Pasiarentayo ti Dinapigue Bridget A. Ursulum Antonio

TI ili ti Dinapigue ti akin-abagatan kadagiti uppat nga ili ti Isabela a naisaad iti daya a paset ti probinsia a sumango iti Taaw Pasipiko. Kadagitoy amin nga ili, ti laeng Dinapigue ti mabalin a madanon babaen ti bus wenno dadduma pay a lugan a para iti kalsada. Iti Santiago ti pagluganan iti bus no aggapuka iti Isabela. Iti met Baler no aggapuka iti Central Luzon wenno iti Manila.

Dagiti dadduma nga ili a kas iti Maconacon, Divilacan, ken Palanan, madanon laeng babaen ti eroplano wenno babaen ti panaglugan iti lampitaw manipud iti Santa Ana, Cagayan iti amianan wenno iti ili ti Dilasag iti Aurora.

Agarup 78 a kilometro babaen ti eroplano ti kaadayo ti Dinapigue manipud iti Siudad ti Ilagan a kabesera ti Isabela.

Mabalin pay a kunaen a sulsulinek wenno narigat a madanon daytoy nga ili ta imputong ti nangato ken nasamek a Bantay Sierra Madre manipud iti kadaklan a paset ti Isabela. Adda met iti dayaenna ti mangliwengliweng a Taaw Pasipiko.

Adda ti ili ti Palanan iti amianan ti Dinapigue a madanon babaen ti innem nga oras a panagdaliasat iti taaw.

Ti met ili ti Dilasag, Aurora ti ili a naibeddeng iti Dinapigue iti abagatan. Madanon ti ili babaen ti Quirino-Dinadiawan Road manipud iti Maddela wenno Nagtipunan, Quirino wenno manipud iti Baler-Casiguran Road iti probinsia ti Aurora.

Maysa a primera klase nga ili ti Dinapigue a pagnaedan ti 5,821 nga umili, kas maibatay iti sensus iti 2020. No sumaren ti kaadu ti lumugar ken ti kalawa ti sibubukel nga ili, innem a tao ti agnaed iti tunggal maysa a kilometro kuadrado.

Iti met Dinapigue ti pagnaedan dagiti Dumagat, patneng nga umili a mabirbirngasan a “puli nga agnanaed iti sidong ti nakaparsuan.”

Idi laeng Hunio 1969 a napundar daytoy nga ili manipud iti San Mariano a sigud a nakaikamenganna a kas sitio.

Buklen ti innem a barangay ti ili. Agrikultura, panagtarikayo, ken panagkalap ti kangrunaan a pagsapulan dagiti lumugar.

Dagiti Pangawis ti Ili

Maibilang kadagiti kangrunaan a pangawis ti Dinapigue kadagiti turista ti Didekkel ken Dibulo Falls, Bonsai Forest, ken Dipalale Cave.

Mabalin a kunaen a ti Dibulo Falls ti kangangayedan kadagiti amin nga atraksion iti sibubukel a probinsia ti Isabela. Iti katayagna nga agarup a 100 a metro, maibilbilang a daytoy ti katatayagan a dissuor iti sibubukel a probinsia. Saan pay a marigatan ti asino man a mangpasiar iti daytoy a dissuor ta saan a nasamek ken nadalus ti dana a pangipaddakan kadagiti saka. Nagalis laeng dagiti bato a baddeken no agtudtudo.

Maysa pay kadagiti di pay nabasakbasak a mapasiar iti Dinapigue ti Bonsai Forest, nasurok a 5,000 nga ektaria ti kalawana a bakir a yan dagiti di unay dimmakkel a kayo. Kasla maysa a higante ti maysa a tao a magmagna iti nagbabaetan dagitoy a kayo.

Maysa ti Bonsai Forest kadagiti mangparparimat ti Northern Sierra Madre Natural Park ken mairekrekomendar a mairaman iti listaan ti UNESCO World Heritage Site.

Adda pay dagiti ecological parks a kas iti Tadi Resort a nakaimontaran dagiti nagduduma a muyong ken dagiti kalapaw a mabalin a pagumianan.

No sumang-atka iti parola (lighthouse), maimatangan ti nangayed a pakabuklan ti ili a pakairaman dagiti saan pay a naad-adakan a kabakiran iti igid ti baybay.

Rambakan met ti ili ti Hilada Festival tunggal Hunio a pangiparangan dagiti lumugar kadagiti nariinganda a kultura.—O