnel, he froze in fear as he saw the unmistakable shape of an anaconda slithering towards him. John’s heart raced as he realized he was trapped in the tunnel with the giant snake. He slowly backed away, trying not to provoke the creature, but it continued to follow him. After what felt like an eternity,

John finally emerged from the tunnel, drenched in sweat and trembling with fear. He knew he had just had a brush with death.”

Napaumel ni Bileg Aurelio. “Naglaingen!”

“Wen, a, daddy, no ania ti damagen ken paaramidmo, sungbatan ni Ask AI! Isu nga awanen, daddy, ad-adu ti panawenna nga agay-ayam. Madi agpampanunoten ni Quid!”

Minulenglengan ni Bileg Aurelio ni Quid. Kitaem kadi, saan kadi nga iti laeng nabiit, kinuna ni Thor a gumatang iti stocks iti Oracle Poro Ylocos? Ket AI a talagan ti paglalabanan iti masaguanan. Saan a kas idi isuda ti estudiante idi panawenna a dadakkel pay laeng ti monitor dagiti computer, uso ti Gateway, HP, Dell ken IBM ken Nokia 3210 ken 3310, Motorola, Blackberry Pearl, HTC, Sony Ericsson dagiti modelo ti cell phone a pag-text, pagretrato ken pagawag laeng. Circa 2000. Malagip ni Bileg Aurelio daydi Millenium Bug a nagdandanaganda kadagiti unibersidad aglalo ta manarimaan pay laeng ti thesis-da kadagidi a panawen.

“Ngem, Quid, ammom met laeng ti agpanunot?” insintir ni Bileg Aurelio.

“Wen, daddy, impasingked ti ubing.”

Dandani met inaldaw a mapanna sarungkaran da Riz ken Don Segundo Razon, dagiti saanen a makabalin a mangted kenkuana iti pannaranay, nagbalin payen dagitoy a mainayon a saem iti kinataona.

Saan a napintas ti damag maipanggep ken ni Riz. Kinuna ti doktorna a mabalin a maoperar manen no dumakkel a dumakkel ti maysa a tumubtubo a lasag a mangidurduron iti na-fracture a paset ti durina. Ngem yuraydan ti doktor nga aggapu iti Mayo Clinic, Rochester ta isunton ti mangkita a nalaing iti ipakatda a wagas.

Saan met pay a kasano a nagbaliw ni Don Segundo Razon iti laksid ti pannaka-therapy-na. Um-umres ti bagi ti dati a nataked a don. Iti yeerres ti bagina timmaud dagiti kurenren ken linia iti rupana.

Napan iti billing ti ospital. Napakiet iti intedda a billing statement. No dua a milion ti binayadanna iti yan ni Riz, 3.5 a milion ti bill ni Don Segundo Razon. Nangisurat iti tseke, pinirmaanna sa pinigisna nga insungo iti cashier. Mangrugin a kuminnit ti gastosna kadagiti agama. Ospital de Cincuenta Familias ngarud, nga amin nga iseserrek laeng, ribun ti bayadna.

Ngem segun kadagiti empleado ti ospital, dagiti laeng akinkukua ti bumakbaknang. Segun kadakuada, dose mil laeng ti sueldo dagiti nurse. Nakemkem ni Bileg Aurelio ti pangana. Ngem nasursuronan nga awaten, a kas kenkuana, maysa a negosio daytoy a nasken a sumapul dagiti investor. Saan a pagduaduaan, ti Ospital De Cincuenta Familias ken ti Farmacia Central ti kangatuan iti baluasion iti stock market.

Ngem iti laksid ti kaadda a pakakumikomanna, adda latta dagiti gundaway a saan a maliklikan ni Bileg Aurelio ti awis ti nakaparsuaan a lasag. Lunes iti masungad a lawas ti hearing. Impambarna ken ni Nana Pacing nga adu ti asikasuenna iti opisina ken tapno maipamaysana ti agsagana para iti dayta.

Ngem iti alas kuatro, nagpakadan ni Keith kenkuana nga umun-una. Kinapudnona, umun-unan ni Keith iti kasera daytoy ket dagasen da Bileg Aurelio. Iti alas kuatro media, nagrubuaten da Bileg Aurelio ken Thor iti Toyota Prado Dubai Edition. Dimmagasda iti Starlife Financial tapno ipakaammoda ken ni Thor ti naimbag a damag a naawat ni Bileg Aurelio iti selponna— iti Celestial City ti Iglesia ti Dios, International ti pakaangayan ti launch rally ti Partido Paisanos iti matapogan ti Oktubre.

Kalpasanna, nagderetsodan iti kasera ti balasang tapno dagasenda daytoy. Ti destinasion: Maulpan Mountain-Lake, iti resort nga impasdek ni Bileg Aurelio para ken ni Riz iti daytoy crater ti nalbo a bulkan a naaddaan iti caldera lake.

Imbabada dagiti ramitda iti cabin a naaramid kadagiti container van. Bassit ti cabin ngem adda dua a siledna ken adda kosinana ken salasna. Adda iti tengnga ti salas ken kosina, agsumbangir dagiti kuarto. Naglutoda a dagus iti pangmalem. Nagtunoda kadagiti balonda iti nalangto dagiti muyongna a paraangan a tumamdag iti nakatartarnaw a dan-aw. Dita, adda power yacht ni Bileg Aurelio.

Kalpasan ti panangrabiida iti asideg ti nagtunuanda, nagpaknin ni Thor ket imbaga daytoy nga agguardia. Impalugan ida ni Thor iti pantalan sa nagbati. Pinagandar metten ni Bileg Aurelio ti yate, ket ti motorboat binurakna ti talinaay ti dan-aw.

Nagmaysa nga orasda iti dan-aw. Ngem saan a pasig a ragsak ti nagbuliganda. Ket iti umuna a gundaway, narikna ni Bileg Aurelio a nangrugin ti panawen a mapukawna met ni Keith.

Ta kalpasan ti panagkirpa dagiti angesda iti datar ti motorboat, nagtimek ni Keith.

Itoy A Bilang

ilo-ph

2023-06-01T07:00:00.0000000Z

2023-06-01T07:00:00.0000000Z

https://manilabulletin.pressreader.com/article/281685439227974

Manila Bulletin Publishing Corp