Siled ti Kararag

Basaentayo ti Salmo 147:7-18

Kumotanna ti tangatang iti ulep; itedna ti tudo nga agpaay iti daga, ket pagtubuenna ti ruot kadagiti turod.—Salmo 147:8

BAYAT ti panagbuybuyak iti damdamag iti panangrugi ti panawen ti bagyo, naipalagip dagiti rumbeng ken dagiti saan a rumbeng nga aramiden iti panawen ti bagyo. Iti pay laeng panangdengngegko iti bilang ti posible a sumangbay a bagyo iti dayta a tawen, nagsarimadeng ken nagkararagakon. Mabutengak iti bagyo. No makangngegak iti damag maipapan kadagiti angin, tudo, allawig, wenno dadduma pay a didigra, agkarkararagak—dawdawatek iti Dios ti panangaywanna kaniak, iti pamiliak, ken iti lugarmi.

Ngem saan nga inaldaw nga adda sumangbay a bagyo. No dadduma, ipaay ti Dios ti naanus a tudo, ti naraniag nga init, wenno ti nayaplag a napintas a yelo. No awan dagitoy a panagbaliw saantayo a maapresiar dagiti nagduduma a sabong nga agukrad kadagiti nagduduma a panawen, dagiti ruot, wenno dagiti napintas a kabakiran. Dagita kakasta a panawen bendisionanda met ti taltalon a mangipapaay kadatayo kadagiti taraon ken material a maaramid a lupot. Ti tudo danumanna dagiti tanap, karayan, ken waig; ti yelo abbonganna dagiti daga tapno mapalanas ti ruar ti pagtaengan. Agyamanak iti Dios iti natural a kinapintas ti daga ken iti panangipaay ti Dios iti taraon, kawes, ken panaglinglingay.

Kas iti pammalagip ti paset ti nasantuan a surat ita, maay-ayo ti Dios kadagiti mangnamnama iti saan nga agbalbaliw nga ayat ti Dios. Ania man ti maipadamag a sasaaden ti paniempo, mabalintayo ti agtalek iti Namarsua, ket daytoy a panagtalek yas-asidegnatayo iti Dios.

Kararag: Patgenmi a Dios, tulongannakami nga agtalek kenka. Ania man ti kasasaad ti panawen, ammomi a ti panggepmo ket agpaay iti pagimbaganmi ken iti pakaidayawam. Amen.

Kapanunotan: Agtalekak iti pannarabay ti Dios ania man ti kasasaad ti panawen.

Ikararagan: Dagiti lugar a dumaldalanan dagiti bagyo.