“Agkararag, Mangnamnama, ken Di Agdanag”

Intayon iti Santuario ni Padre Pio iti Davila…

ITI tunggal malem ti Sabado ken beinte tres ti mabilang iti kada bulan, adu dagiti agturturong iti Barangay Davila iti ili ti Pasuquin, Ilocos Norte tapno agatendarda iti healing mass iti Saint Padre Pio Shrine a masarakan iti sakaanan ti bantay iti nasao a barangay, iti igid ti national highway, mapan a 35 a kilometro ti kaadayona manipud iti Siudad ti Laoag wenno mapan a 15 a kilometro manipud iti poblasion ti Pasuquin no aggapuka iti abagatan. Saan laeng nga aggapu iti nadumaduma a lugar iti Ilocos Norte dagiti mapmapan iti healing mass; adu pay kadakuada ti aggapu kadagiti kabangibang a probinsia ken iti Metro Manila.

La Verna Hermitage

Sakbay a naibilang a Saint Padre Pio Shrine dayta a paset ti Brgy. Davila, nagserbi daytoy a pakasanayan ken pakamulian dagiti Capuchin wenno dagiti papadi manipud iti Franciscan Order. Impasdek daytoy dagiti Capuchin Franciscan Friars idi 1983 ket inawaganda iti La Verna Hermitage. Naadaw ti naganna a La Verna— a kayatna a sawen ket “tiempot’ lamiis”—iti Sanctuary of La Verna, ti lugar idiay Italia a nakaawatan ni St. Francis of Assisi kadagiti stigmata wenno kadagiti sugat a kas kadagiti sugat ni Jesus idi nailansa iti krus.

Segun ken ni Rev. Fr. Wilfred Atienze, OFMCap, Assistant Parish Priest ti St. Francis of Assisi Parish Church iti Pasuquin, ti La Verna ti maysa kadagiti karirigatan a pakadestinuan dagiti Capuchin iti pagilian. Agnaed dagiti padi a maipatulod ditoy kadagiti hermitage house a daddadakkel la bassit ngem iti balay ti kalapati. Addaan ti La Verna iti innem a hermitage house a naiwaras iti nadumaduma a paset ti kabambantayan.

Adda dagiti gundaway a masapul a mapan agkararag dagiti papadi iti tengnga ti rabii iti mother house nga adda met iti nababbaba a paset ti bantay. Kayatna a sawen, sumalogda manipud iti bantay iti kaltaang iti rabii. Saan ngarud a nakaskasdaaw nga adu dagiti istoria maipanggep kadagiti uleg a nangpasidduker kadakuada bayat ti ipapanda iti mother house; mairaman ditoyen ti pannakirangetda iti maysa a king cobra a kasla bandehado ti kadakkel ti pannakateltelna.

Malaksid kadagita a krus dagiti maidestino iti La Verna, masapul pay nga ibaklayda dagitoy: simple a panagbiag, panagpakumbaba, panangpakawanda kadagiti nakabasol kadakuada, ken panangiwaksida iti iliw kadagiti naggapuanda a lugar.

Saint Padre Pio

Adu dagiti naawis ti atensionna iti La Verna Hermitage; kangrunaan ditoyen dagiti deboto ni Saint Padre

Pio. Gapu ta masansan a ditoy ti pagkararaganda tapno dumawatda iti panangibabaet ti nasao a santo, imbilangdan ti La Verna a Saint Padre Pio Shrine wenno santuario ni Padre Pio.

Ni Padre Pio, wenno Francesco Forgione, ket maysa a padi a Capuchin. Nayanak idiay Pietrelcina, Italia idi Mayo 25, 1887. Iti edadna a kinse, simrek a Capuchin ket nagserbi iti kombento iti San Giovanni Rotondo.

Tawen 1918 idi nagparang dagiti stigmata ni Padre Pio (dagiti sugat a kas kadagiti sinagaba ni Jesus) ket sinagabana dagitoy iti limapulo a tawen. Kalpasan ti pannakaawatna kadagiti sugat ni Jesus, adu dagiti naipadamag a naaramidna a milagro, kas koma ti pannakaagas dagiti masaksakit, pannakapagna ti maysa a pilay, pannakaisubli ti panagkita ti maysa a bulsek, levitation wenno panagtapaw iti angin, ken bilocation wenno kaaddana iti dua a lugar iti maymaysa a kanito.

Pimmusay ni Padre Pio idi Septiembre 23, 1968. Nagbalin a santo kalpasan iti canonization rites nga inwayat ni Pope John Paul II idi Hunio 16, 2002.

Mairaman kadagiti paggugusto a paspasiaren dagiti deboto ni Padre Pio iti La Verna Hermitage dagitoy: dagiti dadakkel a ladawan da Saint Francis of Assisi, Saint Clare of Assisi ken Saint Padre Pio; Mountain Stations of the Cross; Candle Chapel; Padre Pio Museum; ken Padre Pio Chapel a pakaiwaywayatan ti healing mass.

Healing Mass

Kuna ni Fr. Atienze, maiwaywayat ti healing mass iti Davila iti alas tres iti malem iti kada Sabado. Adda pay healing mass iti beinte tres ti mabilang iti kada bulan ta beinte tres ti kaaldawan ti ipupusay ni Padre Pio. Maysa nga oras sakbay ti nasao a misa, maangay ti Adoration of the Blessed Sacrament. No adu unay ti makimisa, iti Saint Francis of Assisi Parish Church, a mapan a maysa a kilometro ti kaadayona iti amianan ti Saint Padre Pio Shrine, ti pakaangayan ti healing mass.

Iti naminsan a panagatendarmi iti healing mass, maysa nga ina ti nangited iti testimonia. Dua kano a banag ti indatagna ken ni Padre Pio: ti panaglaing ti maysa nga anakna nga agsagsagaba iti sakit ti dalem; ken ti pannakairuar ti maysa pay nga anakna a nangala iti civil engineering board exam. Kalpasan ti makalawas a panagkarkararagna iti panangibabaet ni Padre Pio, nakakaskasdaaw a naglaing ti sakit ti dalem ti maysa nga anakna; nakaruar met iti eksamen ti maysa pay nga anakna.

Adu pay a testimonia ti naammuanmi. Saan laeng a panaglaing dagiti masakit ta mairaman pay dagitoy: nasolbar dagiti problema dagiti agassawa; narisut dagiti problema iti negosio; nagballigi iti eksamen; naikkan iti napimpintas a trabaho; ken pannakalawlawag dagiti nadumaduma pay a pakarikutan.

Isu nga umad-adu latta dagiti agturturong iti Davila iti ili ti Pasuquin ta makapabang-ar man dagiti balikas ni Padre Pio a, “Pray, hope and don’t worry!”— agkararag, mangnamnama, ken di agdanag.—O